Paris-2024 Паралимпиада ойындарына 100 күн қалуына орай елордада волейболды отырып ойнаудан ұлттық құрама мен Бразилия арасында жолдастық матч ұйымдастырылды. Аталған іс-шара «Хан-Шатыр» ойын-сауық орталығында өтіп, ойынды елордалықтар кеңінен тамашалады.
– Ойын өте керемет өтті. Әсіресе, Қазақстан үшін қолдау білдіру үлкен мақтаныш. Бұл спорт түрімен 2017 жылдан бері айналысамын. Астанада өткен Азиада-2023 жарысына қатысқанмын. Қазақстан бүгін жеңеді деген ойдамын. Спортшылар әрқашан додаларда бақ сынап жүреді. Менің тіпті олардың жеңетініне ешқандай күмәнім жоқ, – деді жанкүйер Гүлжамал Сұлтанбекова.
Еске салсақ, 1 сәуір күні паралимпиада спортшылары ұлттық командаға 11 лицензия қанжығалады. Алда болатын жарысқа спортшыларымыздың дайындығы қызу жүріп жатыр.
– Алғаш рет Бразилия құрамасы Қазақстанға оқу-жаттығу жиынына келіп жатыр. Оқу-жаттығу жиыны – Парижде өтетін паралимпиада алдындағы дайындық. Команда мықты. Рейтингте біз 6-орынмен тұрсақ, олар 2-ші тұрған топ. Спортта оңай нәрсе жоқ. Бүгінгі ойын шоты теңбе-тең келе жатыр. Қазір оқу-жаттығу шараларымен жүрміз, – деп атап өтті команда спортшысы Берік Аманқосұлы.
Құрама маусым айында Америка Құрама Штаттарына оқу-жаттығу жиынына барса, шілдеде Голландияда өтетін турнирде еліміздің намысын қорғамақ. Халықаралық турнирде паралимпиадаға қатысатын 8 команданың 7-еуі болады. Бапкер дайындықты сәтті жүргізуде.
– Былтыр Голландияда өткен жарыста бұл команданы ұтқанбыз. Дәл осы шотпен бүгін қайталап отырмыз. Негізгі мақсат – паралимпиадада биіктен көріну. Жұмыс белсенді атқарылып жатыр. Бүгінгі іс-шараны ұйымдастырған демеушілерге алғысымызды білдіреміз. Олар Қазақстанда спортты көп дамытуға үлес қосуда, – деді отырып ойнау волейболынан ҚР құрама командасының бас жаттықтырушысы Бауыржан Тахауов.
Жолдастық матчта 3:1 есебімен Қазақстан ұлттық құрамасы жеңісті еншіледі. Алдағы паралимпиада ойыны 28 тамыз бен 8 қыркүйек аралығында өтеді. Додада Қазақстан 9 спорт түрінен ойын көрсетуді жоспарлап отыр. Олар: пара жеңіл атлетика, пара пауэрлифтинг, пара таеквондо, пара үстел теннисі, пара жүзу, пара дзюдо, пара каноэ, отырып ойнайтын волейбол, пара нысана көздеу.
Гүлназ МҰХАНЖАН, Л.Гумилев атындағы
Еуразия ұлттық университетінің студенті
