Astana qalasy mäslihatynyŋ osy jyldyŋ soŋǧy kezekten tys sessiiasynda Astana qalasyn 2050 jylǧa deiın damytu strategiiasy jobasy tanystyryldy. Sondai-aq «Astana käsıpkerlıgı» atty 2023-2027 jyldarǧa arnalǧan öŋırlık baǧdarlamasy bekıtıldı. Jiynǧa qala äkımınıŋ orynbasary Evgenii Glotov qatysty.
Strategiia jobasymen Ekonomika jäne biudjettık josparlau basqarmasynyŋ basşysy Qaisar Maŋqaraev tanystyrdy.
– Elordany odan ärı damytu mäselelerı jönındegı keŋeste Memleket basşysy elordany damytu strategiiasyn kreativtı, jaily jäne taza qala qaǧidattaryna negızdep, özektendırudı tapsyrdy. Soŋǧy jyldary Astana qalasy özınıŋ ekonomikalyq modelın investisiia tartu jäne jaŋa salalardy damytu üşın barlyq mümkın bolatyn şaralardy ıske asyru arqyly belsendı türde jetıldırude. Jalpy elorda ekonomikasynyŋ qūrylymyn jetıldıru joǧary tehnologiialyq salalardy, turizmdı jäne infraqūrylymdy damytuǧa baǧyttalǧan. Qabyldanǧan ıs-şaralar jaŋa jūmys oryndaryn aşuǧa, investisiia tartuǧa jäne Astana qalasyn halyqaralyq deŋgeide bäsekege qabılettı etuge mümkındık beredı. Soŋǧy 5 jylda Astana qalasynyŋ halyq sanynyŋ qarqyndy ösuı baiqalady. Osy merzımde halyq sany 276 myŋ adamǧa artty. Osy jyldyŋ 10 aiy ışınde elorda halqynyŋ sany 55 myŋ adamǧa östı. Halyq sanynyŋ qarqyndy ösuı äleumettık jäne injenerlık infraqūrylymǧa salmaq tüsıretının özderıŋız bılesızder, – dedı Qaisar Maŋqaraev.
Onyŋ aituynşa, strategiianyŋ negızgı maqsatynyŋ bırı – elorda tūrǧyndary men qonaqtary üşın jaily jäne qolaily qalalyq ortany qūru. Sol üşın 2024-2026 jyldary 245 infraqūrylym jobasyn ıske asyru josparlanǧan. Sonyŋ ışınde jol-kölık, injenerlık-kommunikasiialyq, tūrǧyn üi jäne äleumettık infraqūrylymdar salalarynda 79 basym joba belgılendı.
Qalalyq İnvestisiialar jäne käsıpkerlıktı damytu basqarmasynyŋ basşysy Halel Äkımjanovtyŋ aituynşa, «Astana käsıpkerlıgı» baǧdarlamasy elordada şaǧyn jäne orta käsıpkerlıktı, önerkäsıptı, saudany jäne turizmdı damytu üşın qolaily jaǧdai jasau maqsatynda äzırlendı. Negızgı basymdyqtary – käsıpkerlıktı yntalandyru, qarjylandyrudyŋ qoljetımdılıgın arttyru, äkımşılık kedergılerdı azaitu, şaǧyn jäne orta biznes infraqūrylymyn damytu, käsıpkerlerdı süiemeldeu. Būl basymdyqtar üş baǧytta jüzege asyrylady. Atap aitqanda, qarjylyq qoldau, infraqūrylymdyq qoldau jäne qarjylyq emes qoldau jolymen ıske asady.
Baǧdarlama aiasynda şaǧyn önerkäsıp aimaqtaryna qatysuşylar, startap jobalar, ısın jaŋa bastaǧan jas käsıpkerler, az qamtylǧan jäne köpbalaly otbasylardyŋ biznes-ideialary qarjylandyrylady. Būl üşın «Astana» äleumettık-käsıpkerlık korporasiiasy janynan jauapkerşılıgı şekteulı serıktestıgı türındegı mikroqarjy ūiymy qūrylady. Būǧan qosa, sauda jäne qyzmet körsetu salalaryndaǧy (meiramhanalar, dämhanalar, dükender, t. b.) käsıpkerlerge nesieler berıledı. Sonyŋ ışınde elordanyŋ dizain-kodyna säikes biznes nysandaryn bıryŋǧai säulet stilıne keltıru maqsaty da qoiyldy. Nesieler 20 AEK-ke deiıngı kölemde, 7 paiyzǧa deiıngı ösımmen 7 jylǧa berıledı.
Būl baǧdarlamada mektepter, balabaqşalar, auruhanalar men emhanalar sekıldı halyqqa qajet äleumettık nysandardy salu eskerılgen. Osy jūmys jergılıktı biudjetten qarjylandyrylady. Al infraqūrylymdyq qoldau köşe saudasyn jürgızu üşın pavilondardy ornalastyru, auyl şaruaşylyǧy jäne taqyryptyq järmeŋkelerdı ūiymdastyru, elektrondy sauda alaŋdaryn, şaǧyn önerkäsıp aimaqtaryn qūru jolymen jüzege asady.
Sondai-aq Halel Äkımjanov biylǧy 31 jeltoqsanda taksi qyzmetı boiynşa memlekettık-jekemenşık ärıptestık şartynyŋ merzımı aiaqtalatynyn jetkızdı. Onyŋ qorytyndysynda 256 mln teŋge ünemdeldı. Jaŋa şartta taksi kölıgınıŋ jalpy sany 100-ge jetetını, onyŋ 36-sy elektromobil bolatyny, jyl saiyn elektromobilder sanyn arttyru josparlanyp otyrǧany, jürgızuşılerdıŋ jalaqysy 250-300 myŋ teŋgege köterıletını aityldy.
Biyl «Sailau turaly» zaŋǧa säikes 2019 jyly sailanǧan Astana qalasynyŋ aumaqtyq jäne uchaskelık sailau komissiialary müşelerınıŋ ökıletı toqtatylady. Sessiia barysynda saiasi partiialar men qoǧamdyq bırlestıkterdıŋ ūsynysy negızınde osy komissiialardyŋ jaŋa qūramy sailandy. Tiıstı baiandamany Astana qalasynyŋ aumaqtyq jäne uchaskelık sailau komissiialaryn sailau jönındegı uaqytşa komissiia töraiymy Altynşaş Tabuldina jasady.
Astanada beibıt jinalystardy ūiymdastyratyn jäne ötkızetın arnaiy oryndar turaly şeşımıne özgerıster engızıldı. Būrynnan bar oryndarǧa taǧy 1 oryn qosyldy. Sonymen, barlyǧy 5 oryn boldy. Būl – Şäkärım Qūdaiberdıūly daŋǧyly men A.Puşkin köşesı qiylysyndaǧy saiabaq, Saryarqa daŋǧylyndaǧy saiabaq, Astanalyq sirk janyndaǧy alaŋ, «Jerūiyq» saiabaǧy jäne «Qalamgerler» alleiasy. Būl turaly qalalyq Işkı saiasat basqarmasynyŋ basşysy Nūrdäulet Älmūhanov baiandady.
Qalalyq Jūmyspen qamtu jäne äleumettık qorǧau basqarmasynyŋ basşysy İlia Skub elordada tūrǧyn üi kömegınıŋ kölemı men ony beru tärtıbıne özgerıster engızılgenın baiandap, onyŋ jaiyn tüsındırdı. Qalalyq Tūrǧyn üi jäne tūrǧyn üi inspeksiiasynyŋ basşysy Änuar Saipov memleket mūqtajdyǧy üşın alynatyn jer telımderı tızımımen jäne būl telımderde qūrylysy jürgızıletın nysandarmen tanystyrdy.
