قالا اكىمىنىڭ ورىنباسارى التىنبەك قايساعاليەۆتىڭ توراعالىعىمەن جانە قر پرەزيدەنتى اكىمشىلىگىنىڭ مەملەكەتتىك ينسپەكتورى ماقسۇت يساحوۆتىڭ قاتىسۋىمەن ەلوردانىڭ 2019-2020 جىلعى جىلۋ بەرۋ ماۋسىمىنا دايىندىعى بويىنشا شتاب وتىرىسى ءوتتى.
كۇن تارتىبىنە قويىلعان ماسەلە تورتەۋ: نۇر-سۇلتان قالاسىنىڭ جىلۋ بەرۋ ماۋسىمىنا دايىندىعى بارىسىنداعى پروبلەمالىق ماسەلەلەر; ءبىلىم بەرۋ جانە دەنساۋلىق ساقتاۋ نىساندارىنىڭ ازىرلىگى; «استانا-ەنەرگيا» اق-تىڭ ماۋسىمعا دايىندىعى, ونىڭ ىشىندە جوندەۋ جۇمىستارى مەن ينۆەستيتسيالىق باعدارلامالاردىڭ جۇزەگە اسىرىلۋى; ورتكە قارسى شارالار.
قالالىق وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ باسشىسى ەربول تولەۋوۆتىڭ ايتۋىنشا, 2019-2020 جىلعى جىلۋ بەرۋ ماۋسىمىنا دايىندىق بەلگىلەنگەن كەستە مەن كارتا رەجيمىنە سايكەس جۇرگىزىلىپ جاتىر. شاھاردى ەلەكترمەن جانە جىلۋ بەرۋ جۇيەسىمەن جابدىقتايتىن جەو-1 مەن جەو-2, ودان بولەك تاعى 6 قازاندىقتىڭ قىسقى ازىرلىگى – 53%.
جارىق بەرۋ بويىنشا جاۋاپتى «استانا رەك» اق قىس ماۋسىمىنا 64,4 پايىزعا دايىن. 40 دەنساۋلىق ساقتاۋ ۇيىمدارىنىڭ 14-ءى, 180 ءبىلىم بەرۋ ۇيىمدارىنىڭ 83-ءى جىلۋ بەرۋ ماۋسىمىنا ءازىر. قالا ىرگەسىندەگى ەلدى مەكەندەردىڭ قىسقى دايىندىعى – 47,3%.
«بۇگىندە ءبىز 8 ءىرى كومىرمەن جابدىقتاۋشىمەن وتىن باعاسىن كوتەرمەۋ تۋرالى مەموراندۋمعا قول قويدىق. سونىمەن قاتار, حالىققا كومىردى قازىردەن باستاپ ساتىپ الا بەرۋ كەرەكتىگىن ايتىپ, تۇسىندىرمە جۇمىستارىن جۇرگىزىپ جاتىرمىز» دەدى ە.تولەۋوۆ.
بيىلعى جىلى كومىرگە تاپشىلىق جوق. قازىرگى كۇنى قوردا تۇتىنۋدان بولەك 316 مىڭ توننا كومىر, 8,8 مىڭ توننا مازۋت بار.
دەگەنمەن شەشىلمەي جاتقان تۇيتكىلدەر دە بار.
«قالاداعى كوممۋنالدىق شارۋاشىلىقپەن «استانا ەنەرگوسبىت» جشس اينالىسادى. بۇگىنگى كۇنى بۇل ۇيىمعا جىلۋ جانە جارىق بويىنشا تۇرعىنداردىڭ وتەلمەگەن بەرەشەگى 1 ملرد 734 ملن تەڭگەنى قۇراپ وتىر» دەدى باسقارما باسشىسى.
ودان بولەك, «استانا-تەپلوترانزيت» اق جۇيەسى بويىنشا مەملەكەتتىك ساتىپ الۋعا قاتىسىپ, تەندەردى جەڭىپ العان كومپانيالار ول جۇمىستاردان باس تارتقان.
جينالىس سوڭىندا قالا اكىمىنىڭ ورىنباسارى ا.قايساعاليەۆ اۋدان اكىمدەرىنە بارلىق پروبلەمالىق ماسەلەلەردى جىلۋ بەرۋ ماۋسىمىنا دەيىن تولىقتاي شەشىپ ءبىتىرۋدى تاپسىردى.
