ورتالىق كوممۋنيكاتسيالار قىزمەتىندە قر مادەنيەت جانە سپورت مينيسترلىگىنىڭ تىلدەردى دامىتۋ جانە قوعامدىق-ساياسي جۇمىس كوميتەتىنە قاراستى ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى ديرەكتورىنىڭ مىندەتىن اتقارۋشى قونىسباي ءابىل جۋرناليستەرمەن جۇزدەستى.
بۇگىنگى تاڭدا ورتالىقتا بىرقاتار جاڭا جوبالار قولعا الىنعان. اسىرەسە, تەرمينولوگيا سالاسىندا قوردالانىپ قالعان ماسەلە جەتەرلىك. سوندىقتان, وسى ءتۇيىندى ءتيىمدى شەشۋ ءۇشىن ورتالىق تەرميندەردىڭ ەلەكتروندىق قورىن قۇرۋ بويىنشا عىلىمي-تاجىريبەلىك زەرتتەۋلەر جۇرگىزۋدە. پورتالدىڭ نەگىزگى ماقساتى – ءتىلتانۋشى عالىمدارعا بىرلەسىپ جۇمىس جاساۋعا ارنالعان پلاتفورما قۇرىپ, ىزدەنۋشىلەرگە قازاق تەرمينولوگيالىق قورىنداعى تەرميندەردىڭ اۋدارماسى مەن ەتيمولوگياسىنا قول جەتىمدىلىگىن ارتتىرۋ قاراستىرىلعان.
تەرمينولوگيا – عىلىمنىڭ ماڭىزدى سالاسى. نەگىزىنەن, تەرميندەردى قازاق تەرمينولوگياسىن جۇيەگە كەلتىرۋ, قازاق ءتىلىنىڭ ايتىلۋ جانە جازىلۋ زاڭدىلىقتارىنا ساي جۇيەلەۋ, جاڭا سوزدەر مەن اتاۋلاردى بىرىزدەندىرۋ وتە ماڭىزدى. بۇل جۇمىس الەمدىك تاجىريبەنى, تۋىس تىلدەردىڭ مودەلىن, حالىقارالىق تەرميندەردى قولدانا وتىرىپ جاسالۋى ءتيىس. سوندىقتان جاڭادان بەكىتىلگەن تەرميندەردىڭ باق-تا جاريالانۋ جيىلىگىنە مونيتورينگ وتكىزىلىپ تۇرعانى ابزال, – دەيدى قونىسباي ءابىل.
ايتالىق, ءتيىستى باعدارلاماعا سايكەس 2014 جىلى قازاق ءتىلىنىڭ رەتتەلگەن تەرمينولوگيالىق قورىنىڭ ۇلەسى – 20 پايىزعا, 2017 جىلعا قاراي – 60 پايىزعا, ال 2020 جىلعا قاراي 100 پايىزعا جەتكىزۋ مىندەتتەلگەن.
سونداي-اق, الداعى تاڭدا ەلىمىزدە ءتىلدەردى وقىتۋدىڭ بىرىڭعاي ادىستەمەسى جاساقتالماق. بۇل جۇمىس, نەگىزىنەن, قالالار مەن ايماقتاردا ورنالاسقان ورتالىقتاردىڭ جۇمىسىن بىرىزدەندىرۋگە باعىتتالعان. سەبەبى, ولاردىڭ ساعاتتارى دا ءارتۇرلى, بىرىڭعاي ادىستەمە دە جوق ەكەن.
«ورتالىق باعدارلاما اياسىندا 100-گە جۋىق وقۋ-ادىستەمەلىك قۇرال جاساپ شىعاردى. جانە ول بارلىق ايماقتارعا تاراتىلدى. ورتالىقتا ەكى مۋلتيمەديالىق كابينەت, 3000 كىتاپ قورى ساقتالعان كىتاپحانا بار. قازىرگى تاڭدا ورتالىقتا وقۋ-ادىستەمەلىك جۇمىستارمەن بىرگە باسپا ءىسىن عىلىمي ساراپتامادان وتكىزۋگە مۇمكىندىك بەرىلگەن. ءوزىمىزدىڭ سايتىمىز دا جۇمىس ىستەيدى. كۇندەلىكتى وقۋ-ادىستەمەلىك تەرمينولوگيا, سوتسيولينگۆيستيكا, اۋدارما ءىسى جانە قازاقتانۋ سىندى بولىمدەر قىزمەتتەرىن اتقارۋدا» دەيدى ورتالىق باسشىسى.
جانە ورتالىق مامانى ليزا ەسبوسىنوۆا تاعى ءبىر جان جادىراتار تىڭ جاڭالىق جەتكىزدى. ونىڭ ايتۋىنشا, 2017 جىلعا قاراي قازاقستاندىقتاردىڭ 70 پايىزى قازاق تىلىندە ەركىن سويلەمەك.
«بۇگىنگى تاڭدا ءبىزدىڭ جۇرگىزگەن الەۋمەتتىك ساۋالدامامىز بەن ءتىل ۇيرەتۋ ورتالىقتارىنان بەرىلگەن سەرتيفيكاتتار سانىنىڭ پايىزدىق كورسەتكىشتەرىنە قاراپ قازاقستان ازاماتتارىنىڭ 40 پايىزى قازاق تىلىندە ەركىن سويلەپ, جازا الاتىنىن اڭعاردىق. ناقتى جوسپاردى ورىنداۋ ارقىلى ءبىز بۇل كورسەتكىشتى 2017 جىلى 70 پايىزعا دەيىن جەتكىزەتىن بولامىز» دەدى ول.
ازامات ەسەنجول
