Qazaq üşın qara şaŋyraq ūǧymy nenı bıldıredı? Äkenıŋ otbasyndaǧy, jalpy er-azamattardyŋ qoǧamdaǧy orny qandai? Balalar auyldy, tuǧan üiın tastap, nege qalaǧa ketedı? Jaqynda Q.Quanyşbaev atyndaǧy Memlekettık akademiialyq qazaq muzykalyq-drama teatrynda premerasy ötken «Patşa köŋılım, ne deisıŋ?!» komediiasy, negızınen, osy saualdarǧa jauap ızdeidı. Tuyndy avtory – halyqaralyq «Alaş» ädebi syilyǧynyŋ iegerı Quanyş Jienbai, qoiuşy rejisserı – Qazaqstannyŋ eŋbek sıŋırgen qairatkerı Nūrlan Jūmaniiazov.
Qazaq balalarynyŋ esımın ūiqastyryp qoiady. Aǧaiyndy Baqbergen, Aqbergen, Şymbergen, Künbergen jäne 4 ūldyŋ ortasynda jalǧyz gül bolyp ösken Güljämilä – qala tūrǧyndary. Olardyŋ qara şaŋyraqqa at ızın salmai ketkenıne köp uaqyt boldy. Osy jaǧdai auylda qalǧan ata-anasy Äbdıräsıl men Şämşägüldıŋ janyna qatty batady. Äsırese äkenı oilandyrady. Onyŋ üstıne auyldastary balalarynyŋ kelmeitının betıne basady. Äke soǧan namystanyp ärı perzentterıne saǧynyşy üdep, bır qulyq oilastyrady. Qarttarǧa qarailasyp otyrǧan körşılerı Qoilybaiǧa «Balalaryma telefon şalyp, menı öldı dep habarla» dep aitady. Qoilybai basynda azar da bezer bolady. Bıraq qariia ony köndıredı.
Jamanat habar jetken balalar kelınderımen bırge jylap-syqtap ata-ananyŋ şaŋyraǧyna keledı. Olardy Qoilybai qarsy alady. Söitse, analarynyŋ üidegı tört tülıkke qaraudan qoly bosamaidy. Qoiylymda ene men kelınderdıŋ mäselesı de qozǧalady. Tört kelın de ärtürlı syltau aityp, enenı qolyna alǧysy kelmeidı. Qazaq «qyz – bauyrmal», «qyz – janaşyr» dep jatady, Güljämilä «anamdy özım alyp ketemın» deidı. Al äkenıŋ tırı ekenı anyqtalyp, şyndyq aşylǧanda, Äbdıräsıldıŋ ötırıkke barǧany myna monologpen berıledı:
«Senderdıŋ ökpeleitınderıŋdı bılgem. Bıraq menıkı qaibır danyşpandyq deisıŋ?! Oilap tapqan amalym osy. Aiyna, jylyna bır ret töbe körsetseŋder qaida qaldyŋdar?! Attyŋ terı sıŋgen er-toqymǧa jylan jolamaidy. Qūrt-qūmyrsqa, jyn-şaitan o bastan. Sol siiaqty äke-şeşenıŋ tūrǧan şaŋyraǧynda eşnärsege ūqsamaityn ǧajap bır tättı iıs bar. «Ölıp», senderdı şaqyryp alǧandaǧy sebebım, maqsatym bır-ekı kün aunap-qunap, sol iıstı sezınse dedım. Al bıraq ol iıstı senderdıŋ ūmytqandaryŋ qaşan… Böten oiym joq, mümkın äkelık saǧynyş degen osy şyǧar. Patşa köŋıldıŋ ne oilaitynyn kım bılsın, qaraqtarym».
Söitıp, küldırıp otyryp jylatatyn qoiylymda dramalyq körınıster molynan kezdesedı. Spektaklge ädettegıdei ekı akterlık qūram tartylǧan. Qos qūramda äke men ana beinesın Qazaqstannyŋ eŋbek sıŋırgen qairatkerlerı Aqyş Omar, Boranbai Moldabaev, Leilo Beknazar jäne Maira Omar somdaidy. Qoilybai rölın Qazaqstannyŋ eŋbek sıŋırgen qairatkerı Asylbek Qapaev pen komediialyq keiıpkerler oŋ jambasyna keletın Dastan Älımov oinaidy. Al balalar men kelınderdıŋ beinesı Qazaqstannyŋ eŋbek sıŋırgen qairatkerlerı Janqaldybek Tölenbaev, Erlan Malaev, Altynai Nögerbek, Syrym Qaşqabaev syndy tanymal akterlermen qatar teatrdyŋ belgılı ärtısterı men jastarǧa jüktelgen. Olardyŋ arasynda bölıp-jaratyny joq, bärı bekıtılgen rölderın jaqsy oinap şyqty. Sahnanyŋ ädemı bezendırıluın de atap ötu kerek. Būl – qoiuşy-suretşı Timur Qoesovtyŋ eŋbegı. Kompozitor Qairat Toqymbetovtıŋ muzykasy da körermendı äserlendıredı.
Q.Quanyşbaev atyndaǧy Memlekettık akademiialyq qazaq muzykalyq-drama teatry jaŋa jylda alǧaşqy qoiylymyn 10 qaŋtar künı ūsynady. Al «Patşa köŋılım, ne deisıŋ?!» komediiasyn 13-14 qaŋtar künderı tamaşalauǧa bolady.
