Ortalyq memlekettık arhiv janynan 700 myŋ saqtau orny bar jaŋa arhiv qoimasy salynady jäne «Qūjattardyŋ bıryŋǧai elektrondyq arhivı» aqparattyq jüiesı qosylady. Būl turaly bügın QR Mädeniet jäne aqparat ministrlıgınıŋ keŋeitılgen alqa otyrysynda ministr Aida Balaeva aityp berdı, dep habarlaidy astana-akshamy.kz.
«Jädıger qūjattardy saqtap, baptau – bızdıŋ ūrpaqtyŋ enşısındegı qasterlı paryz. Osy rette Ortalyq memlekettık arhiv janynan 700 myŋ saqtau ornyna arnalǧan arhiv qoimasyn salu josparlanyp otyr. Qazır jobalyq-smetalyq qūjattama äzırlenıp, memlekettık saraptamadan ötude. Degenmen, arhiv salasyndaǧy basty mındet – olardy tügel sifrlandyru. Būl jūmys qarqynyn edäuır üdetemız jäne būl menıŋ ministr retındegı eŋ bırınşı qoiyp otyrǧan talabym», – dedı A. Balaeva Qazmedia ortalyǧynda ministrlıktıŋ alqa otyrysynda.
Ministr jahandyq sifrlandyru prosessı arhiv salasyn da ainalyp ötpegenın atap öttı.
«Osy oraida «Qūjattardyŋ bıryŋǧai elektrondyq arhivı» aqparattyq jüiesı äzırlendı. Bügınde būl jüiege 1 591 ūiym qosyldy. Ötken jyly aqparattyq jüie 103 talappen tolyqtyrylyp, jaŋǧyrtyldy. Biylǧy josparǧa säikes memlekettık jäne jergılıktı atqaruşy organdar elektrondy qūjattardy memlekettık saqtauǧa tapsyrady», – dedı A. Balaeva.
Sonymen bırge barlyq vedomstvo men jüielerdıŋ kıtaphanalaryna Qazaqstandyq ūlttyq elektrondyq kıtaphana kezeŋ-kezeŋımen engızıledı. Biylǧy bırınşı toqsanda pilottyq jobaǧa qosylatyn 2 oblystyq kıtaphana bar.
