Äkeler künıne orai elordanyŋ «Janūia» otbasy institutyn qoldau ortalyǧynda «Äke – şaŋyraqtyŋ tıregı» atty merekelık ıs-şara öttı. Otbasy qūndylyǧyn nasihattap, äkelerdıŋ qoǧamdaǧy rölın aiqyndauǧa baǧyttalǧan jiynǧa atalmyş ortalyq kömegıne jügınetın äkeler qatysty.
Is-şarada äkeler institutyn damytu, olardyŋ otbasyndaǧy rölın arttyru, dästürlı otbasy negızderın nyǧaitu, balalardy bırlesıp tärbieleudıŋ, parasatty da sanaly äke boludyŋ jolyn nasihattau baǧytynda bırqatar spiker söz aldy. Solardyŋ qatarynda «Senımen bolaşaq» respublikalyq qoǧamdyq bırlestıgı Astana qalalyq filialynyŋ atqaruşy direktory Şerhan Arapbai, «Janūia» otbasy institutyn qoldau ortalyǧynyŋ aqparat tehnologiialary bölımınıŋ basşysy Berık Nūrdäuletov jäne Astana qalasy «Äkeler keŋesınıŋ» töraǧasy jäne S.Seifullin atyndaǧy №80 mektep-gimnaziiasy «Äkeler keŋesınıŋ» töraǧasy Jalǧas Qūspekov boldy.
– Äke bolu mındetı – adamǧa ata-ana retınde jükteletın ūlttyq mädeniettıŋ jüiesı. Bır äkenıŋ tärbiesın jüz mektep bere almaidy deimız. Iаǧni er-azamattyŋ öz balalaryna qatysty tärbie jūmysyna belsene aralasuy arqyly öz rölın jaqsy tüsınetın äkelerdıŋ tūlǧasy qalyptasady. Olar ūl-qyzdarynyŋ erjetıp eseigenıne män bermeitın, kündelıktı tärbiesıne aralaspaityn, öz jauapkerşılıgıne bei-jai qaraityndardyŋ sanyn azaityp, tıptı äkelık mındetınen bas tartqysy keletınderge ülgı bolyp, onyŋ jolyn körsetedı. Bügınde er-azamattar äkelık mındettı aldymen anasyna, sosyn balabaqşadaǧy tärbieşıge, türlı qoǧamdyq ūiymǧa odan qaldy mektep mūǧalımı, taǧy sol siiaqty tek özınen basqasyna ılıp qoidy. Mūnda bastysy olar özın tüzemese, balasyn da tüzei almaitynyn tüsınu kerek, – dedı J.Qūspekov.
Astana qalasy äkımdıgınıŋ «Janūia» otbasy institutyn qoldau ortalyǧy» KMM köpbalaly, tolyq emes, jaǧdaiy tömen otbasylarǧa, mügedek bala tärbielep otyrǧan otbasylarǧa jäne mümkındıgı şekteulı jandarǧa keşendı keŋes beru qyzmetın körsetedı. Ortalyq kömegıne jügıngenderdıŋ bırı – elordanyŋ Saryarqa audanynyŋ tūrǧyny Aitbai Jaqsybaev.
«Men üş balanyŋ äkesımın. Jalǧyzbasty äke bolǧan soŋ, «Janūia» otbasy instituty qoldau ortalyǧy körsetken kömektıŋ igılıgın körıp otyrmyz. Bızge azyq-tülık sebetı berılıp, ünemı osyndai jiyndardan qalys qaldyrmaidy. Būl jiynda jauapty äke boludyŋ maŋyzy turaly tolymdy pıkırler aityldy» dedı ol.
