ەلورداداعى كاسىپوداق ورتالىعىندا ەلباسىنىڭ «بولاشاققا باعدار: رۋحاني جاڭعىرۋ» ماقالاسىنا وراي «باسەكەلىككە قابىلەتتى ەڭبەك ادامى جانە ونىڭ ەكونوميكالىق دامۋداعى ءرولى» اتتى دوڭگەلەك ۇستەل ءماجىلىسى ءوتتى. وعان قر پارلامەنتى سەناتىنىڭ دەپۋتاتى ۆلاديمير رەدكوكاشين, قالالىق ىشكى ساياسات باسقارماسىنىڭ باسشىسى ەرلان قاناليموۆ, قالالىق ءماسليحات دەپۋتاتتارى جانە جۇمىسپەن قامتۋ, ەڭبەك جانە الەۋمەتتىك قورعاۋ باسقارماسىنىڭ ماماندارى قاتىستى.
جيىندا كاسىپوداق سالاسىنا بايلانىستى كوپتەگەن ماسەلەلەر قوزعالدى. ۇلتتىڭ تابىستى بولۋى تابيعي بايلىعىمەن ەمەس, ادامداردىڭ باسەكەلىك قابىلەتتىلىگىمەن ايقىندالاتىنى ايتىلدى. وسى باعىتتا كاسىپوداق ۇيىمدارىنىڭ قىزمەتكەرلەرى مەن بيزنەس جانە جاستار ۇيىمدارىنىڭ وكىلدەرى بايانداما جاسادى.
– دامىعان وتىز ەلدىڭ قاتارىنا كىرۋ ءۇشىن الدىمەن ادامي ەڭبەكتىڭ بەدەلىنە باسىمدىق بەرگەن ءجون. ويتكەنى جوعارى ساپالى ءونىمنىڭ ءوندىرىسى تەك ادامنىڭ كۇشىندە. جاڭا ەڭبەك كودەكسى مەن كاسىپوداق تۋرالى زاڭعا ساي كاسىپوداق ۇيىمدارىنىڭ وكىلدەرى قىزمەتكەرلەردىڭ قۇقىعىن قورعاۋعا بەلسەندى اتسالىسۋدا. سوندىقتان كاسىپورىن باسشىلارى الدىمەن جۇمىسشىعا جاعداي جاساۋلارى ءتيىس. سول ارقىلى ۇيىمنىڭ بەدەلى ارتادى, ءىسى ورگە باسادى, – دەدى قالالىق كاسىپوداقتار ورتالىعىنىڭ توراعاسى سارسەنباي مىڭباەۆ.
سونىمەن بىرگە, «استانا جارىق» اق كاسىپوداق بىرلەستىكتەرىنىڭ وكىلدەرى بىرقاتار كاسىپورىنداردا ەڭبەك زاڭناماسىنىڭ بۇزىلعانىن اشىق ايتىپ, تۇيتكىلدى ماسەلەنى شەشۋ جولدارىن ءتىزىپ بەردى. كاسىپوداقتار ورتالىعىنىڭ توراعاسى سارسەنباي مىڭباەۆتىڭ ايتۋىنشا, مۇنداي قادام جۇمىسشىلاردىڭ وزدەرى ۇسىنعان جاڭا جۇمىس ۇلگىسى ەكەن.
بۇگىندە باس قالادا 9 سالادان قۇرىلعان 510 كاسىپوداق ۇيىمى جۇمىس ىستەيدى. ءماجىلىس قورىتىندىسىندا الەۋمەتتىك سەرىكتەستىكتى دامىتۋ, ەڭبەكاقى كولەمىن ءوسىرۋ, ەڭبەك احۋالىن جاقسارتۋ, نارىققا قاجەتتى مامان يەلەرىن انىقتاۋ, تالىمگەرلىكتى دامىتۋ, جۇمىسشىلاردىڭ قۇقىقتىق ءبىلىمىن جوعارىلاتۋ جانە ەڭبەككەرلەردىڭ قوعامدىق-ساياسي بەلسەندىلىكتەرىن كوتەرۋ سەكىلدى بىرقاتار ۇسىنىس جاسالدى.
ازامات قۇسايىن
