Қабанбай батыр даңғылындағы Хусейн Бен Талал көшесінен «Астана жұлдызы» айналма жолына дейінгі учаске ішінара жабылады, деп хабарлайды astana-akshamy.kz
Астана қаласы Көлік және жол-көлік инфрақұрылымын дамыту басқармасы Қабанбай батыр даңғылы бойындағы осы телімде жол төсемін орташа жөндеу жұмыстарын жүргізетінін мәлімдеді.
Осыған байланысты, осы жылдың 5 маусымы сағат 21:00-ден бастап 6 маусымы сағат 21:00-ге дейін жоғарыда аталған учаске ішінара жабылады. Бұл ретте қозғалыс екі бағытта да тараптардың бірі бойынша жүзеге асырылатын болады.
Сонымен қатар осы жылдың 6 маусымы сағат 21:00-ден бастап 9 маусым сағат 6:00-ге дейін жоғарыда аталған учаске толық жабылады.
Астана тұрғындары мен қонақтарынан қала жолдарындағы кептелістерді болдырмау мақсатында өз маршруттарын алдын ала жоспарлауды жол-құрылыс жұмыстары жүргізілуіне түсіністікпен қарауды сұрайды.
