ەلوردادا «2020-2021 جىلدارعا ارنالعان جۇمىسپەن قامتۋدىڭ جول كارتاسى» باعدارلاماسى اياسىندا 15253 جاڭا جۇمىس ورنىن قۇرۋ جوسپارلانعان. سونىڭ ەلۋ پايىزى قالانىڭ حالىقتى جۇمىسپەن قامتۋ ورتالىعى ارقىلى جۇرگىزىلەدى. وسى ۋاقىتقا دەيىن اتالمىش باعدارلاما بويىنشا 14 مىڭعا جۋىق ادام جۇمىس تاپتى. ونىڭ 7489-ى اتالعان ورتالىق جولداماسىمەن جۇمىسقا ورنالاستىرىلدى.
حالىقتى جۇمىسپەن قامتۋ ورتالىعىنىڭ حابارلاۋىنشا, بيىل ەلوردادا 151 ينفراقۇرىلىمدىق جوبانى جۇزەگە اسىرۋ جوسپارلانعان. قازىرگى تاڭدا 148 نىسان بويىنشا ءتيىستى جۇمىستار جۇرگىزىلىپ جاتىر. بۇل باعدارلاما اياسىندا جۇمىسسىز ازاماتتار مەكتەپتەر مەن اۋرۋحانالاردى, تۇرعىن ۇيلەردى جوندەۋگە, قۇرىلىسى جۇرگىزىلىپ جاتقان نەمەسە كۇردەلى, ورتاشا جانە اعىمداعى جوندەۋدى قاجەت ەتەتىن ينجەنەرلىك-كولىك ينفراقۇرىلىمىن قايتا جاڭارتۋعا جانە سالۋعا, كوگالداندىرۋ بويىنشا جۇمىستارعا تارتىلادى.
«جۇمىسپەن قامتۋدىڭ جول كارتاسى» باعدارلاماسىنا جۇمىسسىز رەتىندە تىركەۋدە تۇرعان نۇر-سۇلتان قالاسىنىڭ تۇرعىندارى, قالادا ۋاقىتشا تىركەلگەندەر, ينفراقۇرىلىمدىق جوبالاردى ىسكە اسىراتىن جۇمىس بەرۋشى-مەردىگەرلەر قاتىسا الادى.
جول كارتاسى بويىنشا بوس جۇمىس ورىندارى تۋرالى مالىمەتتەردى enbek.kz پورتالىندا كورۋگە بولادى.
