«ASTANA» ÄKK» AQ şaǧyn jäne orta biznestı damytu departamentınıŋ direktory Dmitrii Avakians ÖKQ brifingınde biyl elordada qandai jobalar jüzege asyrylyp jatqanyn aitty, dep habarlaidy astana-akshamy.kz
Onyŋ aituynşa, ÄKK biyl investisiialardyŋ jalpy somasy 1 trln teŋge bolatyn 200-ge juyq jobany ıske asyruda. Jobalarǧa tūrǧyn üi, sporttyq, bılım beru, medisinalyq nysandar, sondai-aq öndırıstık, sauda, äkımşılık ǧimarattar salu kıredı.
«ÄKK şaǧyn jäne orta biznestı damytuǧa naqty kömek retınde joba qūnynyŋ 70% mölşerınde önerkäsıptı damytu qoryn qosa qarjylandyrudy tarta otyryp, şaǧyn önerkäsıptık aimaqtardy salu jönındegı joba ıske asyryluda. Bırlesıp qarjylandyrudyŋ jalpy somasy 3,5 mlrd teŋgenı qūraidy. Osy baǧdarlama boiynşa salynǧan jeŋıldıktı jaldau aqysy boiynşa öndırıstık alaŋdar şaǧyn jäne orta biznes subektılerıne berıletın bolady», – dedı Dmitrii Avakians.
Sondai-aq ÄKK Astana qalasynyŋ apattyq jaǧdaidaǧy tūrǧyn üilerın jaŋǧyrtu baǧdarlamasyna qatysady. Osy baǧdarlama şeŋberınde ÄKK būzylatyn tūrǧyn üilerdıŋ ornyna tūrǧyndarǧa qolda bar päterlerdı ūsynady.
«Būzylatyn üilerdıŋ ornynda jaŋa köppäterlı tūrǧyn üilerdıŋ qūrylysy salynady dep boljanuda, al eger qoldanystaǧy qūrylystyŋ tyǧyzdyǧy mümkındık bermese, onda sauda nemese biznes ortalyqtary salynady. Būl baǧdarlamany ıske asyru elordanyŋ kelbetın özgertuge, eskı qūrylystardan aryluǧa, azamattardyŋ tūrǧyn üi jaǧdailaryn jaqsartuǧa, qalanyŋ eskı audandaryn jandandyruǧa kömektesedı», – dep atap öttı ol.
Sonymen qatar ÄKK jeke investorlarmen bırlesıp elordada elektromobilder üşın infraqūrylymdy damytu boiynşa jobalardy ıske asyruda.
«2024 jyl ışınde elordada 80-nen astam elektr zariadtau stansiiasyn ornalastyruda 4 investordan ūsynys tüstı. Elektrmen zariadtau stansiialaryn qyzmet körsetu nysandarymen, sonyŋ ışınde qoǧamdyq tamaqtanu nysandarymen, vendingtık apparattarmen, kütu aimaqtarymen, sanitarlyq üi-jailarmen jäne basqa da ılespe servistermen qalanyŋ eŋ köp baratyn jerlerıne ornatu josparlanuda», – dep tolyqtyrdy Avakians.
Barlyq jobalar zamanaui jabdyqtardy, sonyŋ ışınde otandyq öndıruşıler şyǧarǧan, elektromobilderdı jyldam zariadtaudy, mobildı qosymşalar arqyly tūtynuşylarǧa bailanyssyz qyzmet körsetudı qamtamasyz etetın, halyq jiı qoldanatyn tölem ädısterın qoldana otyryp ornalastyrudy ūsynady.
