23 маусым күні әлемде Халықаралық Олимпиада күні атап өтіледі. Қазақстан аталған ауқымды шараға 31-рет қатысып отыр, деп хабарлайды astana-akshamy.kz
Ерекше датаны тойлау барысында Қазақстан Ұлттық Олимпиадалық комитеті мереке мен олимпиадалық қозғалыстың маңызын арттыратын бірқатар іс-шара өткізді.
Мерекелік бағдарламаның негізгі бөлігі Астанада өтті. Елорда тұрғындары бірнеше күн бойы түрлі спорттық іс-шараларға қатысып, ғаламдық деңгейде тойланатын Халықаралық Олимпиада күнінің бір бөлшегі атанды. Бұл іс-шараларға жалпы есебі мыңнан аса адам қатысқан.
Негізгі іс-шаралар өткен Триатлон саябағына келушілер үлкен мерекенің бір бөлшегіне айналды. Спорттық бағдарлама аясында триатлон мен 3х3 баскетболдан жарыстар ұйымдастырылды.
Триатлон додасына 250 адам қатысты. Кейін баскетболшылар естелік сыйлықтар үшін өзара сынға түсті. Одан бөлек, көркем гимнастика, брейкинг, таеквондо және бокстан қонақтарға арнайы көрсетілім нөмірлері ұсынылды.
Мерекелік бағдарламаны брейкингтен Қазақстан ұлттық командасының мүшелері ашып, сахнада өз шеберліктерін көрсетті.
Таеквондо және бокстан көрсетілім нөмірлерін №3 мамандандырылған балалар мен жасөспірімдердің олимпиадалық резерв мектебінің спортшылары орындады. Ал көркем гимнастиканың сұлулығын №1 балалар мен жасөспірімдердің олимпиадалық резерв мектебінің гимнастары көпшілік алдында паш етті.
«Халықаралық Олимпиада күні ұзақ жылдар бойы әлем халқын ортақ эмоцияға бөлеп, жеңіске деген ұмтылыспен біріктіріп келеді. Біз ҰОК-те барлық чемпионның балалық шақтан келетінін жиі айтамыз, сондықтан, бұл спорттық мерекені міндетті түрде балалардың – болашақ чемпиондардың арасында өткіземіз. Қазақстанда спортқа қатысты бала армандары орындалған кейіпкерлер мен қаһармандар өте көп. Осы мерекені бізбен бірге атап өткен баршаңызға алғыс айтамын. Ұлттық Олимпиадалық комитеттің және біздің ҰОК президенті Геннадий Головкиннің атынан баршаңызды Олимпиада күнімен құттықтаймын!» – деді Қазақстан ҰОК бас хатшысы Жанар Өтешева.
Спорттық жарыстарға қатысушылардың барлығы жарыс нәтижесінің қандай болғанына қарамастан, ХОК президенті Томас Бах пен Қазақстан ҰОК президенті Геннадий Головкиннің қолы қойылған Olympic Day қатысушысы сертификатын иеленіп, естеліктер сыйлықтармен марапатталды.
