Äuezov mektebındegı äserlı demalys
![](https://astana-akshamy.kz/wp-content/uploads/2024/06/dsc7271-780x470.jpg)
Astanadaǧy M.Äuezov atyndaǧy №86 mektep-gimnaziia janynda balalardyŋ jazǧy demalysyn tiımdı ūiymdastyru maqsatynda jazǧy «Saryjailau» etnolagerı jūmys ıstep jatyr. Lager jūmysy 1 mausymda bastaldy.
Etnolagerdı ūiymdastyrudaǧy maqsat – ūlttyq sana-sezımı qalyptasqan, ūlttyq jäne jalpyadamzattyq qūndylyqtardy özara ūştastyra alatyn ūltjandy tūlǧa tärbieleu. Qazırgı ekınşı kezeŋde oquşylar demalumen qatar ūlttyq dästürlerımızdı tanyp, bılıp, meŋgerude.
– Tılımızdı, dınımızdı, önerımızdı oquşylar bala künınen bastap boiyna sıŋıru kerek. Sonda bız naǧyz qazaqty, ūltjandy azamatty, ūltty körkeitetın qyz ben ūldy tärbieleimız dep oilaimyn. Şeber mūǧalımderımız, äjeler qauymy öskeleŋ ūrpaqqa kiız basudy, jün tütudı, qamşy örudı, basqa da qolönerdı, terımen jūmys ısteudı, ūlttyq taǧamdardy daiyndaudy üiretedı, – dedı M.Äuezov atyndaǧy №86 mektep-gimnaziia direktory Gülmira Oralqyzy.
«Saryjailau» etnolagerınde bırınşı mausymda 300-ge juyq oquşy demaldy. Al qazır jürıp jatqan ekınşı mausymda 200-ge tarta oquşy qamtyldy. Etnolagerge 1-8-synyptyŋ oquşylary baryp jür. Mektep aulasyna 2 kiız üi tıgılgen.
Kün tärtıbı taŋǧy bimen bastalyp, lagerde demaluşylar «Qara jorǧa» biın bileidı. Odan keiın «Salt-dästürlerdı üirenu», «Qolöner», «Ūlttyq taǧamdar», «Qyş önerı» siiaqty şeberlık sabaqtary ötedı. Būǧan qosa, «Ūlttyq dästürın ūlyqtaǧan ūrpaq» taqyrybynda «Äjeler mektebınıŋ» sabaqtary, toǧyzqūmalaq, bes asyq sekıldı ūlttyq oiyndar, robototehnika jäne STEM sabaqtary, dombyra men än sabaqtary ūiymdastyrylady.