جاز ورتاسىنان اۋعان شاقتا حالىق اراسىندا مەكتەپ ماسەلەسىنە قاتىستى الاڭداۋشىلىقتاردىڭ تۋا باستايتىنى بەلگىلى. اسىرەسە, ۇل-قىزى العاش رەت وقۋشى اتانعالى وتىرعان اتا-انانىڭ ۋايىمى كوپ. ولاردى «بالانى التى جاستان باستاپ مەكتەپكە بەرۋ مىندەتتى مە؟» دەگەن سۇراق مازالايدى.
مينيستر نە دەدى؟
قر ءبىلىم تۋرالى زاڭىنىڭ 31-بابىنداعى 1-تارماققا سايكەس, بالالار 1-سىنىپقا التى جاستان باستاپ قابىلدانادى. اتالعان نورما بيىلعى 1 قاڭتاردا كۇشىنە ەندى. ءبىلىم ءمينيسترى اسحات ايماعامبەتوۆ اتالعان ماسەلەگە قاتىستى بەرگەن تۇسىنىگىندە:
– 2014 جىلى ەلىمىز بويىنشا ءبىرىنشى سىنىپقا 320 مىڭ ءبۇلدىرشىن بارعان, ونىڭ ىشىندە 60 پايىزى التى جاستا بولعان. وتكەن جىلى دا التى جاسىنان مەكتەپ تابالدىرىعىن اتتاعان بالا سانىنا تالداۋ جۇرگىزدىك, ولاردىڭ 80 پايىزعا جۋىعى التى جاسىندا وقۋشى اتاندى. يۋنەسكو مالىمەتى بويىنشا الەمنىڭ 134 ەلىندە بۇلدىرشىندەر التى جاستان مەكتەپكە بارادى. ارينە, بالالاردىڭ دەربەس ەرەكشەلىكتەرى بار جانە وسىنى ءبىز ەسكەرۋىمىز كەرەك, – دەگەن بولاتىن.
مينيستر سونداي-اق زاڭداعى ءتارتىپتى ورىنداماي, بالانى التى جاسىندا مەكتەپكە بەرۋدەن باس تارتقان اتا-انالاردىڭ ەشقانداي جاۋاپكەرشىلىككە تارتىلمايتىنىن دا ايتتى. الايدا كەلەر جىلى بالا جەتى جاسىندا مەكتەپكە بارعانىندا, سىنىبىنداعى التى جاسار وقۋشىلارمەن بىرگە ءوزىن پسيحولوگيالىق تۇرعىدا قانشالىقتى جايلى سەزىنەتىنىن دە ويلاستىرعان ءجون.
التى جاسار ءبۇلدىرشىن جازۋ-سىزۋدى بىلمەسە شە؟
التى جاسار بالالارىن مەكتەپكە بەرگىسى كەلمەيتىن اتا-انالار ولاردىڭ جازۋ جازىپ, ساناي المايتىندارىن, ياعني وقۋعا ءالى دايىن ەمەس ەكەندىكتەرىن العا تارتادى. وسى ورايدا ءاربىر مەكتەپ ىشىندە «بوبەكتەر مەكتەبى» جۇمىس ىستەيتىنىن ۇمىتپاعان ابزال. كوپشىلىگى ونى ءنولىنشى سىنىپپەن شاتاستىرادى. شىن مانىندە ول – تامىز ايىندا ءار مەكتەپ ىشىنەن اشىلاتىن, 1-سىنىپقا ازىرلەيتىن قىسقامەرزىمدى كۋرس. وندا بالالارعا قالام ۇستاۋدان باستاپ, ارىپتەردى, ساناۋدى ۇيرەتەدى, سونداي-اق مەكتەپ ەرەجەلەرىنە بەيىمدەيدى. وقۋشىسى كوپ كەيبىر مەكتەپتەردە «بوبەكتەر مەكتەبى» ماۋسىم-شىلدە ايلارىنان باستاپ اشىق. استاناداعى بارلىق «بوبەكتەر مەكتەبىنىڭ» جۇمىس كەستەسى تۋرالى اقپاراتپەن قالالىق ءبىلىم باسقارماسىنىڭ سايتىندا تانىسۋعا بولادى. ونداعى ەسەپتە وقۋ جىلى باستالعانعا دەيىن ەلورداداعى 83 مەكتەپ بويىنشا 10574 بالانى «بوبەكتەر مەكتەبىمەن» قامتۋ جوسپارلانعان.
التى جاسقا دەيىن قايدا وقىتۋعا بولادى؟
ايتپاقشى, كوپ اتا-انا ۇل-قىزدارىن التى جاستا مەكتەپكە بەرۋگە ەكىۇداي ويدا جۇرگەندەرىندە, كەيبىرەۋلەرى بالاسىن بەس جاسىندا-اق 1-سىنىپتىڭ پارتاسىنا وتىرعىزادى ەكەن. ەگەر بالا كۇنتىزبەلىك جىلدىڭ سوڭىنا دەيىن التى جاسقا تولاتىن بولسا, اتا-اناسىنىڭ قالاۋىمەن بالانى وقۋعا قابىلداۋعا زاڭ رۇقسات ەتەدى. ال باسقا جاعدايدا ونداي بۇلدىرشىندەر كەلەر وقۋ جىلى باستالعانعا دەيىن وتباسىندا, مەكتەپكە دەيىنگى ۇيىمداردا, جالپى ءبىلىم بەرەتىن مەكتەپتەردىڭ (ليتسەيلەردىڭ, گيمنازيالاردىڭ) مەكتەپالدى دايارلىق سىنىپتارىندا تاربيەلەنىپ, وقىتىلادى. نۇر-سۇلتان قالاسى ءبىلىم باسقارماسى ستراتەگيا, تالداۋ جانە تسيفرلىق تەحنولوگيالار ءبولىمىنىڭ جەتەكشىسى جازيرا اسانوۆانىڭ ايتۋىنشا, بۇگىندە شاھارداعى 43 شاعىن ورتالىقتا بالالاردىڭ كۇنىنە ءتورت-بەس ساعات مەكتەپالدى دايارلىقتان ءوتۋ مۇمكىندىگى بار. شاعىن ورتالىققا جولداما الۋ اكىمدىكتىڭ رەسمي سايتىندا (e.astana.kz) جۇزەگە اسىرىلادى. سونىمەن قوسا, 2019-2020 وقۋ جىلى بويىنشا 70 مەكتەپتە ءنولىنشى سىنىپ جۇمىس ىستەمەك. وندا جالپى سانى 160 سىنىپ اشىلىپ, 3923 بالا وقىتىلادى.
مەكتەپتى تاڭداۋعا اتا-انا قۇقىلى ما؟
اتا-انا مەن بالا ءۇشىن ءبىر قۋانىشتىسى, قر ۇكىمەتىنىڭ 2018 جىلعى 10 مامىرداعى №254 جارلىعىنىڭ 8-تارماعىنا سايكەس, ولار وزدەرى قالاعان مەكتەپتى تاڭداۋعا تولىقتاي قۇقىلى. الايدا اتالعان قۇجاتتا «ەڭ ءبىرىنشى كەزەكتە ءبىلىم بەرۋ ۇيىمىنىڭ قىزمەت كورسەتۋ ايماعىندا تۇراتىندار, قالعاندارى بوس ورىن بولعان جاعدايدا قابىلداناتىندارى» كورسەتىلگەن. بۇل شارا مەكتەپتەردەگى بالا سانىنىڭ شەكتەن تىس كوبەيىپ كەتۋىنىڭ الدىن الادى, دەگەنمەن نۇر-سۇلتان قالاسىندا ءالى كۇنگە دەيىن بەس مەكتەپ ءۇش اۋىسىممەن جۇمىس ىستەيدى.
ەلوردالىق ءبىلىم باسقارماسىنىڭ اقپاراتى بويىنشا, مەكتەپكە قابىلداۋدا اتا-انانىڭ نەمەسە ولاردىڭ زاڭدى وكىلدەرىنىڭ تاراپىنان جازىلعان ءوتىنىش, بالانىڭ تۋ تۋرالى كۋالىگىنىڭ كوشىرمەسى, دەنساۋلىق جاعدايى تۋرالى №063/ۋ جانە №026/ۋ-3 نىسان, بالانىڭ 3ح4 فورماتتاعى فوتوسۋرەتىنىڭ ەكى داناسى قاجەت. ەرەكشە ءبىلىم قاجەتتىلىگى بار بالالار ءۇشىن پەداگوگيكالىق-مەديتسينالىق-پسيحولوگيالىق كوميسسيانىڭ قورىتىندىسى قوسا بەرىلەدى. قۇجاتتار قاعاز جۇزىندە مەكتەپ كەڭسەسىندە نەمەسە ەلەكتروندى تۇردە اكىمدىكتىڭ e.astana.kz سايتى ارقىلى قابىلدانادى.
قازىرگى تاڭدا 1-سىنىپقا قۇجاتتاردى قابىلداۋ استاناداعى جالپى ءبىلىم بەرەتىن بارلىق مەكتەپتەردە جۇرگىزىلۋدە, قابىلداۋ كوميسسيالارى جۇمىس كۇندەرى 9.00-دەن 18.30-عا دەيىن جۇمىس ىستەيدى. شارا 30 تامىزعا دەيىن جالعاسادى.
قۇجاتتاردى تەك بالانىڭ اتا-اناسى نەمەسە ولاردىڭ زاڭدى وكىلدەرىن تاپسىرادى. سوندىقتان مەكتەپتەر ءوتىنىشتى باسقا كىسىلەردەن, ماسەلەن بالانىڭ اتا-اجەسىنەن, اپاسىنان, اعاسىنان, ت.ب. قابىلداۋدان باس تارتۋعا قۇقىلى. ال مەكتەپ قانداي دا ءبىر نەگىزسىز سەبەپتەرمەن قۇجات قابىلداۋدان باس تارتسا, بۇل تۋرالى بەيبىتشىلىك كوشەسى, 11 مەكەنجايى بويىنشا ورنالاسقان ءبىلىم باسقارماسىنىڭ 119-كەڭسەسىنە كەلىپ حابارلاۋعا بولادى. سونداي-اق باسقارمانىڭ رەسمي سايتىندا (bilim.astana.kz) شاعىم قالدىراتىن فۋنكتسيا بار. بۇدان بولەك اتالعان ۆەدومستۆونىڭ +77787887647, +77761255771 نومىرلەرى بويىنشا WhatsApp قىزمەتى جۇمىس ىستەيدى.
