23 mausym künı älemde Halyqaralyq Olimpiada künı atap ötıledı. Qazaqstan atalǧan auqymdy şaraǧa 31-ret qatysyp otyr, dep habarlaidy astana-akshamy.kz
Erekşe datany toilau barysynda Qazaqstan Ūlttyq Olimpiadalyq komitetı mereke men olimpiadalyq qozǧalystyŋ maŋyzyn arttyratyn bırqatar ıs-şara ötkızdı.
Merekelık baǧdarlamanyŋ negızgı bölıgı Astanada öttı. Elorda tūrǧyndary bırneşe kün boiy türlı sporttyq ıs-şaralarǧa qatysyp, ǧalamdyq deŋgeide toilanatyn Halyqaralyq Olimpiada künınıŋ bır bölşegı atandy. Būl ıs-şaralarǧa jalpy esebı myŋnan asa adam qatysqan.
Negızgı ıs-şaralar ötken Triatlon saiabaǧyna keluşıler ülken merekenıŋ bır bölşegıne ainaldy. Sporttyq baǧdarlama aiasynda triatlon men 3h3 basketboldan jarystar ūiymdastyryldy.
Triatlon dodasyna 250 adam qatysty. Keiın basketbolşylar estelık syilyqtar üşın özara synǧa tüstı. Odan bölek, körkem gimnastika, breiking, taekvondo jäne bokstan qonaqtarǧa arnaiy körsetılım nömırlerı ūsynyldy.
Merekelık baǧdarlamany breikingten Qazaqstan ūlttyq komandasynyŋ müşelerı aşyp, sahnada öz şeberlıkterın körsettı.
Taekvondo jäne bokstan körsetılım nömırlerın №3 mamandandyrylǧan balalar men jasöspırımderdıŋ olimpiadalyq rezerv mektebınıŋ sportşylary oryndady. Al körkem gimnastikanyŋ sūlulyǧyn №1 balalar men jasöspırımderdıŋ olimpiadalyq rezerv mektebınıŋ gimnastary köpşılık aldynda paş ettı.
«Halyqaralyq Olimpiada künı ūzaq jyldar boiy älem halqyn ortaq emosiiaǧa bölep, jeŋıske degen ūmtylyspen bırıktırıp keledı. Bız ŪOK-te barlyq chempionnyŋ balalyq şaqtan keletının jiı aitamyz, sondyqtan, būl sporttyq merekenı mındettı türde balalardyŋ – bolaşaq chempiondardyŋ arasynda ötkızemız. Qazaqstanda sportqa qatysty bala armandary oryndalǧan keiıpkerler men qaharmandar öte köp. Osy merekenı bızben bırge atap ötken barşaŋyzǧa alǧys aitamyn. Ūlttyq Olimpiadalyq komitettıŋ jäne bızdıŋ ŪOK prezidentı Gennadii Golovkinnıŋ atynan barşaŋyzdy Olimpiada künımen qūttyqtaimyn!» – dedı Qazaqstan ŪOK bas hatşysy Janar Öteşeva.
Sporttyq jarystarǧa qatysuşylardyŋ barlyǧy jarys nätijesınıŋ qandai bolǧanyna qaramastan, HOK prezidentı Tomas Bah pen Qazaqstan ŪOK prezidentı Gennadii Golovkinnıŋ qoly qoiylǧan Olympic Day qatysuşysy sertifikatyn ielenıp, estelıkter syilyqtarmen marapattaldy.
