Astana qalasynyŋ Esıl audandyq Belsendı ūzaq ömır süru ortalyǧynyŋ zeinetkerlerı köptegen ıs-şaralarǧa qatysyp, qoǧamdyq tūrǧyda belsendılık tanytyp jür.
Jalpy osy ortalyqqa kırgen saiyn barlyq qyzmetkerlerdıŋ zeinetkerlermen qarym-qatynasy, qyzmet körsetulerı erekşe ekendıgınıŋ kuäsı bolyp jürmın. Mäselen, Qazaqstan halqynyŋ bırlıgı künıne orai «Yntymaǧy jarasqan» degen ataumen ūiymdastyrylǧan tamaşa konserttık baǧdarlama, Analar künı merekesıne «Analar älemı» suret körmesı jäne «Qolöner – toqyma» şeberlık sabaǧy, sonymen qatar «Batyr analar – el maqtanyşy» atty «Altyn alqa», «Kümıs alqa» belgısı bar analardy qūrmetteuge arnalǧan ıs-şaralar köptıŋ köŋılınen şyqqanyna kämıl senımdımın.
Astana qalasy M.Ötemısov atyndaǧy Oquşylar saraiynda «Ūrpaqtar sabaqtastyǧy» jobasy aiasynda Astana qalasy ardagerler keŋesınıŋ jäne Esıl audandyq Belsendı ūzaq ömır süru ortalyǧynyŋ ūiymdastyruymen «Ardagerler köktemı» atty köktem merekelerıne arnalǧan festival öttı. Is-şarada zeinetkerlerden qūralǧan halyqtyq jäne öner ansamblderı öner körsettı. Qatysuşy öner ūjymdaryna Astana qalasy äkımınıŋ atynan alǧys aitylyp, «Yqylas gülı» ūsynyldy.
Sonymen qatar «Syr sandyq» erıktı zeinetkerler ziiatkerlık kluby ūiymdastyrǧan «Ne? Qaida? Qaşan?» 6-şy intellektualdyq turnirı köktemgı oiyny bolyp öttı. Mūnda Esıl, Nūra, Baiqoŋyr, Saryarqa, Almaty zeinetkerlerı bas qosty. Is-şarany Esıl audandyq bölım basşysy Janar Esenamanova qūttyqtau sözben aşty. Kezegımen söz alǧan zeinetkerler arasyndaǧy intellektualdyq bılımdıler turnirınıŋ alǧaşqy ūiymdastyruşysy, jetekşısı Seidalin Bolatbek qatysuşy komandalarǧa sättılık tıledı. «Aqyl köpke jetkızer, öner kökke jetkızer» maqsatymen ötken köktemgı oiynda Esıl jäne Baiqoŋyr audandary finalǧa şyqty. Final qorytyndysy boiynşa Baiqoŋyr audany kubokqa ie boldy. Esıl audany boiynşa ekınşı märte qazaq tılınde ötken bılımdıler turnirı köpşılıktıŋ köŋılınen şyqty.
Esıl audany Belsendı ūzaq ömır süru ortalyǧynyŋ ūiymdastyruymen zeinetkerler tarihtyŋ qaraly betın eske tüsıretın oryndardyŋ bırı Aqmol kentınde ornalasqan saiasi quǧyn-sürgın jäne totalitarizm qūrbandaryn eske aluǧa arnalǧan «ALJİR» mūrajaiyna saiahatqa bardyq. Būl saparymyzda elu oryndyq avtobusty tegın ūiymdastyryp, bızge sät-sapar tılep şyǧaryp salǧan Janar Esenamanovaǧa, bızdıŋ basy-qasymyzda bolyp, beine balalaryna qamqorlyq qylǧandai jan-tänımen jügırıp jürgen Gülşat Aubakirovanyŋ eŋbekterıne tabys, denderıne saulyq, otbasylyq baqyt tıleimın.
Ärine, audandyq Belsendı ūzaq ömır süru ortalyǧynyŋ dūrys jūmystary turaly älı de köp jaza beruge bolar edı. Būl ortalyqta qoǧamdyq tūrǧydan belsendı zeinetkerler öte köp. Olar Astanada ötıp tūratyn qoǧamdyq-saiasi, äleumettık-ruhani ıs-şaralarǧa tūraqty qatysyp keledı. Osyndai ortalyq aşyp, zeinetkerlerge qoǧammen aralasu üşın jaǧdai jasap bergen Astana qalasynyŋ äkımdıgıne aitar alǧysymyz şeksız. Sonymen qatar mekeme jūmysyn şynaiy janaşyrlyqpen ūiymdastyryp jürgen Mūhtar Erketaevqa da rizaşylyǧymyzdy bıldıremız.
Tüiındep aitqanda, zeinetkerler üşın osyndai jaǧdai jasala berse, aǧa ūrpaqtyŋ qoǧamǧa bererı älı de köp bolar edı. Şyn mänınde, elordamyzda belsendı zeinetkerler köbeiıp keledı.
Küläş ŞÜRENOVA,
ardager-ūstaz, Bılım beru ısınıŋ üzdıgı
