Beibıtşılık jäne kelısım saraiynda Astana qalasy äkımdıgı men Mädeniet jäne aqparat ministrlıgı Arhivter, qūjattama jäne kıtap ısı komitetınıŋ qoldauymen «Astana Archive Fest» halyqaralyq arhivşıler forumy öttı.
Is-şara «Ūlttyq mūraǧat qory jäne mūraǧattar turaly» Qazaqstan Respublikasy zaŋynyŋ jäne Astananyŋ 25 jyldyǧyna arnaldy. Oǧan memleket jäne qoǧam qairatkerlerı, tarihşy ǧalymdar men arhiv ısı salasyndaǧy mamandar qatysty. Forumnyŋ aşylu saltanatynda Astana qalasy Tılderdı damytu jäne arhiv ısı basqarmasynyŋ basşysy Säken Esırkep jiynnyŋ maŋyzyna toqtalyp öttı.
«Elımızde «Ūlttyq mūraǧat qory jäne mūraǧattar turaly» zaŋ 1998 jyly 22 jeltoqsanda qabyldandy. Būl qūjat el igılıgındegı qūndylyqtardy közdıŋ qaraşyǧyndai saqtap, asyl mūralardy bolaşaq ūrpaqqa qaz-qalpynda jetkızuge ärı zertteuge jasalǧan maŋyzdy qadam boldy. Forum barysynda mūraǧat salasyn sifrlandyrudy odan ärı damytu, keiınnen praktikada qoldanudy eskere otyryp, ǧylymi-praktikalyq şeşımder qaralady. Būl rette alys jäne jaqyn şetel memleketterımen arhiv ısı salasynda bırlesken ǧylymi zertteuler jürgızu mäselelerı talqylanady» dedı Säken Esırkep.
Forumǧa memleket jäne qoǧam qairatkerı Darhan Myŋbai qatysyp, arhiv ısı salasyna qatysty zaŋdy älı de jetıldıru kerek ekenın aitty.
«Ūlttyq mūraǧat qory jäne mūraǧattar turaly» zaŋnyŋ qabyldanǧanyna 25 jyl toldy dedık. Bıraq zaŋdy ärqaşan jetıldırıp otyru kerek, bızge de zaman talabyna sai özgerıs qajet. Osyndai jiynda sala mamandarymen bırlesıp, özektı mäselelerge nazar audaru kerek dep oilaimyn. Sonymen qatar bızde arhiv ısındegı materialdyq-tehnikalyq jaǧdaidy jaqsartu mäselesı älı de özektı. Sirek kezdesetın kıtaptar men qoljazbalar qory ärbır oblysymyzda qūrylsa dep oilaimyn. Öitkenı ol jazbalar erteŋ bolaşaqqa qyzmet etedı» dedı Darhan Myŋbai.
Forum barysynda arhiv ısın damytu jäne jaŋǧyrtu, arhiv qūjattaryn elektrondyq-sifrlyq formatqa köşıru, arhiv qūjattaryna qoljetımdılık mäselesı jäne joǧary mamandandyrylǧan kadrlardy daiarlau mäselelerı talqylandy.
Zarina SÄRSENBAIQYZY
