ەلوردادا كوكتەمگى جۇگىرۋ ءىس-شاراسى ءوتتى. ترياتلون ساياباعىندا 500 اۋەسقوي جۇگىرۋشى جارىس جولىنا شىقتى.
سوڭعى جىلدارى ەلوردادا بۇقارالىق سپورتقا قاتىسۋشىلار سانى ارتىپ كەلەدى. سونداي كوپشىلىككە ارنالعان سپورتتىق ءىس-شارانىڭ ءبىرى «Astana run» جوباسى اياسىندا ۇيىمداستىرىلعان كوكتەمگى جۇگىرۋ جارىسى بولدى. ەڭ باستىسى – ءىس-شاراعا قاتىسقان استانالىقتار جۇگىرۋ ارقىلى ءبىر-بىرىمەن تانىسىپ قانا قويماي, دەنساۋلىقتارىن شىڭداپ, بوي سەرگىتىپ, كوڭىلدەرىن كوتەرىپ قايتتى. ءاربىر قاتىسۋشىعا قالانىڭ سانىنە اينالعان عيماراتتارى, ساۋلەتتەرى بەينەلەنگەن مەدال بەرىلدى. شىن مانىندە كوكتەمگى جۇگىرۋ ەلوردانىڭ ءبىر ترەندىنە اينالىپ بارا جاتقانىن كورسەتتى.
«Astana run – 4 كەزەڭنەن تۇراتىن ءارى قالانىڭ ءتۇرلى جەرىندە وتەتىن ەرەكشە سايىس. كەيىنگى جىلدارى استانا كوشىپ كەلۋشىلەردىڭ سانى بويىنشا كوشباسشىلاردىڭ قاتارىنا كىرەدى. سوندىقتان ءداستۇرلى باسەكەمىزدىڭ ءار كەزەڭىندە شامامەن 30 پايىز قاتىسۋشى ءبىرىنشى رەت قاتىسادى. ولار تەك جۇگىرىپ قانا قويماي, حوببيىنە سايكەس ادامدارمەن تانىسىپ, قالاعا تەز ءسىڭىسىپ كەتەدى» دەيدى جارىس ۇيىمداستىرۋشىسى جانات قوجاحمەتوۆ.
«2019 جىلدان كەيىنگى رەسمي العاشقى جارىسىم – بۇل. سالىستىرمالى تۇردە جۇگىرۋ سوڭعى كەزدە ترەندكە اينالدى. الايدا وسىنداي ءۇردىس مونوقالالاردا دا جالعاسىن تاپسا ەكەن دەيمىن. سەبەبى كىشى قالالاردا جۇگىرۋ, ۆەلوسيپەد جۇرگىزۋ ءالى سالاۋاتتى ءومىردىڭ ءبىر بولشەگى رەتىندە تولىققاندى سانالمايدى» دەدى اسىل ەسىمدى قاتىسۋشى.
جالپى «Astana run» جۇگىرۋ جوباسى 4 كەزەڭدە وتەدى. العاشقى كوكتەمگى جۇگىرۋگە 18-29, 30-39, 40-49, 50-59, 60 جاستان جوعارى ساناتتاعى ادامدار 5 شاقىرىمعا جۇگىرسە, 10-17 جاستاعى جاسوسپىرىمدەر 1 شاقىرىمعا, ال 3-9 جاس ارالىعىنداعى بالالار 400 مەترگە جۇگىردى. اۋەسقوي جۇگىرۋشىلەر ەندى جازعى, كۇزگى جانە قىسقى جۇگىرۋ مەرەكەلەرىن كۇتەدى.
