Astanadaǧy Viacheslav su qoimasy, 2-JEO (TES-2)… Būl – «Mehkolonna-56» JŞS ıske qosqan elordadaǧy strategiialyq maŋyzdy nysandar. Osy käsıporyndy jarty ǧasyrdan astam KSRO Qūrmettı energetigı, Qaz KSR eŋbek sıŋırgen energetigı, Astana qalasynyŋ Qūrmettı azamaty Bolat Quanyşev basqardy. Jalpy Bolat Sūltanūlynyŋ bas qalanyŋ energetikalyq keşenınıŋ qalyptasuyna, elordanyŋ güldenıp, körkeiuıne qosqan ülesı zor. Keiıpkerımız 1999-2003 jyldary Astana qalasy mäslihatynyŋ II şaqyrylymynyŋ deputaty boldy. Osy kezeŋde bas qalanyŋ bolaşaqqa degen qaryşty qadamdary bastalyp, astananyŋ damuyna negız qalaǧan talai maŋyzdy ıster jasaldy. Sonyŋ basy-qasynda Bolat Sūltanūly jürdı.
Bolat Quanyşev – aşarşylyqtyŋ soŋy quǧyn-sürgınge ūryndyrǧan ötken ǧasyrdyŋ otyzynşy jyldarynyŋ perzentı. Eŋbekpen eseigen azamattyŋ anasy ozat jūmysşy bolyp, halyq şaruaşylyǧy jetıstıkterı körmesıne (VDNH) qatysty. Al naǧaşysy Rysbek Darimanov sol zamandaǧy oqyǧan azamattardyŋ bırı edı. Alaida Ekaterinburg universitetın bıtırıp, Soltüstık ölkenıŋ jer komitetın basqaryp jürgende repressiiaǧa ūşyrady. Anasy bala Bolatqa «Sen mınezıŋ men ıskerlık qabıletıŋmen naǧaşyŋa ūqsaisyŋ» deitın. Sol aitqandai, ıskerlıgı erte bılınıp, qarapaiym jūmysşydan käsıporyn basşysyna deiın köterıldı.
Bolat Sūltanūlynyŋ eŋbek jolynyŋ bastaluy tyŋ igerudıŋ alǧaşqy jyldaryna säikes keldı. Osydan 70 jyl būryn Atbasar audany Borisovka eldı mekenı Lenin atyndaǧy kolhozda traktorşy bolyp jürgende tyŋ igeruşılerdıŋ bırınşı legın qarsy aldy. Sol uaqytta audandyq komsomol komitetınıŋ biuro müşesı edı, sondyqtan osy ūiymnyŋ bırınşı hatşysy Viktor Polianskimen bırge audandaǧy bükıl şaruaşylyqtardy aralap, tyŋ igeruşılerdıŋ jaǧdaiymen tanysty.
Mehanizasiia men elektrlendıru tehnikumyn bıtırdı. Telman atyndaǧy sovhozda avtopark, şeberhana meŋgeruşısı, bas injenerdıŋ mındetın atqaruşy boldy. Jalpy Bolat Quanyşev – ärqaşanda özın jetıldırgen azamat. Tehnikumnan keiın halyq şaruaşylyǧy institutyn, KSRO Energetika ministrlıgı janyndaǧy joǧarǧy tehnikalyq mekteptı aiaqtady. Ol basqarǧan «Mehkolonna-56» käsıporny keşegı Selinograd – Aqmolanyŋ, bügıngı Astananyŋ energetika keşenın jolǧa qoiǧanmen qatar Torǧai, Qostanai, Qaraǧandy, Jezqazǧan öŋırlerınıŋ şaruaşylyqtaryn bıryŋǧai memlekettık energiia jüiesıne qosyp, Ekıbastūz – Selinograd elektr taratu jelısın saldy. Būǧan qosa, alyp odaq ışındegı Mäskeu, Lipesk, Tambov, Vladimir oblystarynyŋ bırqatar şaruaşylyqtarynyŋ osy jüiege qosyluyna atsalysty. Al Aqmola Astana atanǧanda osynda tört qosalqy stansa saldy. Būl stansalarǧa ataqty Siemens kompaniiasynyŋ qūral-jabdyqtaryn ornatty. Osy stansalarǧa qosa, ondaǧan şaqyrym elektrkabelder tartyldy.
Bolat Quanyşev Astana qalasy mäslihatynyŋ II şaqyrylymynyŋ deputaty bolǧanda ärıptesterı ony tūraqty komissiianyŋ töraǧasy etıp sailady. Osy şaqyrylym deputattarynyŋ qyzmetı jas astananyŋ belsendı qūrylysy kezeŋımen säikes keldı. Sessiialarda deputattar elordany abattandyru, tiıstı infraqūrylymdy äzırleu, tūrǧyn üi qūrylysy, joldardy jöndeu mäselelerın şeşumen ainalysty. Sol kezeŋde Astana tūrǧyndarynyŋ ömırıne qolaily jaǧdailar jasauǧa, astanalyqtardyŋ äl-auqatyn arttyruǧa baǧyttalǧan äleumettık jäne ekonomikalyq damu baǧdarlamalaryn bekıttı. Kölık infraqūrylymyn damytu, eskı jäne apatty tūrǧyn üilerdı süru, şaǧyn käsıpkerlıktı damytu men qoldau, Astana qalasynda ipotekalyq nesieleu jäne tūrǧyn üi qūrylysyn damytu baǧdarlamasy, 2010 jylǧa deiıngı Astana qalasynyŋ ortalyqtandyrylǧan jylumen qamtamasyz etu baǧdarlamasy, t.b. ūzaqmerzımdı baǧdarlamalar bekıtıldı. Kise Kurokava äzırlegen Astana qalasyn damytudyŋ Bas josparyn däl osy şaqyrylym deputattary bekıtıp, Ükımetke jıberdı. Ärine, osynyŋ bärınıŋ basy-qasynda Bolat Sūltanūly da jürdı.
Elektrlendıru men ekologiia. Būl – keiıpkerımız erekşe den qoiǧan salalar. Elordanyŋ jasyl jelekke oranyp, abat qalaǧa ainaluyna da Bolat Quanyşevtıŋ qosqan ülesı zor. Käsıporyn basşysy öz kezınde «Mehkolonna-56» aumaǧyn tynysty keŋeitetın ormanǧa ainaldyrdy. Bır jyldary Şyǧys Qazaqstan oblysynan şyrşalardy aldyrdy. Serıktestık aumaǧynda osy künderı qaiyŋ, üieŋkı, şeten, emen, terek jaiqalyp tūr. Qart jurnalist Moisei Goldbergpen bır äŋgımesınde Bolat Sūltanūly käsıpkerlerdı jaŋa saiabaqtar men gülbaqtardyŋ qūrylysyna investisiia saluǧa şaqyrdy.
Özı basqarǧan käsıporyn qyzmetkerlerınıŋ äleumettık jaǧdaiyna, jaily tūrmysyna, janǧa rahat syilaityn demalysyna şeiın erekşe köŋıl bölgen bır basşy bolsa, būl – Bolat Quanyşev. Alyp odaq qūlaǧanda käsıporyndy saqtap qalǧanmen qatar bırde-bır jūmysşyny qysqartpady. Olardyŋ bärın de pätermen qamtamasyz ettı. Sonymen qatar T.Bigeldinov köşesınde qonaq üi, Astana ırgesınde jūmyskerler demalatyn «Nūra» demalys üiın saldy. «Mehkolonna-56» mekemesınde jūmys ıstep, basqa elge qonys audarǧandar Astanaǧa kelgende olardyŋ demalysyna da jaǧdailar jasalǧan kezder bolǧan. Mäselen, «EKSPO-2017» halyqaralyq mamandandyrylǧan körmesı uaqytysynda Germaniiadan elordaǧa kelgen ekı būrynǧy qyzmetkerdıŋ qonaq üige ornalasuy da, tamaqtanuy da tegın boldy.
2002 jyldyŋ 26 mausymynda Bolat Quanyşevqa elordanyŋ energetikalyq keşenı, äleumettık salasynyŋ damuyna qosqan orasan ülesı jäne belsendı qoǧamdyq qyzmetı üşın Astana qalasynyŋ Qūrmettı azamaty ataǧy berıldı. Aqmola öŋırınde düniege kelıp, tuǧan jerge tuyn tıgıp, tuǧan qalasynyŋ örkendeuı jolynda aianbai eŋbek etken azamat üşın būl – laiyqty marapat.
