Astana IT University bılım ordasynyŋ bes jyldyǧyna orai JOO äskeri kafedrasy studentter arasynda AITU Military CTF ziiatkerlık saiysyn ötkızdı, dep habarlaidy astana-akshamy.kz.
Jarys tört baǧyttan tūrdy: Web jüienıŋ osal tūsyn tabu, OSINT zertteu jürgızu, PWN binarlyq osaldyqtardy paidalanu jäne Reverse engineering bastapqy kodyn oqu jäne ony paidalanu. Sol siiaqty kiberşabuyldar oryn aluy yqtimal ūiym üşın şyǧyndar nemese jaǧymsyz saldarlar boiynşa «ıskerlık täuekel» oiynynan ötu kerek boldy.
15 studenttık komanda kiberpoligondaǧy äskeri infraqūrylymdy «būǧattauda» baǧyn synap, biznes täuekelderın zerttedı, sonymen qatar kiberqauıpsızdık boiynşa türlı mäselelerdı şeştı.
Astana IT University äskeri kafedrasy kiberqauıpsızdık siklynyŋ bastyǧy zapastaǧy polkovnik Talaibek Ömırzaqov bılım mekemelerınıŋ qabyrǧasynda mūndai jarys bırınşı ret ötkızılıp otyrǧanyn atap öttı.
– Ötken jyly äskeri kafedra bazasynda kiberpoligon qūryldy, sol jerde CTF formatynda kiberqauıpsızdık boiynşa jarystar ötedı. Qatysuşylar aqparattyq qauıpsızdık mäselelerın şeşude jarysady. Bügıngı jarystyŋ basty maqsaty – studentterdıŋ osy baǧyttaǧy praktikalyq daǧdylardy üirenuı, – dedı ol.
Jarys qorytyndysy boiynşa jeŋımpaz komandalar anyqtaldy. Bırınşı orynǧa 2800 ūpai jinaǧan P3NT4GON komandasy ie bolsa, ekınşı orynǧa 2400 ūpaimen 12 komandasy, al üşınşı orynǧa 2400 ūpai jinap, alaida qarsylasynan uaqyt boiynşa ūtylyp qalǧan M1GU3L komandasy taban tıredı.
– Astana Hub ūiymdastyrǧan jarysqa qatysu menıŋ alǧaşqy täjıribem bolǧan. Tartysty saiysqa äskeri kafedradaǧy vzvod balalarynan qūralǧan komanda bolyp qatystyq. Būl baǧytta jarysqa qatysu öte qyzyqty boldy. Bolaşaqta kiberqauıpsızdık salasynda jūmys ısteudı josparlap otyrmyn, – dedı Astana IT University äskeri kafedrasynyŋ bırınşı kurs studentı Änuar Asqarov.
Is-şara AITU Orchestra jäne AITU Music Club klubtarynyŋ konserttık baǧdarlamasymen aiaqtaldy. Ziiatkerlık saiystardyŋ jeŋımpazdary gramotalarmen jäne baǧaly syilyqtarmen marapattaldy.
