Qyzylorda oblysynyŋ bılım basqarmasynyŋ kelısımı boiynşa Qyzylorda qalasynyŋ Tötenşe jaǧdailar basqarmasynyŋ qyzmetkerlerı bılım bölımıne qarasty №101 mekteptıŋ oqu ǧimaratynda Asqar Zabikulin atyndaǧy kadet synybyn aşty, dep habarlaidy astana-akshamy.kz
Kadet synybynyŋ oquşylaryna qūtqaruşylardyŋ ülgısı boiynşa arnaiy nysandy kiım jäne äskeri paradqa kietın nysandy kiım äzırlenıp, tıgıldı. Synyp kabinetı arnaiy stendtermen, ört söndıru-qūtqaru qūral-jabdyqtarymen qamtamasyz etıldı.
Asqar Zabikulin atyndaǧy kadet synybyn qūrudaǧy maqsaty – tabiǧi jäne tehnogendık sipattaǧy türlı tötenşe jaǧdailar kezınde jedel ärı dūrys şeşım qabyldau bılımın, daǧdylaryn damytu, ört qauıpsızdıgı salasyndaǧy aldyn alu, zardap şekkenderge alǧaşqy medisinalyq kömek körsetudı üiretu, jas ūrpaqty patriottyq tärbieleu.
Esterıŋızge sala ketsek, 2022 jyldyŋ 16 qaraşasynda Astana qalasynda 15 qabatty üiden ört şyǧyp, saldarynan 3 adam, onyŋ ışınde bır bala auruhanaǧa tüsken bolatyn. Sol oqiǧada bırneşe adamdy qūtqarǧan ört söndıruşı Asqar Zabikulinnıŋ özınıŋ de denesın 80% küiık şalyp, jansaqtau bölımıne jatqyzylǧan edı. Ökınışke qarai, 20 qaraşada ol auruhanada qaitys boldy. Därıgerler onyŋ ömırı üşın bırneşe kün küresken bolatyn.
Osy oqiǧadan keiın, Memleket basşysy erlık körsetken jäne bırneşe adamnyŋ ömırın qūtqarǧan elordalyq ört söndıruşılerdı Qazaqstan Respublikasynyŋ memlekettık nagradalarymen marapattau turaly Jarlyqqa qol qoidy.
Asqar Zabikulin I därejelı «Aibyn» ordenımen marapattaldy. 20 jeltoqsanda oǧan ömırden ötkennen keiın «Altyn adam» syilyǧy tabys etıldı.
28 jeltoqsanda Astana qalalyq mäslihaty şeşımımen erlıkpen qaza tapqan ört söndıruşı Asqar Zabikulinnıŋ esımı jaŋa köşege berıldı.
Sondai-aq, būǧan deiın Astanada erlıkpen qaza tapqan ört söndıruşı Asqar Zabikulin turaly «Qaharman» serialy tüsırıldı.
