Елордада алғашқы рет Астана қаласы әкімдігінің қолдауымен аутизмі және ақыл-ой кемістігі бар балаларға арналған «Ерекше әлем» атты жаппай бұқаралық велошеру ұйымдастырылды, деп хабарлайды astana-akshamy.kz
Велошеруде сөз алған №6 Балалар мен жасөспірімдердің мамандандырылған олимпиадалық резерв спорт мектебінің басшысы Бауыржан Өтегенов алдымен балаларды Халықаралық балалар күнімен құттықтап, ерекше жандардың өмірге деген талпыныстары мен спортқа деген құштарлықтарына ризашылығын білдіріп, олардың қоғамдағы рөліне тоқталды.
«Қай халықтың болмасын елдігін, салт-дәстүрін, ата-мекенін болашаққа апаратын бүгінгі жас ұрпағы. Мемлекет басшысы Қасым-Жомарт Тоқаев «Балаларға ерекше назар аудару керек. Себебі олардың амандығы – мемлекетіміздің жарқын болашағының сенімді кепілі», – деп айтқан болатын.
«Міне, бүгінде елімізде ерекше балаларды қосымша біліммен және спортпен қамтамасыз ету бағытына ден қойылып, қабілеттеріңізді шыңдауға барлық жағдай жасалып келеді. Бүгінгідей мәні зор шараның спортқа мүдделі балалардың спорттық әлеуетін дамытуға, олардың қоғамнан шет қалмай, тең дәрежеде барша мүмкіндіктерге қол жеткізе алуына маңызы зор деп санаймын», – деді ол.
Айтулы шараға 50-ге жуық ерекше бала мен олардың ата-аналары қатысты. Олар «Үркер» (Ильинка) тұрғын алабының саябағынан бастап 5 және 10 км қашықтықтарды бағындырды.
Бұқаралық велошеруге немересі Амира Калиеваны қолдауға келген Рысты Қабдуллина алғысын білдірді.
«Бүгінгідей керемет ауа райында ұйымдастырылған велошеруге немереммен келіп отырмын. Мұнда өздерінің балаларын, немеререлерін қолдауға көптеген жандар келіп отыр.
Бәріміз толқып тұрмыз. Бұл – ерекше мүмкіндіктері бар балалар арасында өтіп жатқан алғашқы жарыс. Осындай балалардың дамуы мен спорттағы жетістіктері үшін жағдай жасау, сондай-ақ қоғамның назарынан тыс қалдырмай осындай іс-шараны ұйымдастырған қала әкімдігіне ризашылығымды білдіремін. Біз үшін бұл жарыс емес, мерекелік іс-шара болып саналады», – деді Рысты әже.
Велошерудің соңында әр қатысушы медальмен және «Лимпопо» спорттық дүкені ұсынған сертификаттармен марапатталды.
Бұл іс-шараны Астана қаласы Дене шынықтыру және спорт басқармасы мен «Velolegend» қоғамдық бастамашыл тобы ұйымдастырды.
