جازدا جول-قۇرىلىس جۇمىستارى جانداناتىنى بەلگىلى. بيىل ەلوردادا 120 كم جول جوندەلەدى, سونىڭ ىشىندە 46,4 كم جول سالىنىپ, رەتكە كەلتىرىلەدى; ونىڭ 19,2 شاقىرىمى قالاعا قوسىلعان ەلدى مەكەندەرگە تيەسىلى.
وسىعان وراي 30 شىلدەگە دەيىن جانىبەك تارحان كوشەسىنىڭ (برۋسيلوۆسكي – اسان قايعى كوشەلەرىنىڭ ارالىعى), كۇيشى دينا كوشەسىنىڭ (توقپانوۆ كوشەسى – تاۋەلسىزدىك داڭعىلى, سونداي-اق جۇماباەۆ – ابىلاي حان داڭعىلى ارالىعى) بويىمەن اۆتوكولىكتەردىڭ ءجۇرۋى توقتاتىلادى.
جەلتوقسان كوشەسى بويىندا دا قايتا جوندەۋ جۇمىستارى قولعا الىناتىندىقتان, 16 مامىر – 1 شىلدە ارالىعىندا ونىڭ بوگەنباي داڭعىلىنان ماسكەۋ كوشەسىنە دەيىنگى بولىگىندە كولىك قاتىناسى شەكتەلەدى.
سونداي-اق, جول تابانىن توسەۋگە بايلانىستى 14-18 مامىر كۇندەرى – تۇران كوشەسىنىڭ قوناەۆ كوشەسىنەن دوستىق كوشەسىنە دەيىنگى بولىگى; 20-25 مامىردا – 2-جەو-عا باراتىن جولدىڭ سوفيەۆكا تاس جولىنان 2-جەو بۇرىلىسىنا دەيىنگى بولىگى; 10-15 ماۋسىمدا ەسەنبەرلين كوشەسىنىڭ بەيبىتشىلىك كوشەسىنەن جەڭىس داڭعىلىنا دەيىنگى بولىگى دە جابىلادى.
قارا كۇزگە دەيىن جول جوندەۋ قاربالاسى جالعاسا بەرەدى. سوندىقتان, قالانىڭ باسقا كوشەلەرىندە دە اۆتوكولىكتەردىڭ ءجۇرىپ-تۇرۋىنا تىيىم سالىنىپ, ۋاقىتشا ىركىلىس بولاتىنى, ايتپاسا دا تۇسىنىكتى.
ر.مالىمۇلى
