Bügın Qalibek Quanyşbaev atyndaǧy Memlekettık akademiialyq qazaq muzykalyq drama teatrynda saǧat 19:00-de körnektı memleket qairatkerı, aqyn, jazuşy, dramaturg, kompozitor Säken Seifullinnıŋ 130 jyldyǧyna orai «Säken-sūŋqar» spektaklınıŋ arnaiy körsetılımı ötedı. Qoiuşy rejisserı – Qazaqstannyŋ eŋbek sıŋırgen qairatkerı Älımbek Orazbekov. Pesa avtory – Qanat Jünısov.
Atalmyş tuyndy körermen nazaryna 2014 jyldan bastap ūsynylyp keledı. Taǧdyry tar jol, taiǧaq keşumen ötken qairatker halqynyŋ keleşegı jarqyn, nūrly boluyn armandap, azat, erkın ömır süruı üşın kürestı. Alaida ideologiialyq maidandaǧy tartys barysynda özı qūrǧan ökımet Seifullindı aiamady. Qoiylym el qūrmetıne ie bolǧan syrbaz Säkennıŋ ǧūmyr jolynan, ǧibratty ömırınen syr şertedı.
Säken rölın akter, Qazaqstannyŋ eŋbek sıŋırgen qairatkerı Syrym Qaşqabaev somdaidy. Sonymen qatar spektaklge Qazaqstannyŋ eŋbek sıŋırgen qairatkerlerı Bolat Ybyraev, Altynai Nögerbek, Janqaldybek Tölenbaev, Boranbai Moldabaev, akter Samat Baiyrov, Janat Ospanov, Jänıbek Mūsaev, Şah-Mūrat Ordabaev qatysady.
