БРИКС ойындары жүлдегерлерін қарсы алды
![](https://astana-akshamy.kz/wp-content/uploads/2024/06/e2aac42cd0a8f9efc03c3aac550dbb29_1280x720-780x470.jpeg)
Кеше Астана халықаралық әуежайына көркем гимнастикадан БРИКС ойындарының қола жүлдегерлері ұшып келді, деп хабарлайды astana-akshamy.kz
Жеңімпаз атанған елордалық спортшыларды құттықтау үшін Астана қаласы Дене шынықтыру және спорт басқармасының басшысы Василий Левит және олардың ата-аналары әуежайда жиналып, чемпиондарды қошеметпен қарсы алды.
«Дүбірлі додада бар күштеріңізді салып, жігерлеріңізді көрсеттіңіздер. Біз сіздерді қашан да қолдауға дайынбыз. Жарқын жеңістеріңіздің әлі де алда екендігіне сеніміміз мол», – деді басқарма басшысы Василий Левит.
Естеріңізге салсақ, «Фурор» командасы БРИКС ойындарында көркем гимнастикадан 4 қола жүлде жеңіп алған болатын.
Команда сапында Жасмин Жүнісбаева, Кристина Чепульская, Аида Хакимжанова, Айзере Кенес, Айзере Нұрмағамбетова және Мәдина Мырзабай өнер көрсетті.
Айта кетсек, команда құрамындағы 6 қыздың барлығы – қалалық №1 Балалар мен жасөспірімдердің мамандандырылған олимпиадалық резерв спорт мектебінің тәрбиеленушілері.
Қазан қаласындағы БРИКС ойындарында Қазақстан құрамасы медальдық есепте 10-орынға ие болды. Команда қоржынында екі алтын, 10 күміс және он жеті қола медаль бар.
БРИКС ойындары 12 маусымнан 23 маусымға дейін созылды. Жарысқа 90-нан астам елден 5 мыңға жуық спортшы қатысты, олар 387 медаль жиынтығын сарапқа салды.
БРИКС ойындарында Қазақстанның намысын спорттың 13 түрінен 115 атлет қорғады.