«نۇر وتان» پارتياسى قالالىق فيليالىندا دەپۋتتاتتىق فراكتسيا جۇمىسىنىڭ كەزەكتى وتىرىسى ءوتتى. كۇن تارتىبىندە «جۇمىسپەن قامتۋدىڭ جول كارتاسى – 2020» باعدارلاماسى جانە ەڭبەك سالاسىنداعى زاڭدىق قۇجاتتاردىڭ ورىندالۋ بارىسى تالقىلاندى.
بۇل ماسەلەلەر «ءساتتى قادام», «كەدەرگىسىز كەلەشەك» اتتى پارتيا جوبالارىن جۇزەگە اسىرۋ اياسىندا قاراستىرىلىپ وتىر.
جيىننىڭ الدىندا «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆ پارتيا مۇشەلەرىنە «نۇر وتاننىڭ» جاڭا ۇلگىدەگى پارتيالىق بيلەتىن تابىس ەتتى.
بۇدان كەيىن كۇن تارتىبىنە كوشكەن جيىن قاتىسۋشىلارى الدىمەن قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى الما التىباەۆانىڭ ەلوردالىقتاردى جۇمىسپەن قامتۋ جونىندەگى بايانداماسىن تىڭدادى. بايانداماشىنىڭ ايتۋىنشا, بىلتىر «جۇمىسپەن قامتۋدىڭ جول كارتاسى-2020» باعدارلاماسى وقىتۋ مەن جۇمىسقا ورنالاستىرۋعا جاعداي جاساۋ باعىتىندا جۇزەگە اسىرىلعان. 2013 جىلى باعدارلاماعا قاتىسۋعا 952 ادام ءوتىنىش بەرسە, ونىڭ 61 پايىزى ايەلدەر ەكەن. ال, باعدارلاما شەڭبەرىندە ەڭبەك نارىعىنداعى جۇمىس كۇشىنىڭ باسەكەگە قابىلەتتىلىگىن ارتتىرۋ جانە ساپانى كوتەرۋ ماقساتىندا 387 ادام وقىتىلعان. سوىڭ 76-سى بۇرىن-سوڭدى ەشقانداي ماماندىق الماعان. قايتا دايارلاۋدان 110 ادام ءوتىپ, جاڭا ماماندىققا يە بولسا, 65 ادام بىلىكتىلىگىن جەتىلدىرگەن.
كاسىبي وقىتۋ قالالىق ءبىلىم مەكەمەلەرىندە جۇرگىزىلگەن. باعدارلاماعا قاتىسۋشىلار ەلەكترمونتەر, دانەكەرلەۋشى, جوندەۋشى, اسپاز, بالاباقشا تاربيەشىسى, گيد-ەكسكۋرسوۆود سىندى قالاعا كەرەكتى ماماندىقتاردى الىپ شىققان.
باسقارما باسشىسى باعدارلامانىڭ جىل باسىنان بەرگى جۇزەگە اسىرىلۋ بارىسىنا دا توقتالدى. بيىل باعدارلاما ەكى باعىت بويىنشا ىسكە اسىرىلا باستاپتى: ءبىرىنشىسى – وقىتۋ جانە جۇمىسقا ورنالاسۋعا قول ۇشىن بەرۋ بولسا ء(ۇشىنشى باعىت), ەكىنشىسى – ينفراقۇرىلىمدى جانە تۇرعىن ءۇي-كوممۋنالدىق شارۋاشىلىقتى دامىتۋ ەسەبىنەن جۇمىسپەن قامتۋ ء(بىرىنشى باعىت).
ءۇشىنشى باعىتتى جۇزەگە اسىرۋعا 215 215, 0 مىڭ تەڭگە بولىنگەن. جىل باسىنان بەرى باعدارلاماعا قاتىسۋعا 545 ادام نيەت بىلدىرگەن. سونىڭ 70 پايىزى ايەلدەر بولسا, 56 پايىزى 29 جاسقا دەيىنگى جاستار ەكەن. وسى جىلى كاسىبي وقىتۋمەن 1 مىڭ ادامدى قامتۋ كوزدەلىپ وتىر. بۇگىندە الەۋمەتتىك جۇمىس ورنى مەن جاستار پراكتيكاسىنا 74 ادام جىبەرىلگەن. سونداي-اق, 78 ۇيىممەن كەلىسىمشارت جاسالىپتى.
جالپى, جىل باسىنان بەرى باعدارلاما بويىنشا 166 جان جۇمىسقا ورنالاسقان.
الما التىباەۆا جىل سوڭىنا دەيىن باعدارلاماعا بولىنگەن قاراجات تولىق يگەرىلىپ, ونىڭ بارلىق مىندەتتەرى ورىندالاتىنىن جەتكىزدى.
«نۇر وتان» قالالىق فيليالىنىڭ دەپۋتاتتىق فراكتسياسىندا قارالعان ەكىنشى ماسەلە بويىنشا استانا قالاسى ەڭبەك ينسپەكتسياسى باسقارماسىنىڭ باسشىسى ەرلان وسپانوۆ بايانداما جاسادى. ول 2014 جىلدىڭ باسىنان بەرى ەڭبەك زاڭنامالارىنىڭ ساقتالۋىن قاداعالاۋ بويىنشا 141 تەكسەرۋ جۇرگىزىلگەنىن ايتتى. ۇيىمدار مەن كاسىپورىنداردى تەكسەرۋ كەزىندە 152 زاڭ بۇزۋشىلىق دەرەگى انىقتالعان. تەكسەرۋ ناتيجەسىندە 120 لاۋازىمدى جانە زاڭدى تۇلعا 17,6 ملن تەڭگە كولەمىندە اكىمشىلىك جاۋاپكەرشىلىككە تارتىلىپتى.
جۇمىسشىلاردىڭ وندىرىستىك جاراقات الۋى توڭىرەگىندە ءسوز قوزعاعان باسقارما باسشىسى 2014 جىلدىڭ باسىنان بەرى استانا قالاسىنداعى ءوندىرىس ورىندارىندا 45 وقىس وقيعا بولىپ, 65 ادام زارداپ شەككەنىن اتاپ ءوتتى. ون ءۇش ادام قازا بولىپ, 44-ءى اۋىر دەنە جاراقاتىن العان. بۇل وقيعالاردىڭ 95 پايىزى قۇرىلىس الاڭدارىندا بولىپتى.
بۇدان كەيىن ەرلان وسپانوۆ وندىرىستىك جاراقات الۋ وقيعالارىنا بايلانىستى قورىتىندى جاساپ, بىرقاتار زاڭدارعا وزگەرىستەر ەنگىزۋ قاجەتتىگىن جەتكىزدى.
جيىندا جەرگىلىكتى اتقارۋشى ورگاندار باسشىلارى مەن كاسىپوداق جەتەكشىلەرى, قالالىق ءماسليحات دەپۋتاتتارى دا ءسوز سويلەپ, كۇن تارتىبىندەگى ماسەلەلەرگە بايلانىستى, ۇسىنىس-پىكىرلەرىن ورتاعا سالدى.
