قالالىق ءماسليحاتتىڭ وتىز توعىزىنشى كەزەكتەن تىس سەسسياسىندا قوعامدىق كولىكتەردەگى جولاقى قۇنىنىڭ قىمباتتاۋ مۇمكىندىگى قاراستىرىلدى.
وسىعان وراي قالالىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى راشيد امانجولوۆ بايانداما جاسادى. جولاۋشىلار مەن جۇكتەردى اۆتوموبيلمەن تۇراقتى تاسىمالداۋداعى كەيبىر ماسەلەلەرگە توقتالا كەلە, باسقارما باسشىسى سوڭعى التى جىلدا جانار-جاعارماي باعاسىنىڭ ەكى ەسەگە دەيىن ءوسىپ, اۆتوكولىككە تەحنيكالىق قىزمەت كورسەتۋ قۇنى قىمباتتاعاندا, جولاقى ءتاريفى ءبىر دەڭگەيدە تۇراقتى ۇستالعانىن, سونىڭ سالدارىنان قازىرگى تاڭدا تاسىمالداۋشىلار شىعىندارىن وتەي الماي وتىرعانىن جەتكىزدى.
«وسى ماسەلەنى شەشۋ ءۇشىن ارنايى كوميسسيا قۇرىلدى. بارلىق قاجەتتى ۇدەرىستەر مەن ەسەپتەر جۇرگىزىلدى. ءناتيجەسىندە قالاداعى قوعامدىق كولىكتە جول ءجۇرۋ قۇنى ەرەسەكتەرگە 90 تەڭگە جانە بالالارعا 40 تەڭگە رەتىندە بەلگىلەندى» دەدى ر.امانجولوۆ.
قازىرگى ۋاقىتتا جولاۋشىلار تاسىمالىمەن قالالىق 50 باعىتتاعى 8 كومپانيا اينالىسىپ كەلەدى. وندا بارلىعى 890 اۆتوبۋس شوعىرلانعان. جەلىگە جاڭا اۆتوبۋستار شىعارۋ قاجەتتىگى دە تۋىنداپ وتىر. بۇل رەتتە «ەلەكتروندى بيلەت» جاڭا جۇيەسىن ەنگىزۋ جوباسى ازىرلەنۋدە.
تالقىلانعان ماسەلەگە وراي, دەپۋتاتتار ن.مەششەرياكوۆ, س.جاقسىبەكوۆ, ت.ورازاقوۆ, ز.شيبكەنوۆ پىكىر ءبىلدىردى. قوعامدىق كولىك قىزمەتىنىڭ قالاداعى وزەكتى ماسەلەلەردىڭ بىرىنەن سانالاتىنىن تىلگە تيەك ەتكەن ميراس شەكەنوۆ الداعى ۋاقىتتا جۇرگىزۋشىلەردىڭ جالاقىسىن 20-30 پايىزعا ارتتىرۋدى ۇسىنسا, «ادىلەت» تۇتىنۋشىلار قۇقىعىن قورعاۋ قوعامدىق بىرلەستىگىنىڭ توراعاسى قابىكەن زاكاريانوۆ بۇل سالادا كوندۋكتورلارسىز جۇمىس ىستەۋگە كوشۋدىڭ تيىمدىلىگىن العا تارتتى. قالالىق ءماسليحاتتىڭ حاتشىسى سانسىزباي ەسىلوۆ بولسا ەلوردا باسقا وڭىرلەرگە بارلىق جاعىنان ۇلگى بولۋى ءۇشىن قوعامدىق كولىك قىزمەتىنىڭ ساپاسىن ارتتىرۋ ماقساتىندا جولاقىنىڭ قىمباتتاۋىن قولدايتىنىن اتاپ ءوتتى.
سونىمەن بىرگە سەسسيا بارىسىندا استانا قالاسى ءماسليحاتىنىڭ 2013 جىلعى 10 قىركۇيەكتەگى «استانا قالاسىندا جەر ۋچاسكەلەرىن بەرۋ جونىندەگى كوميسسيانىڭ قۇرامى تۋرالى» شەشىمىنە وزگەرىستەر ەنگىزىلىپ, مەملەكەت مۇقتاجى ءۇشىن جەر ۋچاسكەلەرىن الۋعا بايلانىستى جەر ۋچاسكەلەرىن نەمەسە جىلجىمايتىن وزگە مۇلىكتەردى ساتىپ الۋ تۋرالى شارتتاردىڭ جوبالارى كەلىسىلدى. سونداي-اق, استانا قالاسى اكىمدىگىنىڭ جانىنداعى كاسىپكەرلىك ماسەلەلەرى ءجونىندەگى ساراپتامالىق كەڭەس پەن استانا قالاسىنىڭ اگروونەركاسىپتىك كەشەنى سۋبەكتىسى ينۆەستيتسيالىق سالىنىمدار كەزىندە جۇمساعان شىعىستارىنىڭ ءبىر بولىگىنىڭ ورنىن تولتىرۋ بويىنشا سۋبسيديالاۋ ماسەلەلەرى جونىندەگى كوميسسيانىڭ قۇرامى وزگەرتىلدى.
گۇلبارشىن وكەشقىزى
