كەشە استانا قالاسى ءماسليحاتىنىڭ قۇرىلىس, ەكولوگيا, كولىك جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ وتىرىسىندا «استانا LRT» جشس باسقارماسىنىڭ توراعاسى بەكمىرزا يگەنبەردينوۆ قوعامدىق كولىكتەگى جولاقى تاريفىنە قاتىستى ماسەلەنى ءتۇسىندىردى.
الدىمەن ول ءتاريفتىڭ وزگەرۋى اۆتوبۋستا جەڭىلدىكپەن جۇرەتىن ادامدارعا ەش اسەر ەتپەيتىنىن ايتا كەلىپ, ءارتۇرلى زەرتتەۋ جاساۋ ناتيجەسىندە ەسەپتىك تاريف بويىنشا 198 تەڭگەگە توقتاعاندارىن جەتكىزدى. سارالانعان تاريف قوعامدىق كولىكتە كارتامەن جۇرەتىندەرگە بۇرىنعىسىنشا 90 تەڭگە بولىپ قالاتىنىن, كارتانى پايدالانعىسى كەلمەيتىندەر 180 تەڭگە تولەيتىنىن ايتىپ ءوتتى.
«بۇل شاراعا قولما-قول اقشانى كولەڭكەلى اينالىمنان شىعارۋ ءۇشىن بارىپ وتىرمىز. وسىدان كەيىن ناقتى جولاۋشىلار اعىمىن انىقتايمىز. قالا ءوسىپ جاتىر. ءبىر جەردەن ەكىنشى جەرگە جەتۋ ءۇشىن كەيدە اۆتوبۋس اۋىستىرۋعا تۋرا كەلەدى. سول ۋاقىتتا كولىك كارتاسى تيىمدىلىگىن كورسەتەدى. اۆتوبۋس اۋىستىرعاندا جولاۋشى شىعىندانبايدى. سارالانعان ءتاريفتى ەنگىزەردە الماتى قالاسىنىڭ تاجىريبەسىن زەرتتەدىك. بىلتىر بۇل شاھاردا «وڭاي» كارتاسى ەنگىزىلگەندە بىرقاتار تۇسىنىسپەۋشىلىكتەر تۋدى. الايدا ءۇش اي وتكەن سوڭ جولاۋشىلاردىڭ 98 پايىزى كارتالاردى پايدالانا باستاعان. بۇل – وتە جاقسى كورسەتكىش» دەدى ب.يگەنبەردينوۆ.
بايانداماشى «ەكسپرەسس» باعىتتاردا كارتا بويىنشا جولاقىنى 180 تەڭگەگە, قولما-قول اقشامەن 250 تەڭگەگە كوتەرۋدى ۇسىنىپ وتىرعاندارىن جەتكىزدى. ال قالا ماڭىنداعى باعىتتاردا كارتامەن جۇرگەندە تاريف بۇرىنعىشا قالىپ, قولما-قول اقشامەن تولەنگەندە باعا ەكى ەسە كوتەرىلمەك. ءماسليحات دەپۋتاتتارى بۇدان سوڭ «ەكسپرەسس» باعىتتار جولاۋشىلاردان ايىرىلا ما دەگەن الاڭداۋشىلىق ءبىلدىردى. ءتاريفتى وسىرەردەن بۇرىن حالىققا ونىڭ سەبەبىن, ارتىقشىلىقتارىن ءتۇسىندىرۋ قاجەتتىگىنە نازار اۋداردى.
امانعالي قالجانوۆ
بارلىعى جاپپاي كارتانى پايدالانسىن دەگەن ويمەن ەنگىزىلمەك بولعانى عوي…