حالقىمىز «انانىڭ باسقان جەرىندە پەيىش بار» دەپ بەكەر ايتپاعان. كەشە «استانا» كونتسەرت زالىندا ەلوردا باسشىسى باقىت سۇلتانوۆ ءوز ورىنباسارلارى جانە باسقارما باسشىلارىمەن بىرگە جۇزدەن اسا كوپبالالى انانى قابىلداپ, ولاردى مازالاعان ماسەلەلەردىڭ ءمان-جايىنا قانىقتى.
قالا اكىمى انالارمەن كەزدەسۋىندە ولاردىڭ ايتقان ءوتىنىش-تىلەكتەرى جەرگىلىكتى اتقارۋشى ورگانداردىڭ نازارىنان تىس قالمايتىنىن جەتكىزدى.
كەزدەسۋ بارىسىندا شاھار باسشىسىنا سۇراق قويعىسى كەلگەن انالاردىڭ قاتارى كوپ بولدى. سوندىقتان باقىت سۇلتانوۆ ءوز ورىنباسارلارى, اۋدان اكىمدەرى جانە باسقارما باسشىلارىمەن بىرگە انالاردى جەكە قابىلداپ, ولاردىڭ ايتقان ماسەلەلەرىن زەر سالىپ تىڭدادى. اكىم قابىلداۋىندا ايتىلعان كەيبىر پروبلەمالار سول جەردە شەشىلدى. ايتالىق, كوپبالالى وتباسىلارعا كومىر جانە مەكتەپ جاسىنداعى بالالارعا وقۋ قۇرالدارى الىپ بەرىلدى. سونداي-اق باسپانا ماسەلەسى دە ءسوز بولدى. بۇعان اكىم كوپبالالى وتباسىلاردى مۋنيتسيپالدىق تۇرعىن ۇيمەن قامتاماسىز ەتۋ ءۇشىن شارالار قاراستىرىلىپ جاتقانىن ايتتى. بۇگىندە اكىمدىك مۇمكىندىگىنشە ءار وتباسىعا كومەك كورسەتۋدىڭ جوسپارىن ازىرلەگەن.
ەندى ەلوردا اكىمدىگى ازاماتتاردى قابىلداۋدى ءبىر كۇنمەن شەكتەمەي, اپتا بويى وتكىزۋدى جوسپارلاپ وتىر. استانا اكىمىنىڭ تاپسىرماسىمەن 13 اقپاننان اۋدان اكىمدىكتەرى مەن باسقارمالاردا «اشىق ەسىك» كۇنى وتكىزىلۋدە.
