Astana qalasy Esıl audandyq polisiia bölımınıŋ tergeuşısı,
polisiia aǧa leitenanty Nūrlan AHMET:
«Men ışkı ıster organdaryndaǧy qyzmetımdı äkemnıŋ jolymen, aldymen kursant bolyp bastadym. Orta mekteptı bıtırgennen keiın Qazaqstan Respublikasy Işkı ıster ministrlıgınıŋ vedomstvolyq joǧary oqu ornyna tüsıp, onda 4 jyl bılım aldym.
Menıŋşe, bızdıŋ qyzmetımızdegı eŋ basty närse – qiyn jaǧdailarda kömek sūraǧan qala tūrǧyndarynyŋ şynaiy alǧysy. Ol üşın polisiia qyzmetkerınıŋ oi-örısı ötkır, tapqyrlyǧy joǧary, qyzmet barysynda kezdesetın barlyq qiyndyqtarǧa tözımdı boluy kerek.
Äkem maǧan polisiia qyzmetkerı bolu jai jūmys emes, ömır salty ekenın ünemı aityp otyratyn. Mamandyǧymyzdaǧy eŋ bastysy – adaldyq, şynaiy berılgendık, adamdarǧa kömektesuge degen qūlşynys ekenın üirettı.
Äkemnıŋ danalyǧy men ösietterı ömırımdegı basty baǧdar boldy. Men äkemnıŋ polisiia qyzmetkerı bolǧanyn ärqaşan maqtan tūtatynmyn. Ol – men üşın ädıldık pen adaldyqtyŋ tamaşa ülgısı.
Äkem Ahmetov Berık Qūşqarūly sanaly ǧūmyryn qūqyq tärtıbın saqtauǧa arnady» deidı ol.
Äkesı ışkı ıster organdarynda 25 jyldan astam eŋbek etıp, köptegen medaldarmen, maqtau qaǧazdarymen marapattalǧan. Qyzylorda oblysy ışkı ıster departamentınıŋ anyqtauşydan qylmystyq ızdestıru bölımınıŋ bastyǧyna deiın türlı qyzmetterdı atqarǧan. Otany men qoǧam igılıgı üşın adal qyzmet etıp, polisiia podpolkovnigı şenımen zeinetkerlıkke şyqty. Äkem bastaǧan ülken qyzmettı jalǧastyryp, äulettıŋ ökılı bolǧanymdy maqtan etemın.
