Bügın elorda Köktal şaǧyn audanynda №24-mamandandyrylǧan ört söndıru bölımı aşyldy. Saltanatty aşylu jäne kılttı tabystau räsımıne QR Tötenşe jaǧdailar ministrı Chingis Arinov, Astana qalasynyŋ äkımı Jeŋıs Qasymbek, Astana qalasy mäslihatynyŋ töraǧasy Erlan Kanalimov, azamattyq qorǧau organdarynyŋ ardagerlerı, elordalyq TJD basşylyǧy men jeke qūramy qatysty, dep habarlaidy astana-akshamy.kz.
Jergılıktı atqaruşy organdardyŋ qoldauymen salynǧan jaŋa ekı qabatty ört söndıru bölımınıŋ jalpy aumaǧy ekı gektardy qūraidy. № 24 mamandandyrylǧan ört söndıru bölımınıŋ tūrǧyndardyŋ qauıpsızdıgın qamtamasyz etudıŋ negızgı radiusy 55 myŋǧa juyq halyq sany bar – «Köktal-1» jäne «Köktal-2» tūrǧyn alaby.
Jaŋa ört söndıru deposynda negızgı jäne arnaiy maqsattaǧy segız bırlık tehnika bar, būl avtosisterna, jyldam äreket etetın avtomobil, biıktıgı 32 metr avtosaty.
Ört söndıru bölımınıŋ negızgı ǧimaratynda tört şyǧuǧa arnalǧan boks, qyzmettık kabinetter, keŋes zaly, oqu mūnarasy, sport jäne oiyn alaŋy ornalasqan. Sondai-aq, depo aumaǧynda elordalyq garnizon qyzmetkerlerı üşın 18 qyzmettık päterge arnalǧan jataqhana qarastyrylǧan.
Ört söndıru bölımımen tanysu barysynda şaqyrylǧan qonaqtar, azamattyq qorǧau organdarynyŋ ardagerlerı bölımnıŋ formuliaryna estelık jazba qaldyrdy.
Bügıngı künı Astana qalasynyŋ ört qauıpsızdıgı 16 bölımşenıŋ küşımen qamtamasyz etıledı. Ört söndıru qyzmetınıŋ qaruynda 200-den astam ört söndıru avtotehnikasy bar, kün saiyn jeke qūramnyŋ 250-ge juyq adamy täulıktık kezekşılıkke tüsedı.
