نۇر-سۇلتان قالاسىنىڭ ءماسليحاتىندا «AMANAT» پارتياسىنىڭ دەپۋتاتتىق فراكتسياسىنىڭ كەڭەيتىلگەن جيىنى ءوتتى. ەلوردا اكىمى, پارتيانىڭ قالالىق فيليالىنىڭ توراعاسى التاي كولگىنوۆتىڭ قاتىسۋىمەن وتكەن باسقوسۋدا «وزگەرىستەر جولى: ءاربىر ازاماتقا لايىقتى ءومىر!» جول كارتاسىن جۇزەگە اسىرۋ ماسەلەلەرى تالقىلاندى.
ەڭ الدىمەن جول كارتاسىن جۇزەگە اسىرۋ بويىنشا قۇرىلىس باسقارماسىنىڭ باسشىسى ارسەن جانعاسقانوۆ بايانداما جاسادى. ول قالاداعى كورنەكتى قۇرىلىس نىساندارىنىڭ ءبىرى – ق.مۇڭايتپاسوۆ اتىنداعى ستاديوننىڭ ورنىنا جاڭا سپورت كەشەنى سالىناتىنىن ءمالىم ەتتى. «بۇعان قوسا, بيىل 22 مىڭ ورىندىق 16 مەكتەپ جانە دارىگەرلەر مەن ورتا مەديتسينا قىزمەتكەرلەرىنە ارنالعان 2 جاتاقحانانىڭ قۇرىلىس جۇمىستارى جۇرگىزىلەدى دەپ جوسپارلاندى. «يلينكا» جانە «جەلەزنودوروجنىي» تۇرعىن ءۇي الاپتارىنداعى دەنە شىنىقتىرۋ-ساۋىقتىرۋ كەشەنىنىڭ قۇرىلىسى مەردىگەرلەردىڭ اۋىسۋىنا بايلانىستى قايتا جانداندى» دەدى باسقارما باسشىسى.
دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ يپپوتەراپيا ءادىسى ارقىلى ەرەكشە قاجەتتىلىكتەرى بار بالالاردى وڭالتۋعا ارنالعان ات سپورتى كەشەنىنىڭ قۇرىلىسى بويىنشا ەسەپ بەردى. كولىك جانە جول-كولىك ينفراقۇرىلىمىن دامىتۋ باسقارماسىنىڭ باسشىسى جانسۇلتان ساپارباەۆ «جەلەزنودوروجنىي», «دوستىق» جانە «ينتەرناتسيونالنىي» تۇرعىن الاپتارىنداعى جولدار مەن ينجەنەرلىك جەلىلەردى سالۋ تۋرالى باياندادى. اتالعان قۇرىلىس نىساندارىنا ۇلتتىق قوردان قاجەتتى مولشەردە قاراجات بولىنگەنىن, رەسۋرستارمەن قامتاماسىز ەتىلگەن سوڭ, قۇرىلىس جۇمىستارىنىڭ بىردەن باستاۋ الاتىنىن جەتكىزدى.
قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىسى ءاليا قوجاباەۆا 2023 جىلعا دەيىن ەلوردادا 123 شاقىرىمدىق ۆەلوسيپەد جولى سالىناتىنىن مالىمدەدى. ءبىلىم بەرۋ باسقارماسىنىڭ باسشىسى قاسىمحان سەنعازىۇلى ينكليۋزيۆتىك ءبىلىم بەرۋ تاقىرىبىنا ەرەكشە نازار اۋداردى. «ەلوردامىزدا ارنايى قورلاردىڭ كومەگىمەن, ءبىلىم وردالارىنىڭ ۇسىنىستارىمەن اشىلعان 5 رەسۋرستىق ورتالىق, اۋتيستىك سپەكترى بۇزىلعان بالالارعا ارنالعان 20 ينكليۋزيانى قولداۋ كابينەتى جانە سويلەۋ قابىلەتى بۇزىلعان بالالارعا ارنالعان 12 لوگوپۋنكت بار. جىل سايىن مەكتەپ بازاسىنداعى كابينەتتەر سانى كوبەيۋدە. سالىستىرمالى تۇردە ايتساق, وتكەن جىلى بارلىعى 15 كابينەت بولعان. ياعني جىلدان-جىلعا ەرەكشە قاجەتتىلىگى بالالارعا ارنالعان ءبىلىم ساپاسى مەن قولداۋ دەڭگەيى ۇلعايىپ كەلەدى. قازىرگى تاڭدا قالا مەكتەپتەرىندە 49 ارنايى پەداگوگ, 169 اسسيستەنت جۇمىس ىستەيدى. ينكليۋزيۆتى ءبىلىم بەرۋدى دامىتۋ جوسپارى قۇرىلدى» دەپ ءتۇسىندىردى ول ءوز سوزىندە.
باسقوسۋدىڭ سوڭىندا «AMANAT» پارتياسى قالالىق فيليالىنىڭ توراعاسى التاي كولگىنوۆ فراكتسيا دەپۋتاتتارىنا جول كارتاسى باعدارلاماسىنىڭ ءاربىر تارماعىن ەرەكشە باقىلاۋعا الۋدى جۇكتەپ, تەكسەرىس جۇمىستارىن تۇراقتى تۇردە جۇرگىزۋدى, ءىستىڭ ناتيجەسىن باق-تاردا جاريالاۋ ارقىلى حالىققا جەتكىزىپ وتىرۋدى تاپسىردى.
