اقمولا-استانانىڭ ابىزىنداي بولعان قالامى جۇيرىك قالامگەر, قازاقستاننىڭ ەڭبەك سىڭىرگەن قايراتكەرى نۇرعوجا وراز دۇنيەدەن وزعاندا قالامداس ءىنىسى, مادەنيەت قايراتكەرى سماعۇل راحىمبەك قالاي كۇيزەلگەنى ەسىمىزدە. نۇرعوجا اقىننىڭ ومىردەن وتكەنىنە جىل تولعاندا گازەتىمىزدىڭ بەتىندە ساعىنىشتى ءسوزىن دە ارناپ ەدى. «استانا اقشامىنىڭ» تۇراقتى اۆتورى بولعان سماعۇل اعانىڭ وزىنەن بىلتىر كوز جازىپ قالدىق. سودان بەرى جىل اينالىپ كەلدى.
بىرنەشە جىر جيناقتارىنىڭ, «ارۋ مەن ارلان», «كوڭىل شۋاعى», «تەمىر تورداعى تىرشىلىك», «ايدىنداعى اق جەلكەن», ت.ب. پروزالىق كىتاپتاردىڭ اۆتورى, ءبىرتالاي پروزالىق, پوەزيالىق دۇنيەلەردى انا تىلىمىزدە سويلەتكەن شەبەر اۋدارماشى, ءوزىنىڭ سانالى عۇمىرىنىڭ 42 جىلىن تەلەۆيزياعا ارناپ, تالاي تەلەحيكايالار مەن تەلەحابارلاردىڭ شوعىرىن جاساعان تانىمال قالامگەر, قازاقستان جۋرناليستەر وداعىنىڭ باۋبەك بۇلقىشەۆ اتىنداعى سىيلىعىنىڭ لاۋرەاتى اتانعان اعانىڭ اسىل بەينەسى جادىمىزدا. قالامگەردىڭ قاناتتاس, قالامدار دوستارى دا بۇگىندەرى ونى ساعىنىشپەن ەسكە الادى. سولاردىڭ ءبىرى – قازاقستان جازۋشىلار وداعىنىڭ مۇشەسى تورتاي سادۋاقاس تاياۋدا رەداكتسيامىزعا سوقتى.
«تۋعان جەردىڭ تاريحى, تۋعان ەلدىڭ مايتالمان تۇلەكتەرى تۋرالى تالاي اسەرلى سىر شەرتكەن, اقمولا مەن استانانىڭ ارمانى مەن اڭسارىن استاستىرا زەردەلەپ وتكەن قارىمدى قالامگەر, بەلگىلى جازۋشى, اقىن سماعۇل راحىمبەك باۋىرىمىز ۇلكەنگە ءىلتيپاتتى ءىنى, كىشىگە باۋىرمال اعا اتانىپ, جاقسى ۇرپاق ءوسىرىپ, ۇلگىلى وتباسى يەسى بولا ءبىلدى. تاعدىردىڭ جازۋىمەن ءوزىنىڭ سىرلى سازدارىنداي ساعىنىشقا اينالىپ بارا جاتقان سماعۇل اقىننىڭ يمانى سالامات بولىپ, سىرلى سوزدەرى ەل جادىنان شىقپاي, وشپەس رۋحى تۋعان-تۋىس, دوس-جاران, ۇرپاعىمەن بىرگە جاساي بەرسىن دەپ تىلەيمىن» دەگەن تورتاي اقىن تومەندەگى جىرىن ۇسىندى.
جىل وزدى سەن كەتكەلى, سماعۇلىم,
دوس-جاران سەنى ويلايدى, ءسىرا بۇگىن;
جۇراتقا جىلى-جىلى تىلەك قوسقان,
قۇلاقتا قوڭىر مايدا تۇرادى ءۇنىڭ!..
جان ەدىڭ ءجۇزىڭ جىلى, ءسوزىڭ مايدا,
جارقىراپ جۇرگەن سول ءبىر كەزىڭ قايدا؟!.
تىرلىكتە ۇساقتىققا ءمان بەرمەگەن,
قول سوزعان ءمارت ەدىڭ عوي ءوزىڭ دە ايعا!..
جاسىڭنان التىن وزەك بولعان جىرعا,
كۇمبىرلەپ كەۋدەڭ سودان تولعان سىرعا;
شارق ۇرعان ءومىر – تەڭىز تولقىنىنداي,
قوندى ما اسىل رۋحىڭ قورعالجىنعا؟!.
بۇتاعىن بايتەرەكتىڭ قىرقا كەسكەن,
جالعاننىڭ شىقپايدى عوي بۇرقاعى ەستەن;
سىر شەرتىپ ەلگە جىرىڭ باياعىداي,
ايتەۋىر جانعا مەدەۋ ۇرپاق وسكەن!..
ءبىز, پەندە جۇرسەك تە ءالى تىراشتانا,
اقىننىڭ بۇل دا بالكىم سىر اشقانى, ءا؟
ءناپسىسىن بىرەۋ تىيماي, بىرەۋ قيماي,
قۇلشىنىپ كەلەر كۇنگە تۇر استانا!..
قالعىماي, قايران ۋاقىت, ۇرشى دابىل,
اق جولمەن تالپىنعان قىز, قۇلشىنعان ۇل;
ۋاقىتپەن بىرگە جاساپ اقىن رۋحى,
جاتتالار جادىندا ەلدىڭ جىر – سماعۇل!..
