جاستار شاعىن اۋدانىنان باستالاتىن اسان قايعى كوشەسىندەگى نەبارى 300 مەتر جول شۇرق-تەسىك بولىپ جاتىر. سونىڭ سالدارىنان اۆتوكولىكتەر 1 مينۋتتا ءوتىپ كەتەتىن جەردەن 10-15 مينۋت كىدىرىپ, تاسباقانىڭ كۇيىن كەشۋدە. ال وسى جولدى جوندەۋگە اۆتوموبيل جولدارى باسقارماسى نەلىكتەن قۇلىقسىز بولىپ وتىر؟
ەلورداداعى نەگىزگى كوشەلەر تاقتايداي تەگىس بولعاندىقتان «استانادا جولدىڭ ماسەلەسى جوق شىعار» دەپ ويلاۋىمىز بەك مۇمكىن. ويتكەنى جىل سايىن باس قالانىڭ نەگىزگى جولدارى ءسۇرىلىپ تاستالىپ, ونىڭ ورنىنا جاڭادان اسفالت توسەلىپ جاتادى. الايدا استانانىڭ قاق ورتاسىنداعى شۇرق-تەسىك جولدى كورگەن كەزدە «اسپاننان كيىز جاۋسا, قۇلعا ۇلتاراق تا تيمەيدى» دەگەن قازاقتىڭ ماتەلى ەسكە ءتۇستى. ماسەلەن, اسان قايعى كوشەسىندەگى جول بىرنەشە جىلدان بەرى جوندەۋ كورمەي تۇر. ال اۆتوكولىك جۇرگىزۋشىلەرى بولسا, قالانىڭ قاق ورتاسىنداعى كوشەنىڭ نازاردان تىس قالىپ وتىرعانىنا قىنجىلىس بىلدىرەدى.
– وسى جولمەن كۇن سايىن بولماسا دا كۇنارا جۇرەمىن. وكىنىشكە قاراي, تاپ وسى كوشەگە كەلگەن كەزدە كىبىرتىكتەپ جۇرە الماي قالامىز. بۇل جولدىڭ كەمشىلىگى قىس مەزگىلىندە اسا بىلىنبەيتىن ەدى. سەبەبى قالىڭ قار قوتىر جولدىڭ تەسىگىن بىتەپ تاستاعان سوڭ, ءارى-بەرى قوزعالۋ قيىندىق تۋدىرمايتىن. ايتسە دە, كوكتەم كەلىپ, قار ەرىگەننەن كەيىن وسى جول قايتادان ويدىم-ويدىم بولىپ قالدى. وسىنىڭ كەسىرىنەن 1 مينۋتتا ءوتىپ كەتەتىن جەردەن 10-15 مينۋت تۇرىپ قالامىز.
بۇل – ءبىر. ەكىنشىدەن, جامان جولدىڭ سالدارىنان كولىكتەرىمىزدى جوندەۋ ورتالىعىنا اپارامىز. بۇل دا قالتاعا سالماق سالىپ تۇر, – دەيدى اقىلبەك بەيسەنبەك ەسىمدى جۇرگىزۋشى.
كەز كەلگەن جۇرگىزۋشىنى توقتاتىپ «اسان قايعى كوشەسىندەگى جولدىڭ ساپاسى قالاي؟» دەپ سۇراساڭىز «جىلاپ» قويا بەرەدى. سونداي-اق, وسى جولدىڭ بويىندا تۇراتىن ازاماتتار دا جولدىڭ تەز ارادا جوندەلگەنىن قالاپ وتىر. الايدا ولار جول جوندەلگەن جاعدايدا جۇرگىزۋشىلەر جىلدامدىقتى شامادان تىس اسىرىپ, بالالارعا قاۋىپ ءتوندىرۋى مۇمكىن دەگەن پىكىردە.
– ارينە, ءبىز شۇرق-تەسىك جولدىڭ جوندەلگەنىن قالايمىز. الايدا تەپ-تەگىس جول سالىنعان سوڭ جۇرگىزۋشىلەر جىلدامدىقتى شامادان تىس اسىرىپ جىبەرمەي مە ەكەن دەپ الاڭداپ وتىرمىن. سەبەبى قالامىزدا اۆتوكولىككە وتىرسا, جان بالاسىنا جول بەرمەي كەتەتىن جۇرگىزۋشىلەر جەتەرلىك. مىنە, وسى ماسەلەنى الدىن الا ەسكەرىپ, جولعا جاساندى كەدەرگىلەر قويىلسا جاقسى بولار ەدى. ويتكەنى كەيبىر ءجۇرگىزۋشىلەردىڭ جىلدامدىقتى ارتتىرىپ, بالالارعا قاۋىپ ءتوندىرۋى مۇمكىن. بالالار تۇرماق, كەي كەزدە ۇلكەن كىسىلەردىڭ ءوزى جولدان وتە الماي جاتادى, – دەيدى ازامات ورازالين.
شىنىندا دا, تۇرعىنداردىڭ الاڭداۋىنا نەگىز بار. ويتكەنى وقىس وقيعا استانادا ءجيى بولماسا دا, اندا-ساندا ورىن الىپ وتىرادى. سوندىقتان دا جول جوندەلگەننەن كەيىن جاساندى كەدەرگىلەر قويىلسا, نۇر ۇستىنە نۇر بولار ەدى. ال 300 مەتر جولدىڭ جىرىن اۆتوموبيل جولدارى باسقارماسى جىلدان جىلعا قالدىرماي شەشىپ تاستاسا بولار ەدى. سەبەبى استانانىڭ قاق ورتاسىنداعى كوشەنىڭ سىنى وزگە جۇمىستارعا كولەڭكە كەلتىرىپ تۇر.
سەرىك قۇدايبەرگەنۇلى,
«استانا اقشامى»
