جيەنقۇلوۆانىڭ بي بايقاۋى
كەشە ەلوردادا ش.جيەنقۇلوۆا اتىنداعى V رەسپۋبليكالىق قازاق ءبيى بايقاۋى باستالدى. قازاق ۇلتتىق حورەوگرافيا اكادەمياسى ۇيىمداستىرىپ وتىرعان بيشىلەر بايقاۋى ءۇش كۇن بويى جالعاسادى. وعان ەلىمىزدىڭ ءار ايماعىنان 150-دەن اسا قاتىسۋشى جينالدى.
بۇل جولى بايقاۋ كاسىبي ۇجىمدار, جوعارى وقۋ ورىندارىنىڭ حورەوگرافيا فاكۋلتەتتەرى مەن كافەدرالارىنىڭ انسامبلدەرى اراسىندا ءوتىپ جاتىر. بايقاۋ باعدارلاماسى ايماقتىق انسامبلدەردىڭ رەپەرتۋارىمەن, حورەوگرافتاردىڭ جاڭا ىزدەنىستەرىمەن تانىسۋعا, ۇزدىك بيشىلەردى انىقتاۋعا, قاتىسۋشىلارعا قازاق ءبيى سالاسىنداعى شىعارماشىلىق جەتىستىكتەرىمەن, كاسىبي تاجىريبەمەن جانە بىلىممەن ءوزارا الماسۋعا مۇمكىندىك بەرەدى.
بايقاۋ اياسىندا قازكسر ەڭبەك سىڭىرگەن ءارتىسى, پروفەسسور تويعان ءىزىمنىڭ جەكە كوللەكتسياسىنان ساحنالىق كوستيۋمدەر كورمەسى, قازاق ۇلتتىق حورەوگرافيا اكادەمياسىنىڭ فوتوكورمەسى, قازاقستاندىق سۋرەتشى انار اۋباكىر سۋرەتتەرىنىڭ ۆەرنيساجى, قازاق ءبيىنىڭ جەتەكشى پەداگوگتارىنىڭ شەبەرلىك ساباقتارى ءوتىپ, قازاق ۇلتتىق حورەوگرافيا اكادەمياسىنىڭ قازاق ءبيى زەرتحاناسىنىڭ تۇساۋى كەسىلەدى. «قازاق ءبيى» دەرەكتى ءفيلمى كورسەتىلەدى.
اتالمىش جارىس العاشقى رەت 1992 جىلى ۇيىمداستىرىلعانىن ايتا كەتەيىك. ودان كەيىن اراعا توعىز جىلدى سالىپ, قايتا جانداندى. وسىنىڭ الدىنداعى بايقاۋ 2012 جىلى ءوتىپ, شارا جيەنقۇلوۆانىڭ 100 جىلدىق مەرەيتويىنا ارنالدى. سايىس قازاق ەسترادالىق جانە حالىقتىق بي سالاسىنداعى تالانتتى بيشىلەردى, بالەتمەيستەرلەر مەن پەداگوگتاردى انىقتاۋ ماقساتىن كوزدەيدى. بيىلعى بايقاۋدىڭ جەڭىمپازدارى 29 ناۋرىزدا انىقتالادى. سول كۇنى وتەتىن گالا-كونتسەرتتە جەڭىمپازدار ماراپاتتالادى.