باس قالادا اۆتوكولىك جولدارىنىڭ قۇرىلىسىندا جەتىستىكتەر كوپ بولسا, كەمشىلىكتەر دە از ەمەس. استانا قالالىق ءماسليحاتىنىڭ دەپۋتاتى يرينا مانجانوۆا وسىنداي پىكىردە. ءماسليحاتتىڭ قۇرىلىس, ەكولوگيا, كولىك جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ وتىرىسىندا ءوز ويىن جەتكىزگەن ول ءسوزىن ناقتى مىسالدارمەن ادىپتەدى. كوميسسيا مۇشەلەرى الدىمەن قالالىق اۆتوموبيل جولدارى باسقارماسىنىڭ باسشىسى اسحات قاراعويشيننىڭ ەسەبىن تىڭدادى.
باسقارما باسشىسىنىڭ ايتۋىنشا, بيىل جول-كولىك ينفراقۇرىلىمىن دامىتۋعا رەسپۋبليكالىق بيۋدجەت پەن جەرگىلىكتى بيۋدجەتتەن ميللياردتاعان قارجى ءبولىندى. بولىنگەن قارجىنىڭ ەسەبىنەن بۇگىنگى كۇنگە ۇزىندىعى 23,4 شاقىرىمدى قۇرايتىن 11 كوشەنىڭ قۇرىلىسى اياقتالدى. كىشى اينالما جول قۇرىلىسىنىڭ شەڭبەرىندە ابىلاي حان داڭعىلى مەن ر.قوشقارباەۆ كوشەسىنىڭ قيىلىسىندا جولايرىق قۇرىلىسى جاقىندا اياقتالماق. جالپى
العاندا, بيىل قوس كوپىردىڭ قۇرىلىسى باستالىپ, 19 كوشەدە قۇرىلىس جالعاسۋدا.
بۇعان قوسا, جالپى ۇزىندىعى
64,2 شاقىرىمدى قۇرايتىن قالانىڭ 104 كوشەسىندە ورتاشا جوندەۋ جۇرگىزىلدى. ونىڭ ىشىندە 6 تۇرعىن الابى بار. 55 كوشەگە اسفالت توسەلدى.
يرينا مانجانوۆا بولسا جولدار قۇرىلىسىنىڭ ساپاسىنا نازار اۋداردى. سونىڭ ىشىندە №85 كوشەگە ەرەكشە نازار اۋداردى. سونداي-اق, دەپۋتات «سوتسيۋم» تۇرعىن ءۇي كەشەنىنە اپاراتىن جانە وسى ءۇيدىڭ اۋلاسىنداعى جولعا, قاراتال, ا.جۇبانوۆ كوشەلەرىندەگى, كوكتال-2 كەنتىندەگى جولداردىڭ جاعدايىنا كوڭىلى تولمايتىنىن ايتتى. ونىڭ سوزىنشە, جاڭا دەپ سانالاتىن سول جاعالاۋدىڭ وزىندە كەيبىر جولدار سىن كوتەرمەيدى. ماسەلەن, «موسكۆا» بيزنەس ورتالىعى ماڭايىنداعى جولعا قاتىستى سونى ايتۋعا بولادى.
اسحات قاراعويشيننىڭ سوزىنشە, قارجىلاندىرۋ جاعدايىنا بايلانىستى ءبىراز جولدىڭ قۇرىلىسى كەلەسى جىلى باستالۋى ءتيىس. اتاپ ايتساق, الداعى جىلى ينتەرناتسيونالنىي, ميچۋرينو تۇرعىن الاپتارىندا ينجەنەرلىك جەلىلەر مەن جولداردى سالۋ جوباسىنا تۇزەتۋلەر ەنگىزىلمەك. رەسپۋبليكالىق بيۋدجەت ناقتىلانعاندا, جولداردىڭ قۇرىلىسىنا قوسىمشا قارجى سۇراۋ دا جوسپارلانۋدا.
امانعالي قالجانوۆ
