Astanada zaŋǧar jazuşy Mūhtar Äuezovtıŋ eskertkışı joq. Byltyr klassiktıŋ 125 jyldyǧy tūsynda «Astana aqşamy» gazetı qalamgerdı bas qalada tūǧyrǧa qondyru turaly bastama köterdı. Aldymen şoluşy Aigül Uaistyŋ «Bas qalaǧa Äuezov qaşan keledı?» (№28 (4306), 10 nauryz, 2022 jyl) maqalasy şyqty. Odan keiın hat türınde jazylyp, «Dat» aidarymen jaryq körgen «Elordaǧa Äuezov eskertkışı kerek» (№115 (4393), 29 qyrküiek, 2022 jyl) materialynyŋ soŋyna Äkım Tarazi, Qoişyǧara Salǧaraūly, Tūrsyn Jūrtbai, Uälihan Qalijan bastaǧan körnektı qalamgerler men ǧalymdar, Astana qalasy Qoǧamdyq keŋesınıŋ müşelerı, bas-aiaǧy 12 adam qol qoidy. Bıraq biyl Ükımet nazaryna alsa degen nietpen basylymymyzdyŋ bas redaktory Erkın Qydyrdyŋ «Ūly tūlǧa el törınde tūrsa…» (№132 (4565), 7 qaraşa, 2023 jyl) materialy jaryq körgen soŋ seŋ qozǧaldy.
Jyl soŋynda bızge aqjoltai aqparat kelıp jettı. Astana qalasynyŋ Mädeniet basqarmasy Mūhtar Äuezov eskertkışınıŋ üzdık jobasyna baiqau jariialady. Eskertkış taqyrypqa sai, maǧynaly jäne körkemdık deŋgeiı joǧary boluy tiıs. Konkursqa körkem-öndırıs şeberhanalary, zaŋdy jäne jeke tūlǧalar qatysa alady. Baiqau erejesın atalmyş basqarmaǧa habarlasyp, bıluge bolady. Eskertkıştıŋ jobasy men qūjattaryn qabyldaudyŋ soŋǧy künı – 2024 jyldyŋ 25 qaŋtary. Būl – «Astana aqşamy» gazetı kötergen mäsele şeşımın tapty degen söz. Mūhtar Äuezovtıŋ Alaş qairatkerlerımen pıkırles, müddeles bolǧany belgılı. Solarmen qatar quǧyn-sürgın de kördı. Sol kezde Ahmet Baitūrsynūlynyŋ Äuezovke «Sender keşırım sūraŋdar, aman qalyŋdar» degenı jönınde derek kezdesedı. Jazuşy onyŋ aqylyn tyŋdap, aman qaldy. Esesıne ūlt ädebietı men ruhaniiatyna ölşeusız üles qosty. Basqa eŋbekterın aitpaǧanda, qazaqqa ǧana emes, älemge ūly Abaidy tanytyp kettı. Endeşe eskertkışı elorda törınde qasqaiyp tūratyn retı bar. Tiıstı şeşım şyqty. Endı «Astana aqşamy» gazetı özı kötergen mäselenıŋ tezırek oryndalǧanyn süiınşıleitın kün kelsın dep tıleimız.
