Elımızde tanymal turistık aimaqtardyŋ bırı – Alakölge endı turister Astanadan jäne basqa da öŋırlerden tıkelei poiyzben jete alady, dep habarlaidy astana-akshamy.kz
«Temırjol – elımızdıŋ turizm salasyn damytuda erekşe röl atqarady. Biyl Alakölge Astana, Almaty, Şyǧys Qazaqstan jäne Abai oblysynan tıkelei poiyz qatynai bastaidy. Sondai-aq, alǧaş ret Qyzylordadan 12 baǧyt boiynşa poiyzdardy ıske qosqaly otyrmyz. Onyŋ ışınde 10 baǧyt boiynşa «Jolauşylar tasymaly» AQ poiyzdary jäne ekı baǧytqa jeke tasymaldauşylardyŋ poiyzy jüredı», – dedı Jänıbek Taijanov vedomstvoda ötken brifingıde.
Onyŋ aituynşa, poiyzdardyŋ sany ötken jylmen salystyrǧanda 16 myŋǧa artqan. Jazǧy mausymda jolauşylardyŋ yŋǧailylyǧy üşın 270 myŋ vagon ornymen qamtymaq.
«Ūlttyq tasymaldauşy öz poiyzdaryn auany baptau jüiesımen jabdyqtaidy», – dep sendırdı basqarma basşysy.
«Jolauşylar tasymaly» AQ-nyŋ biyl ıske qosylatyn baǧyttary:
– № 254/253 «Astana-Dostyq»;
– №207/208, №221/222, №211/212 «Almaty-2-Dostyq»;
– №457/458 «Semei-Dostyq»;
– №459/460 «Öskemen-Dostyq»;
– №21/22, № 6942/6941 «Almaty-Dostyq»;
– №21/22, №6942/6941 «Qyzylorda-Dostyq».
Jeke tasymaldauşylardyŋ marşruttary:
– №337/338 «Almaty-2-Dostyq» – «Vagon Service Alliance» JŞS;
– №122/121, №6942/6941 «Astana-Dostyq» – «AraiTrans KZ» JŞS.
«Alaköl baǧytyndaǧy poiyzdar turister arasynda tanymal Jalaŋaşköl, Aqşi jäne Besköl stansiialarynda toqtaidy. Onda jolauşylardyŋ jailylyǧy men qauıpsızdıgın qamtamasyz etu üşın qajettı jaǧdailar jasalǧan. Atap aitqanda, perrondar ūlǧaityldy, kütu zaldary men kassalar jöndeldı. Jolauşylarǧa yŋǧaily bolu üşın stansiialarda kassirlerdıŋ auysymdyq jūmysy ūiymdastyryldy», – dedı J. Taijanov.
