ەلىمىزدىڭ دامۋ لوكوموتيۆىنە اينالعان استانادا ىسكەرلىك بايلانىستاردى نىعايتىپ, ينۆەستيتسيالىق جوبالاردى جۇزەگە اسىرۋعا مۇمكىندىكتەر كوپ.
كەيىنگى جىلدارى ەلىمىز ىسكەرلىك ورتانى كوتەرمەلەپ, كاسىپكەرلىكتى قولداۋعا, قولايلى ينۆەستيتسيالىق احۋال قالىپتاستىرۋعا ايرىقشا ماڭىز بەرىپ كەلەدى. بيزنەس-باستامالاردى جۇزەگە اسىرۋعا ىڭعايلى جاعدايلار جاسالىپ, كاسىپ اشۋعا رۇقسات بەرەتىن جۇيەلەر وڭتايلاندىرىلا باستاعان. ءارى قارقىندى دامىپ كەلە جاتقان شاھارعا ينۆەستيتسيا سالعاننىڭ دا پايداسى شاش ەتەكتەن.
جىل سايىن ەلوردادا ينۆەستيتسيا كولەمى ۇلعايىپ كەلەدى. رەسمي مالىمەتتەرگە سۇيەنسەك, تەك وتكەن جىلدىڭ ىشىندە قالانىڭ ونەركاسىپ ءونىمىنىڭ كولەمى 6,7 پايىزعا ءوسىپ, 263,2 ملرد تەڭگەگە جەتكەن. 2007 جىلعا دەيىن ونەركاسىپ ءوندىرىسىنىڭ ءوسىمىن نەگىزىنەن قۇرىلىس يندۋسترياسى كاسىپورىندارى قۇراپ كەلگەنى بەلگىلى. ەندى يننوۆاتسيالىق يندۋستريالاندىرۋ ەلوردا ەكونوميكاسىنىڭ باسىم باعىتتارىنىڭ بىرىنە اينالدى. بۇل مىندەتتى جۇزەگە اسىرۋدا باستى ءرول اتقاراتىن – يندۋستريالىق پارك اۋماعىندا جۇزەگە اسىرىلىپ جاتقان جوبالار.
2005 جىلى قۇرىلعان يندۋستريالىق پارك 2007 جىلدان باستاپ «استانا – جاڭا قالا» ارنايى ەكونوميكالىق ايماعى اياسىنا ەنگىزىلدى. ەندى ەل ەكونوميكاسىن العا سۇيرەيتىن سەرپىندى جوبالار وسى ونەركاسىپ ايماعىندا ىسكە اسىرىلۋدا.
بۇگىنگى تاڭدا ونىڭ اۋماعىندا جالپى ينۆەستيتسيا مولشەرى 180 ملرد تەڭگە بولاتىن 49 جوبا جۇزەگە اسىرىلىپ, پارك الاڭىنىڭ 90 پايىزىن قامتيدى. ونىڭ ىشىندە 19 جوبا بەلسەندى جۇمىس ىستەۋدە, تاعى 4 كاسىپورىندى بيىل جىل اياعىنا دەيىن ىسكە قوسۋ جوسپارلانىپ وتىر. قالعان 25 جوبا قۇرىلىس جۇرگىزۋ جانە جەر تەلىمىن رەسىمدەۋ ساتىسىندا تۇر.
تۇتاستاي العاندا, يندۋستريالىق پاركتەگى جوبالاردىڭ بارلىعى 2016 جىلدىڭ اياعىنا دەيىن وندىرىسكە كىرىسەدى. سول ارقىلى ەلوردا ناقتى كورسەتكىشتەر مەن ەلەۋلى الەۋمەتتىك-ەكونوميكالىق تيىمدىلىككە قول جەتكىزەتىن بولادى. ماسەلەن, 2017 جىلعا قاراي يندۋستريالىق پارك كاسىپورىندارى شىعارعان ونىمدەر مولشەرى جىل سايىن شامامەن 300 ملرد تەڭگەگە جەتەدى دەپ كۇتىلىپ وتىر. سونىڭ ارقاسىندا 7,5 مىڭنان اسا جاڭا جۇمىس ورنى اشىلماق, مەملەكەتتىك قازىناعا قۇيىلاتىن سالىق تۇسىمدەرىنىڭ مولشەرى ءتورت ەسە ءوسىپ, شامامەن 70 ملرد تەڭگەگە جەتەدى. ال, تاۋارلار مەن كورسەتىلەتىن قىزمەتتەردەگى قازاقستاندىقتاردىڭ ۇلەسى 70 پايىزعا جەتەدى دەپ كۇتىلۋدە.
وسى جىل ىشىندە ەكىنشى يندۋستريالىق پاركتىڭ تەحنيكالىق-ەكونوميكالىق نەگىزدەمەسى ازىرلەنىپ بىتەدى. ونىڭ 433 گا اۋماعىندا قىرىققا جۋىق جاڭا كاسىپورىن قۇرىلادى. ولاردىڭ بارلىعى دا يننوۆاتسيالىق جانە ەكونوميكالىق تيىمدىلىك ولشەمدەرىنە ساي جۇمىس ىستەمەك.
يندۋستريالىق باعىتتاعى مۇنداي ىستەر ينۆەستيتسيالىق بەلسەندىلىكتى ارتتىرا تۇسەدى. وعان دالەل دە جوق ەمەس. تەك 2014 جىلدىڭ ءبىرىنشى توقسانىنىڭ قورىتىندىسى بويىنشا, 2013 جىلدىڭ وسى كەزەڭىمەن سالىستىرعاندا, ينۆەستيتسيا مولشەرى 8,2 پايىزعا ۇلعايىپ, 70,2 ملرد تەڭگەگە جەتكەنىن اتاپ ءوتۋ كەرەك.
جالپى, وسى يندۋستريالىق پاركتە ينۆەستورلاردىڭ ەشتەڭەگە الاڭداماي جۇمىس ىستەۋىنە بارلىق تەحنيكالىق جاعدايلار جاسالعان.
اتاپ ايتقاندا, بۇل اۋماقتا ەركiن كەدەندiك رەجيم قالىپتاسقان. يمپورتتالاتىن تاۋارلارعا اكتسيز سالۋدى قوسپاعاندا, كەدەن باجى مەن سالىق سالىنبايدى جانە تاريفتىك رەتتەۋ شارالارى قولدانىلمايدى. قۇرىلىس نىساندارى سالىنىپ جاتقان جەر تەلىمدەرى جەر سالىعىنان بوساتىلعان. عيمارات سالىق سالۋ نىسانى بولىپ تابىلمايدى. مىنە, وسىنداي جەڭىلدىكتەرىمەن يندۋستريالىق اۋماق وتاندىق جانە شەتەلدىك ينۆەستورلاردى وزىنە تارتىپ, يننوۆاتسيالىق دامۋدى ماقسات ەتكەن سەرپىندى جوبالاردىڭ ورتاسىنا اينالماق.
قىمبات توقتامۇرات
