Astanada «Ardagerler ūiymy» RQB Ortalyq keŋesınıŋ keŋeitılgen töralqa otyrysy öttı. Jiynǧa elımızdegı ardagerler ūiymdarynyŋ basşylarymen qatar Astana qalasy äkımınıŋ orynbasary Eset Baiken qatysty.
Bügınde elordada 120 myŋnan astam egde jastaǧy adamdar tūrady, onyŋ ışınde 106 807-sı – zeinet jasyndaǧylar, 13 074-ı – eŋbek ötılı boiynşa zeinetke şyqqandar, jeteuı – ŪOS ardagerlerı, 1473-ı – tyl ardagerlerı. Osy adamdarǧa qalada qandai äleumettık qoldau körsetıletını turaly E.Baiken aityp berdı.
– Ardager qauymyn äleumettık qoldau jospary 8 negızgı baǧyt boiynşa 33 ıs-şarany qamtidy, atap aitqanda, aǧa buyn azamattardyŋ qūqyqtaryn saqtau, materialdyq jaǧdaiyn jaqsartu, jūmyspen köbırek qamtu, olarmen bailanysty densaulyq saqtau jüiesın jetıldıru, äleumettık qyzmet körsetu deŋgeiın arttyru közdeledı. Sondai-aq jospardy jüzege asyru aiasynda emhanalarda geriatriialyq jäne gerontologiialyq kabinetterı aşyldy, mūnda egde jastaǧy adamdardyŋ densaulyǧyna jäne ömır süru jaǧdaiyna köbırek köŋıl bölınedı, – dedı E.Baiken.
Sonymen qatar ol aldaǧy jaŋa jyldan bastap ardagerler men zeinetkerlerge arnalǧan sanatoriiler sanyn köbeitu közdelıp otyrǧanyn jetkızdı. Qalada tūrǧyndar arasynda 4 audanda ornalasqan «Belsendı ūzaq ömır» ortalyqtarynyŋ jūmysy joǧary baǧaǧa ie bolǧan. Besınşı ortalyqty 2024 jyly Nūra audanynan aşu közdelude.
– Bügıngı taŋda «Belsendı ūzaq ömır» ortalyqtaryna 8,5 myŋ qala tūrǧyny tūraqty barady, onyŋ 6318-ı äielder bolsa, 2165-ı – er adamdar. Ortalyqtarda 22 türlı baǧyt boiynşa seksiialar men sabaqtar ötkızıledı. Är ortalyqta trenajer zaldary, kompiuter klastary, vokalmen, şyǧarmaşylyqpen ainalysatyn zaldar bar. Sondai-aq mūndai mekemelerde mädeni ıs-şaralar, iaǧni poeziia keşterı, kıtaptar tūsaukeserı de ötkızıledı. Memlekettık jäne aǧylşyn tılı kurstary da qarqyndy türde jürgızıledı. Qarttardyŋ qyzyǧuşylyǧyna qarai 15 klub aşylǧan. Qabyldanyp jatqan barlyq şaralar aǧa buyn azamattardyŋ belsendı ömır saltyn ūiymdastyruǧa baǧyttalǧan. Mūndai jūmystar jalǧasyn taba beredı, – dedı äkımnıŋ orynbasary.
Eŋbek jäne halyqty äleumettık qorǧau vise-ministrı Nazgül Saǧyndyqova täuelsızdık jyldarynda bükıl älemdegı ürdıske säikes Qazaqstanda 65 jäne odan joǧary jastaǧy adamdar sanynyŋ öskenı baiqalǧanyn jetkızdı.
«Osy jyldyŋ 1 qaraşasyndaǧy jaǧdai boiynşa zeinetkerler sany 2 mln 328 myŋ adamdy qūrady. Qarttarǧa qūrmet pen qamqorlyq körsetu qazaq halqynyŋ ūlttyq mentalitetınıŋ maŋyzdy belgılerınıŋ bırı bolǧan jäne solai bolyp qala beredı» dedı vise-ministr.
2021 jyly atalǧan ministrlıktıŋ būiryǧymen ardagerlerdıŋ jaǧdaiyn jaqsartu jönındegı 2025 jylǧa deiıngı «Belsendı ūzaq ömır» ıs-şaralar jospary bekıtıldı.
