استانادا جاڭادان سالىنىپ جاتقان تۇرعىن ۇيلەر از ەمەس. ال باسپانالى بولعانداردىڭ سۋ جاڭا پاتەرگە ەسكى جيھازداردى كىرگىزە قويۋى ەكىتالاي. بۇل تۇرعىدا بەلارۋس, يتاليا جيھازدارىنىڭ ايى وڭىنان تۋىپ تۇر. دەگەنمەن سۇرانىسقا يە زاماناۋي جيھاز جاساپ جاتقان وتاندىق كاسىپورىندار دا جوق ەمەس.
ەڭ باستىسى – ساپا
كاسىپكەر مۇرات بەيىسباەۆتىڭ جيھاز بيزنەسىمەن اينالىسىپ جۇرگەنىنە 3 جىل بولىپتى. نەگىزگى ماماندىعى – سۋرەتشى. ءوزى – كاسىبي قولونەر شەبەرى. ومبى قالاسىنداعى شوقان ءۋاليحانوۆ ءمۇسىنى مەن استاناداعى بىرقاتار ءمۇسىن-ەسكەرتكىشتەردى جاساۋعا اتسالىسقان. قۇرىلىس باسىندا دا ديزايندىق جۇمىستارمەن اينالىسقان مۇرات جۇماعۇلۇلى ءبىر كەزدەرى مەشىت كۇمبەزىن دە جاساعان كورىنەدى. ال جيھاز ءىسىن شاعىن شكافتان باستاعان ول قازىرگى ۋاقىتتا تۇتىنۋشىلاردىڭ تالعامىنا قاراي تاپسىرىس بويىنشا ءتۇرلى زاماناۋي, ءساندى ءارى ساپالى ۇستەلدەر مەن گاردەروب, جاتىن بولمە مەن اس ءۇي جابدىقتارىن جاسايدى. جيھاز ماتەريالدارى رەسەي, قىتاي جانە تۇركيا ەلدەرىنەن تاسىمالدانادى ەكەن. الايدا شەتەلدەردەن اكەلىنەتىن ماتەريالدىڭ ەڭ قىمبات تۇرلەرىن عانا الاتىنىن ايتادى كاسىپكەر.
– ءوزىم سۋرەتشى بولعاننان سوڭ ءبىرىنشى كەزەكتە جيھازدىڭ ديزاينىنا باسا ءمان بەرەمىن. جاساعان دۇنيەلەرىمىزدىڭ ارتىقشىلىعى ماتەريالدى ويىپ بەدەرلەگەننەن گورى وعان ارنايى ويۋ-ورنەكتى جاپسىرىپ, ونى قىمبات سىرلارمەن بوياپ, جيھازدىڭ ساپاسىمەن قاتار, ادەمىلىگىن دە قاتتى قاداعالايمىز. ءبىزدىڭ جۇمىسىمىزدىڭ ءجۇرىپ جاتقانى دا وسى ساپاعا جۇمىس جاسايتىنىمىزدا بولار. ايتپەسە, بۇل سالادا كاسىبىن دوڭگەلەتىپ جۇرگەندەردىڭ ءبىرشاماسى بانكروتقا ۇشىراپ جاتىر, – دەيدى مۇرات بەيىسباەۆ. – حالىقارالىق جيھاز كورمەلەرىنە دە ۇنەمى قاتىسىپ تۇرامىن. مىسالى, قىتايدىڭ شانحاي, گۋانچجوۋ قالالارىندا بولدىم. سول كورمەلەردە كورگەن-تۇيگەنىمدى تاجىريبە جۇزىندە ىسكە اسىرىپ, ونىمدەرىمىزگە قازاقستاندا جوق دۇنيەلەردى ەنگىزۋگە تىرىسامىز. سونىمەن قاتار ولشەم بىرلىككە دە ەرەكشە ءمان بەرىپ, ءتىپتى ميلليمەترىنە دەيىن قاتە جىبەرمەۋدى ەسكەرەمىز. شكافتىڭ بەكىتىلەتىن جەرلەرى كوبىنە ءبىراز ۋاقىتتان كەيىن ويىلىپ, سىنىپ جاتادى. ويتكەنى ونى بەكىتەتىن ارزان قۇرالداردىڭ ەڭ تومەنگى باعاسى 2 تەڭگە بولسا, تاعانىنداعى ءتورت بۇرىشىنا بار بولعانى 8 تەڭگە جۇمسالادى. ال ءبىز مۇنداي ارزانقول قۇرالداردى مۇلدە قولدانبايمىز. بۇل 2 تەڭگەلىكتىڭ ورنىنا ءبىز 100 تەڭگە تۇراتىن ساپالى قۇرالدى ورناتامىز. سوندا 8 تەڭگە مەن 400 تەڭگەنىڭ ايىرماشىلىعىن ءوزىڭىز دە باعامداپ كورىڭىز.
3 جىلعا دەيىن كەپىلدىك بەرىلەتىن جيھاز باعاسى تۇتىنۋشىلاردىڭ سۇرانىسىنا قاراي 100 مىڭ تەڭگەدەن باستالادى ەكەن. قازىرگى ۋاقىتتا ساتىلىم تەك استانامەن شەكتەلمەي, ەلىمىزدىڭ بىرقاتار قالالارىنان دا تاپسىرىستىڭ ءتۇسىپ جاتقانىن ايتادى ماماندار. جالپى, كاسىپورىندا اتالمىش سالانىڭ جىلىگىن شاعىپ, مايىن ىشكەن 20 مامان جۇمىسپەن قامتىلىپتى.
– بۇل جۇمىس وزىمە قاتتى ۇنايدى. بار ىنتا-شىنتاممەن ىستەيمىن. الايدا مۇنداي قىرۋار جۇمىستى مەن جالعىز جۇرگىزىپ جاتقان جوقپىن. مۇنى وتباسىلىق كاسىپ دەپ ايتۋعا دا بولادى. ويتكەنى قاراماعىمداعى جۇمىسشىلاردىڭ كوپشىلىگى – ءوزىمنىڭ تۋىسقاندارىم. اۋىلداعى تۋعان اعالارىم مەن ىنىلەرىمدى شاقىرتىپ الدىم. ولاردىڭ اراسىندا كاسىبي جيھاز جاساۋ شەبەرلەرى دە بار. اعا-ىنىلەرىمنىڭ دە قولونەرگە بۇرىننان ەبى بار-تۇعىن. قازىر ولار بۇل سالادا ابدەن شىڭدالىپ الدى. جالپى, بۇل ونەر بىزگە اتا-بابامىزدان دارىسا كەرەك. ەستۋىمىزشە, كەزىندە اتالارىمىز تۇرمىسقا قاجەتتى زاتتاردى سۇيەكتەن, اعاشتان ويىپ جاساعان دەسەدى, – دەيدى بيزنەسمەن ءسوز اراسىندا.
كاسىبىم – ءناسىبىم
جيھاز جاساۋشىلار 500 شارشى مەتر بولاتىن تسەح پەن وسىنداي كولەمدەگى قويمانى جانە 100 شارشى مەترلىك ساۋدا ورتالىعىنداعى بۋتيكتى جالعا الىپ وتىر. جالعا الۋدىڭ اي سايىنعى شىعىنى 2 ملن تەڭگەگە جەتىپ جىعىلاتىن كورىنەدى.
تسەحتا گەرمانيا مەن اۆستريانىڭ زاماناۋي تەحنيكالارى قويىلعان. وسىنىڭ ارقاسىندا كاسىپورىننىڭ بۇرىنعىعا قاراعاندا جيھاز جاساۋداعى مۇمكىندىگى ەداۋىر ارتقان. قازىر وتاندىق ءونىم شەتەلدەن اكەلىنەتىن جيھازداردان ەش كەم ەمەس.
دەگەنمەن ءالى دە ستانوكتاردىڭ جەتىسپەيتىنىن ايتادى كاسىپورىن باسشىسى.
– باسىندا ساندەگىشتەردى گيپستەن قاتىرىپ جاسايتىنبىز. الايدا ونىڭ ساپاسى ءبىز ويلاعانداي بولماي شىقتى. سوندىقتان اعاشتان جاسالعان دايىن ماتەريالدى ساتىپ الىپ جاتىرمىز. ال ونى وزىمىزدە جاسايىق دەسەك, ستانوكتارىمىز وعان ارنالماعاندىقتان, كىشكەنتاي بۇيىمنىڭ وزىنە 3-4 ساعات ۋاقىت كەتىپ قالادى. بۇل ۋاقىتتا ءبىز قىرۋار شارۋا بىتىرەمىز. دەگەنمەن, الداعى ۋاقىتتا وسىنداي ۇساق-تۇيەكتەردى دە جاساۋدى قولعا الماقپىز. ول ءۇشىن تاعى دا قىمبات ستانوكتاردى الۋىمىز كەرەك. بىراق ونداي بۇيىمداردى وياتىن ستانوكتار 180 مىڭ دوللار تۇرادى. وعان ازىرگە قارجى جاعى قولبايلاۋ بولىپ تۇر. وسىنداي قۇرال-جابدىقتار الىپ, تسەح سالۋ ءۇشىن «بيزنەستىڭ جول كارتاسى – 2020» سياقتى مەملەكەتتىك باعدارلاما بويىنشا «دامۋ» قورى مەن «اتامەكەن» ۇلتتىق كاسىپكەرلەر پالاتاسى ارقىلى جەڭىلدەتىلگەن نەسيە الساق دەپ جوسپارلاپ وتىرمىز, – دەيدى «ەكسكليۋزيۆ دامۋ» جشس ديرەكتورى م.بەيىسباەۆ.
العان بەتتەن قايتپايتىن ازامات زامان اعىمىنان دا قالىس قالماي, عالامتوردىڭ دا قىر-سىرىن مەڭگەرىپ الىپتى. الەۋمەتتىك جەلىلەر ارقىلى بيزنەسىنىڭ جارناماسىن ءوزى جاسايدى ەكەن. «بۇرىن جارناما مامانىنا اي سايىن 70 مىڭ تەڭگە تولەيتىنمىن. ەندى ءوزىم دە ماشىقتانىپ الدىم. قازىر وعان ارتىق شىعىن شىعارمايمىن. جالپى, ينستاگرامم جەلىسى ارقىلى تاپسىرىستار كوپ تۇسەدى» دەيدى ول. ادال ەڭبەگىن ءناسىپ ەتىپ وتىرعان كاسىپكەرگە تاسى ورگە دومالاي بەرسىن دەپ تىلەدىك.
