قر ۇكىمەتىنىڭ استانادا جولاۋشىلاردى جانە جۇكتى اۆتوموبيل كولىگىمەن تاسىمالداۋ ەرەجەسىن بەكىتۋ تۋرالى ەرەجەسىنە سايكەس, استانا قالاسى كولىك جانە جول-كولىك ينفراقۇرىلىمىن دامىتۋ باسقارماسى 21 شىلدەدەن باستاپ ەلوردانىڭ جانە قالا ماڭىنداعى ەلدى مەكەندەرگە قاتىنايتىن قوعامدىق كولىكتەر ءتاريفىنىڭ وزگەرەتىنىن حابارلايدى.
ادەتتەگى قالالىق جولاۋشىلاردى جانە جۇكتى تاسىمالداۋ كەزىندە ەلەكتروندىق جول ءجۇرۋ قۇجاتى ارقىلى تولەم جاسالسا – جولاقى 90 تەڭگە, قولما-قول اقشامەن تولەنسە – 180 تەڭگە. ال ەكسپرەسس جولاۋشىلاردى جانە جۇكتى تاسىمالداۋ كەزىندە ەلەكتروندىق جول ءجۇرۋ قۇجاتى ارقىلى جاسالعان تولەم 180 تەڭگە بولسا, قولما-قول اقشامەن تولەگەندەگى جولاقى قۇنى 250 تەڭگە بولىپ وزگەرتىلدى. سونىمەن قاتار, قالا ماڭىنا قاتىنايتىن اۆتوبۋستار جولاقىسى ەلەكتروندىق جول ءجۇرۋ قۇجاتى ارقىلى تولەم جاساعاندا 1 كيلومەترگە 8 تەڭگە بولسا, اقشالاي تولەم جاسالعاندا 1 كيلومەترگە 11,5 تەڭگە تولەنەدى.
ەگەر قوعامدىق كولىكتەگى ەلەكتروندى تولەم جۇيەسى بۇزىلعان جاعدايدا, ەلەكتروندىق كارتاسى بار جولاۋشى تەگىن جول جۇرۋگە قۇقىلى. ال قالالىق جانە قالا ماڭىنداعى ەلدى مەكەندەرگە قاتىنايتىن قوعامدىق كولىكتەردە 7-دەن 15 جاسقا دەيىنگى بالالارعا قر «اۆتوموبيل كولىگى تۋرالى» زاڭىنا سايكەس, جول ءجۇرۋ بيلەتىنىڭ تولىق قۇنىنىڭ ەلۋ پايىزىن عانا تولەۋ قاراستىرىلادى.
سونداي-اق, استانا قالاسى ءماسليحاتىنىڭ 2017 جىلعى 20 شىلدەدەگى شەشىمىنە سايكەس, جەڭىلدىك قاراستىرىلعان ازاماتتاردىڭ جەكەلەگەن ساناتتارىنا الەۋمەتتىك كومەك كورسەتۋ تارتىبىنە ساي قالالىق جولاۋشىلار كولىگىندە جول ءجۇرۋ قۇنىن تولەۋدەن بوساتۋ شەشىمى وزگەرىسسىز قالادى.
