نۇر-سۇلتاندا جىلۋ جەلىلەرىن جوندەۋگە 1 ملرد 333 ملن تەڭگە ءبولىندى. بۇل تۋرالى «استانا-تەپلوترانزيت» اق باسقارما توراعاسى باعدات ازباەۆ مالىمدەدى.
«نۇر-سۇلتان قالاسى بويىنشا 867 جىلۋ تراسساسى بولسا, ونىڭ ىشىندە 860 سۋ جىلۋ تراسساسى جانە تاعى بىرنەشە سەگىز شاقىرىمدىق تراسسالار بار. ورتالىق ۋچاسكەگە كەلسەك, بىزدە 270 شاقىرىم ماگيسترال بار. ورتاشا توزۋ بويىنشا 2020 جىلعا قاراي بۇل كورسەتكىش 56%-دى قۇرادى. 2021 جىلى ينۆەستيتسيالىق باعدارلامالار بويىنشا 1 ملرد 498 ملن تەڭگە ءبولىندى. ونىڭ ىشىندە جىلۋ تراسسالارىن قايتا قۇرۋعا 1 ملرد 333 ملن تەڭگە ءبولىندى» دەدى ب.ازباەۆ.
قازىرگى ۋاقىتتا جۇمىستاردىڭ 90 پايىزى اباتتاندىرۋ بويىنشا جۇرگىزىلگەن. باسقارما توراعاسى جىلۋ شىعىندارىن بيىل 12,1-دەن 11,72 پايىزعا دەيىن تۇسىرەمىز دەپ وتىر.
«جىلۋ شىعىندارىنىڭ بەكىتىلگەن نورماتيۆتەرىن تومەندەتۋ كورسەتكىشى 12,53 پايىز بولسا, 2020 جىلى ونى 12,1 پايىزعا دەيىن ازايتتىق. ال بيىل 12,1-دەن 11,72 پايىزعا دەيىن تۇسىرەمىز. فيزيكالىق توزۋدى تومەندەتۋگە كەلسەك, بيىل جوسپارلانعان جىلۋ تراسسالارىنىڭ 6700 مەترى 0,4%-عا تومەندەتىلەدى, ياعني 56%-دان 55,6%-عا دەيىن جەتكىزەمىز. بيىل ينۆەستيتسيالىق باعدارلاما بويىنشا 10 نىسان 6750 مەتر قايتا جوندەۋدەن وتەدى» دەدى باعدات ازباەۆ.
2020 جىلى ينۆەستيتسيالىق باعدارلامانى ىسكە اسىرۋ قورىتىندىلارى بويىنشا امورتيزاتسيا مەن تاريفتىك سمەتا قۇرامىنداعى پايدا ەسەبىنەن استانا-تەپلوترانزيت ينۆەستيتسياعا 1 487 180 مىڭ تەڭگە باعىتتادى, ونىڭ ىشىندە جىلۋ جەلىلەرىن قايتا جاڭارتۋ جانە جاڭعىرتۋ – 1 249 904 مىڭ تەڭگە, ەسكىرگەن جابدىقتاردى اۋىستىرۋ جانە جاڭا جابدىقتاردى ساتىپ الۋ – 56 118 مىڭ تەڭگە.
ليتسەنزيالىق باعدارلامالاردى ساتىپ الۋعا 18 239 مىڭ تەڭگە, كولىك جانە ارنايى مەحانيزمدەردى ساتىپ الۋعا 162 919 مىڭ تەڭگە ءبولىندى. ال 2021 جىلعا ارنالعان ينۆەستيتسيالىق باعدارلاما 1 498 322 مىڭ تەڭگە مولشەرىندە بەكىتىلگەن, ونىڭ 1 333 612 مىڭ تەڭگەسى نەمەسە 89%-ى جوبالاۋدى ەسكەرە وتىرىپ, جىلۋ جەلىلەرىن رەكونسترۋكتسيالاۋعا جانە جاڭعىرتۋعا باعىتتالادى.
