Aqmolada jaryq körıp, Astanada 30 jyldan astam uaqyt boiyna basylyp kele jatqan, barşa respublikaǧa taralatyn basylym – «Astana aqşamy» gazetınıŋ biylǧy töl mereke qarsaŋynda süiınşıleter jaŋalyǧy köp. Sonyŋ ışınde eŋ ülken marapat – «Astana aqşamy» gazetınıŋ şef-redaktory, belgılı jurnalist Tölen Tıleubaidyŋ Memleket basşysynyŋ ökımımen QR Prezidentınıŋ BAQ salasyndaǧy syilyǧyn ielenuı.
34 jyl ışınde elordanyŋ töl basylymy ösu-örkendeu kezeŋınen ötıp, qalanyŋ tynys-tırşılıgın, alǧan asulary men jetken jetıstıkterın qalyŋ būqaraǧa jüielı jetkızuşı ǧana emes, el ruhaniiatyndaǧy, halyq taǧdyryndaǧy özektı mäselelerge ün qosatyn, mazmūny baiyǧan, oiy kemeldengen basylymǧa ainaldy. Oqyrmannyŋ ūdaiy üdesınen şyǧuǧa ūmtylatyn basylymnyŋ qol jetkızgen jetıstıgı de bır töbe. Sonyŋ bır dälelı – 2002 jyly «Astana aqşamy» gazetı Qazaqstan jurnalistika akademiiasynyŋ «Altyn jūldyz» syilyǧynyŋ laureaty atandy. Basylym 2018 jyly QR Prezidentınıŋ Alǧys haty men «Nūr Sūŋqar» syilyǧyn aldy.
Bırneşe jurnalisı halyqaralyq jäne respublikalyq konkurstardyŋ laureaty boldy. Osy jyldar ışınde aptasyna 3 ret jaryq köretın gazettıŋ tanymaldyǧy artyp, taralymy köbeidı. Ūjymda är jyldarda eŋbek etken qalamy jüirık jurnalisterdıŋ özındık qoltaŋbasy qaldy. Basylymdy kezınde basqarǧan, bügınde senator Nūrtöre Jüsıp te 1998 jyly Prezident syilyǧyn ielengen bolsa, qazır gazet redaksiiasyn täjıribelı jurnalist, 1999 jyly Qazaqstan Prezidentı syilyǧynyŋ iegerı atanǧan Erkın Qydyr basqaryp otyr. Mıne, endı sol ızben 2024 jyly gazettıŋ qalamy qarymdy jurnalisı, şef-redaktor, «Aqparat salasynyŋ üzdıgı» tösbelgısınıŋ iegerı, «Amanat media syilyǧy-2023» respublikalyq baiqauynyŋ laureaty Tölen Tıleubai osy marapattyŋ iesı atandy. Ol «Jas qazaq ünı», «Altyn orda», «Jas qazaq» gazetterınde, «Qazaqstan temır joly» ūlttyq kompaniiasynyŋ baspasöz qyzmetınde, Premer-ministr keŋsesınıŋ ükımettık basylymdar redaksiiasynda qyzmet atqarǧan.
Elımızdıŋ aqparat keŋıstıgınde özındık salmaǧy, orny bar bas qalanyŋ bas gazetı – Qazaqstan Prezidentı kündelıktı oqyp otyratyn respublikalyq basylymdar qatarynda. BAQ qyzmetkerlerın marapattau räsımınde Prezident Qasym-Jomart Toqaev jurnalisterdıŋ qoǧamdaǧy rölıne erekşe toqtaldy.
«Jurnalist – märtebelı mamandyq. Ol – aqiqat sözdıŋ, ötkır oi men şynaiy pıkırdıŋ jäne ädıl ıstıŋ jaqtauşysy. Sondyqtan bız media salasynyŋ mamandaryna ärdaiym zor qūrmetpen qaraimyz» dedı Memleket basşysy.
Tüptep kelgende, memleket te, jurnalist te ūlt üşın qyzmet etedı, el taǧdyryn şeşuge atsalysady. Ūlt baspasözı men ūlt müddesı qai kezde de özektes bolǧan. Qazır de solai. Elordanyŋ töl basylymy da osy müdde jolynda tabandy qyzmetın jalǧastyra bermek.
