جۋىردا ۇكىمەت وتىرىسىندا ەلىمىزدە جاستار جىلىن وتكىزۋگە قاتىستى جول كارتاسىنا ۇسىنىلعان تولىقتىرۋلار ماقۇلداندى. تۇڭعىش پرەزيدەنت – ەلباسى نۇرسۇلتان نازارباەۆ جاستار جىلىنىڭ رەسمي اشىلۋىندا بىرقاتار قاتىسۋشىلاردىڭ ۇسىنىس-تىلەكتەرىن تىڭداپ, ونى جول كارتاسىنا ەنگىزۋدى تاپسىرعانى ءمالىم. ەندى جول كارتاسىنا قانداي وزگەرىستەر ەنگىزىلگەنىن تارقاتىپ ايتايىق.
ەڭ الدىمەن, ءبىلىم جانە عىلىم مينيسترلىگىمەن بىرلەسەوتىرىپ, قۇجاتقا «ءوز قابىلەتىڭدى انىقتا!» اتتى جوبا قوسىلادى. بۇل جوبا جاستاردىڭ كاسىبي قابىلەتىن انىقتاۋعا مۇمكىندىك بەرەدى. ەلىمىزدىڭ ءار وڭىرىندە بۇركىتشىلەر ورتالىقتارى اشىلادى.
ەكىنشىدەن, جاستارعا ءوزىن-ءوزى قورعاۋعا قاتىستى تەگىن شەبەرلىك سىنىپتارى وتكىزىلەدى. مۇنداي دارىستەر جاستاردىڭ سپورتتىق كلۋبتارى اياسىندا جۇرگىزىلەدى. بۇعان دەيىن ءمالىم بولعانىنداي, ەلىمىزدەگى جوعارى وقۋ ورىندارى مەن كوللەدجدەرىمەن بىرلەسىپ, «ستۋدەنتتىك باستاما» اتتى جالپىرەسپۋبليكالىق ۆولونتەرلىك قوزعالىس قۇرىلادى. جاس ۆولونتەرلەر بازاسى مۇگەدەكتەرگە, قارتتارعا, جەتىمدەرگە, جالعىزباستى جاندار مەن ۇيسىزدەرگە كومەكتەسەدى.
ۇشىنشىدەن, وتاندىق مەدياسالانىڭ كەلەشەگى زور, تانىمال وكىلدەرىن تارتا وتىرىپ, قازاقستاننىڭ ۇلتتىق برەندىن ناسيحاتتاۋ مەن كورسەتۋدىڭ جاڭا قۇرالدارىن قالىپتاستىرۋ جوسپارلانىپ وتىر. بۇگىنگى تاڭدا جول كارتاسى بەس نەگىزگى باعىت بويىنشا 89 تارماقتان تۇرادى. نەگىزگى ءىس-شارالار: جۇمىس ىستەيتىن جاستاردى باسپانامەن قامتاماسىز ەتۋ, جاستاردى جۇمىسپەن قامتۋ, ءبىلىم بەرۋ مەن ۆولونتەرلىكتى دامىتۋ, جاستاردىڭ الەۋمەتتىك بەلسەندىلىگىن ارتتىرۋ, جاس وتباسىلاردى, جاستاردىڭ دەنساۋلىعىن, الەۋمەتتىك ينكليۋزيۆتىلىكتى قولداۋ سياقتى بەس باعىت بويىنشا جۇزەگە اسىرىلادى.
ماسەلەن, نۇر-سۇلتان, الماتى, شىمكەنت قالالارىندا سالىناتىن 1 مىڭ پاتەردى وندىرىستە, اۋىل شارۋاشىلىعىندا, بيۋدجەتتىك مەكەمەلەردە جۇمىس ىستەيتىن جاس ماماندار, عالىمدار, كاسىبىن اشقان ازاماتتار الادى. بۇل جەردە بالالارىنىڭ سانى, وتباسىنىڭ قۇرامى, ەرەكشە قاجەتتىلىگى بار بالالاردى تاربيەلەۋى ەسەپكە الىنادى. جاستاردى جۇمىسپەن قامتۋ ماقساتىندا «جاس كاسىپكەر» باعدارلاماسى ىسكە اسىرىلادى. ءۇش جىلدا 60 مىڭنان اسا جاستار كاسىپكەرلىك نەگىزدەرىن وقيدى. اۋىل جاستارىنا 15 مىڭ شاعىن نەسيە بەرۋ جوسپارلانعان. جاستاردىڭ جاڭا بيزنەس يدەيالارىن جۇزەگە اسىرۋعا 30 مىڭنان اسا مەملەكەتتىك گرانتتار بەرىلەدى. ءبىلىم بەرۋ مەن ۆولونتەرلىكتى دامىتۋ باعىتى بويىنشا «جاس مامان» جوباسى دايىندالۋدا. بۇل جوبا 100 يندۋستريالدىق جانە قىزمەت كورسەتۋ سالاسى ماماندىقتارىن دايارلاۋدى كوزدەيدى. ەلىمىزدەگى 20 ۋنيۆەرسيتەت پەن 180 كوللەدج بازاسىندا وتەتىن بۇل شاراعا 200 مىڭنان استام جاستار قاتىسادى. جوعارى وقۋ ورىندارى مەن كوللەدجدەر «اشىق ۋنيۆەرسيتەت» جوباسىنا دا قوسىلادى. سونداي-اق ىرگەلى جانە قولدانبالى زەرتتەۋلەردى گرانتتىق قارجىلاندىرۋ جىلىنا 3 ملرد تەڭگەگە ۇلعايادى. تاعى ءبىر جاعىمدى جاڭالىق, ۆولونتەرلىكپەن بەلسەندى تۇردە اينالىساتىن ستۋدەنتتەردىڭ شاكىرتاقىسى 30 پايىزعا كوبەيەدى.
پرەمەر-ءمينيستردىڭ ورىنباسارى گۇلشارا ابدىقالىقوۆا قازىرگى كەزدە سەناتتا قارالىپ جاتقان رەسپۋبليكالىق بيۋدجەتكە وزگەرىستەر ەنگىزۋ تۋرالى زاڭ جوباسىندا جاستار جىلىن وتكىزۋگە 24,6 ملرد تەڭگە قاراستىرىلعانىن ءمالىم ەتتى.
