ەلوردادا قالا اكىمىنىڭ ورىنباسارى, «استانا – ادالدىق الاڭى» جوباسىنىڭ كۋراتورى باقتيار ماكەننىڭ جەتەكشىلىگىمەن «جول ۇستىندەگى قاۋىپسىزدىكتىڭ كەشەندى ماسەلەلەرى» تاقىرىبىندا دوڭگەلەك ۇستەل ءوتتى.
دوڭگەلەك ۇستەلدىڭ باسىندا جولدىڭ قاۋىپسىزدىگى مەن جول ساپاسىن جاقسارتۋ, كولىك ينفراقۇرىلىمىن جەتىلدىرۋ, جاياۋ جۇرگىنشىلەر وتكەلدەرىنىڭ قولايلى تۇستاردان سالۋ, ت.ب. ماسەلەلەر قاراستىرىلدى.
– 2019 جىلى جول قاۋىپسىزدىگىن ساقتاۋ مۇنىڭ الدىنداعى جىلدارمەن سالىستىرعاندا جاقسارىپ كەلەدى, بىراق ونىڭ دەڭگەيى ءالى دە بولسا كوڭىل كونشىتپەيدى. سوندىقتان وسى باعىتتاعى الدىن الۋ جۇمىستارىن كۇشەيتە بەرۋگە مىندەتتىمىز, – دەدى باقتيار ماكەن.
قالاي بولعاندا دا جاياۋ جۇرگىنشىلەردىڭ قاتىسۋىمەن بولاتىن جول-كولىك وقيعالارى وتكىر پروبلەماعا اينالىپ وتىر. جىل باسىنان بەرى جول-كولىك وقيعاسىنان 2216 ادام زارداپ شەككەن, مۇنىڭ 426-سى – ءجاسوسپىرىم بالالار. 12 ادام قازا تاپقان. قايعىلى وقيعالاردىڭ كوبەيۋىنە بايلانىستى جۇرتشىلىقتىڭ ارىز-شاعىمدارى دا كوبەيگەن. ماسەلەن, جىل باسىنان IKOMEK-كە جول-كولىك ينفراقۇرىلىمىنا قاتىستى 19 552 ءوتىنىم-ارىز كەلىپ تۇسكەن. ونىڭ ىشىندە كوشەنى جارىقتاندىرۋ, باعدارشام, بەلگىلەر ورناتۋ, بەينەباقىلاۋ قىزمەتتەرىن ۇيىمداستىرۋ سياقتى سۇراقتار كوتەرىلگەن.
IKOMEK109 ورتالىعىنىڭ ديرەكتورى جاننات ءدۇبىروۆا جول-كولىك وقيعاسى ءجيى ورىن الاتىن بىرقاتار باعدارلاردى اتاپ ءوتتى. ولار: 303 اۆتوبۋس باعدارى – 5 وقيعا, № 50, 15 – اۆتوبۋس باعدارلارى – 5 وقيعا, № 9, 8 اۆتوبۋس باعدارلارى – 4 وقيعا.
قازىرگى كۇنى قالا بويىنشا 7 مىڭنان استام بەينەكامەرالار كولىك قوزعالىسىن باقىلاپ وتىرادى. بەينەباقىلاۋدىڭ ارقاسىندا كوپتەگەن جولدا ءجۇرۋ ەرەجەسىن بۇزۋشىلىقتارى اشىلدى. جەرگىلىكتى بيلىك وكىلدەرى كەلەسى جىلى بەينە كامەرالاردىڭ سانىن ارتتىراتىنىن جەتكىزدى.
