«Таза Қазақстан. Астана – тәртіп пен тазалықтың үлгісі» ауқымды экологиялық акция аясында Астана маңында Астрахан тас жолы бойынша AMANAT партиясының қалалық филиалы қала әкімдігімен бірлесіп кезекті «Таза бейсенбі» акциясын өткізді, деп хабарлайды astana-akshamy.kz.
Қала сыртындағы ашық далада қоқыс жинау таңертең ерте басталды. Акцияға AMANAT партиясы Орталық аппаратының өкілдері, қоғам қайраткерлері, «Жастар Рухы» жастар ұйымының еріктілері, С.Сейфуллин атындағы Қазақ агротехникалық зерттеу университетінің оқытушылары, ғылыми қайраткерлері мен студенттері және қоршаған ортаны қорғау және табиғатты пайдалану басқармасының қызметкерлері қатысты. Қатысушылар саны шамамен 400 адамнан асты. Бірнеше жүз қап қоқыс жиналды.
«Алдын ала біз Астана маңындағы елдімекендердің ластанған аумақтарының карталарын жасадық, олардың негізінде елорда маңында да, қаланың өзінде де ең ластанған 15 учаске анықталды. Бұл жол бойындағы аумақтар, өндірістік аймақтар, тұрғын аудандар, әлеуметтік нысандар және басқалар. Партиялықтар әр бейсенбіде осындай тазалықты өткізуге ниетті. Бұл ретте, бұл жай ғана қоқысты жинау туралы ғана емес, әрбір учаскеге мәслихат депутаттары, белсенділер мен бастауыш партия ұйымдарының басшылары бекітілген. Олар бекітілген аумақтарда тәртіп пен тазалықты сақтауды қамтамасыз етеді, сондай-ақ урналарды орнату, көгалдандыру, жолдар мен тротуарларды жөндеу сияқты инфрақұрылымды абаттандыру мен дамытуға байланысты мәселелерді шешеді», – деді AMANAT партиясының Астана филиалының баспасөз хатшысы Сұлтан Мұстафин.
AMANAT партиясы Астана қалалық филиалының атқарушы хатшысы Мария Өтебаеваның айтуынша, «Таза Қазақстан» экологиялық акциясы жарияланған күннен бастап апта сайын әр бейсенбіде экологиялық сенбілік жарияланады.
Айта кету керек, ауқымды экоакция аясында қаланы санитарлық тазарту, нөсер және арық канализациясы, көшелерді, тротуарларды, орамішілік аумақтарды, қоғамдық кеңістіктер мен аулаларды тазалау жұмыстары жүргізілуде. Сондай-ақ жасыл желектерді күтіп ұстау және отырғызу, сауда нысандарына іргелес аумақтарды жинау, көгалдар мен гүлзарларды орнату, рұқсат етілмеген полигондарды жою жұмыстары жүргізілуде.
