Elordada mümkındıgı şekteulı azamattardy qoldau boiynşa bırneşe joba jüzege asyp keledı. Sonyŋ bırı – erekşe qajettılıgı bar balalardy ippoterapiia ädısımen oŋaltu jobasy. Bügıngı taŋda «Arǧymaq» at sportymen sauyqtyru ortalyǧyna keluşılerge körsetıletın emnıŋ negızgısı – atqa mıngızu.
Ötken jyldyŋ qazan aiynda elordanyŋ «Arǧymaq» at sportymen sauyqtyru keşenınde erekşe qajettılıgı bar balalardy ippoterapiia ädısımen oŋaltu jobasy ıske qosylǧan bolatyn. Qazırgı taŋda sauyqtyru keşenınde atqarylyp jatqan jūmys az emes.
Ortalyqtyŋ reabilitolog därıgerı, ippoterapevt Aigül Hasenovanyŋ aituynşa, keşen basşylyǧy erekşe qajettılıkterı bar balalardy oŋaltu salasynda täjıribesı bar «Jansaia» äleumettık qyzmet körsetu ortalyǧymen yntymaqtastyq turaly memorandumǧa qol qoidy. Sonyŋ negızınde bügıngı taŋda bırqatar jūmys jüzege asyp jatyr.
– İppoterapiia – erekşe qajettılıkterı bar balalardy emdeu men oŋaltudyŋ tiımdı ädısınıŋ bırı. Atqa mınu arqyly emdeu tırek-qimyl apparatynyŋ būzyluyn, psihikalyq jäne kognitivtı būzyludy qalpyna keltıruge baǧyttalǧan. Būl, ärine, tırek-qimyl apparaty būzylǧan balalarǧa qolaily. Naqty nätijenı körıp jürmız. Är balaǧa bız jeke bır jylqyny taŋdaimyz. Bırınşıden, bız januardyŋ ösuıne qaraimyz. Jylqynyŋ boiy 140-150 sm-den aspauy jäne balanyŋ oǧan otyruyna yŋǧaily boluy üşın tym keŋ bolmauy kerek. Giperkinetika formasy bar balalar jylqynyŋ belıne qaraǧan kezde öte jaqsy tynyştalady. Bız qoldanatyn köptegen ereje bar. Emdeu kursy auruǧa bailanysty 8 seanstan bastalady, qajet bolǧan jaǧdaida odan ärı jalǧasa beredı. Är sabaqtyŋ ūzaqtyǧy – 20 minut, – dedı reabilitolog.
Qanatqaqty jobanyŋ alǧaşqy üş aiynda elordalyq at sportymen sauyqtyru keşenınde 72 bala emdelgen. Mümkındıgı şekteulı balalardy sözge tarta almaǧandyqtan, olardy ertıp jürgen ülkenderdıŋ pıkırın bıluge tyrystyq. Mansūr İsaeva nemeresın ekı aidan berı osynda äkelıp jürgenın, jaŋa ädıstıŋ nätijesız emes ekenın jetkızdı.
– Bız būl jerdegı därısterge üzbei qatysyp kelemız, öitkenı sabaqtar nemereme köp paidasyn tigızdı. Sauyqtyru keşenınıŋ ǧimaraty bızge ūnaidy, būl jer jaŋa, keŋ ärı jaryq. Nūsqauşylar da balalarǧa jaqsy qaraidy. Maǧan äsırese reabilitolog därıger erekşe ūnaidy, sauatty maman. Balany atqa otyrǧyzbas būryn aldymen onyŋ jaǧdaiyn tekseredı, auruyn zertteidı, jalpy balany baqylaidy, sodan keiın ǧana är balaǧa januardy taŋdap, otyrǧyzuǧa rūqsat beredı. Bız qyrküiek aiynan bastap qaladaǧy «Jansaia» oŋaltu ortalyǧyna baryp jürmız. Sol jerdegı därıgerlerdıŋ nūsqauy boiynşa ippoterapiiaǧa joldama alǧanbyz. Ortalyqtan erekşe qajettılıgı bar balalarǧa arnap avtobus bölındı. Būl kölıkpen ata-analar ortalyqqa tırkelgen balalardy ippoterapiia proseduralaryna tegın äkele alady. «Jansaia» äleumettık qyzmet körsetu ortalyǧynda da, «Arǧymaq» at sportymen sauyqtyru keşenınde de būl balalarǧa barlyq qyzmet tegın körsetıledı, – dedı erekşe balanyŋ äjesı.
Bügıngı taŋda ippodromda 20 jylqy bar, olardyŋ 10-y sauyqtyru sabaǧyna belsendı qatysady. İppoterapiia ädısımen erekşe qajettılıkterı bar balalardy oŋaltu boiynşa sabaqty keşen bazasynda seisenbı, beisenbı künderı reabilitolog därıgerler, sondai-aq akkredittelgen ūiymdarda oqudan ötken ippoterapiia salasyndaǧy bılıktı mamandar jürgızedı.
