Keşe Astana qalasy mäslihatynyŋ kezekten tys sessiiasynda elordanyŋ 2023 jylǧa arnalǧan biudjetınıŋ atqaryluy turaly būǧan jauapty jergılıktı atqaruşy organdarynyŋ esebı tyŋdaldy. Astana qalasy äkımınıŋ orynbasary Evgenii Glotov qatysqan jiynda bas qalanyŋ jaŋa audanynyŋ Saraişyq atauy da bekıtıldı. Endı būl şeşım respublikalyq onomastika komissiiasyna joldanady.
Alǧaşqy baiandamany qalalyq Qarjy basqarmasynyŋ basşysy Älıbi Jūmaev jasady. Ol byltyrǧy biudjettıŋ mölşerı boiynşa, şyǧystary turaly esep berdı. Sonyŋ ışınde paidalanylmaǧan qarajattyŋ 37,3 paiyzy Otyn-energetikalyq keşenı jäne kommunaldyq şaruaşylyq basqarmasyna tiesılı bolǧanyn atap öttı. İgerılmegen qarjy jasalǧan kelısımşarttaǧa säikes ünemdeuden paida boldy.
Sondai-aq Qūrylys basqarmasy biudjetınıŋ 36,3 paiyzyn igermegen. Oǧan negızgı sebep – oryndalǧan jūmystardyŋ aktılerın ūsynbau. Tötenşe jaǧdailar departamentı igermegen biudjetınıŋ 5,5 paiyzy tynys alu apparatyn jetkızuşınıŋ kelısımşartty oryndamauynan oryn alǧan. Kölık jäne jol-kölık infraqūrylymyn damytu basqarmasynyŋ paidalanylmaǧan biudjetınıŋ 5,3 paiyzy keibır materialdardyŋ qymbattauy saldarynan jobalarǧa tüzetu engızılgenınen bolǧan. Bılım basqarmasy eŋbekaqy töleu qorynan qarjy ünemdegen. Soǧan bailanysty basqarma biudjetınıŋ 4,7 paiyzy paidalanylmady.
Ekonomika jäne biudjettık josparlau basqarmasynyŋ basşysy Qaisar Maŋqaraev 2021-2025 jyldarǧa arnalǧan Astana qalasyn damytu jospary boiynşa ötken jyly atqarylǧan jūmystarǧa toqtaldy. Sonyŋ ışınde byltyr 3 baǧyt boiynşa 106 nysanaly indikatordy oryndau közdelgenın atap öttı. Onyŋ 71-ıne qol jetkızıldı, 16-sy oryndalmady, 11 indikator boiynşa statistikalyq derekter joq.
Üş baǧyttyŋ bırınşısı – elorda tūrǧyndarynyŋ äl-auqaty men ömır süru sapasyn arttyru. Būl baǧytta jaŋa käsıporyndardy aşu, jūmys ıstep tūrǧandardy damytu esebınen 62 myŋ jaŋa jūmys orny qūryldy. Jūmyssyz azamattardy tegın oqytu boiynşa jūmys jalǧasty. 2021-2025 jyldarǧa arnalǧan käsıpkerlıktı damytu jönındegı ūlttyq jobasy aiasynda ötken jyly jalpy qūny 88 mlrd teŋge qūraityn 1 myŋ 262 joba maqūldandy.
– Qalada tırkelmegen, eŋbek jäne praktikalyq daǧdylary joq azamattardy jūmyspen qamtu maqsatynda «JOLTAP» jobasy ıske qosyldy. Bılım beru salasynda 2-6 aralyǧyndaǧy balalardy mektepke deiıngı tärbiemen jäne oqytumen 68 myŋ bala, 3-6 jas arasynda 64 myŋǧa juyq bala qamtyldy. 2023 jyly ekı auysymdyq 15 myŋ oryndyq 12 mektep paidalanuǧa berıldı. «Jaily mektep» ūlttyq jobasy boiynşa elordada 2024-2027 jyldary 89 myŋ oryndy qūraityn 24 mektep salynady. Densaulyq saqtau salasynda 900-ge juyq medisina qyzmetkerı bılıktılıktı arttyru kurstarynan öttı. 2023 jyly 6 medisinalyq ūiymda kürdelı jöndeu jūmystary jürgızıldı, 708 medisinalyq tehnika satylyp alyndy. Vedomstvolyq baǧynysty ūiymdardyŋ tehnikalyq jabdyqtaluy 100 paiyzdy qūrady, – dedı Qaisar Maŋqaraev.
Baiandamaşy «Ömır süruge jaily qala – adamdarǧa arnalǧan qala» atalatyn ekınşı baǧyt boiynşa byltyr 660,8 mlrd qūraityn 58 ıs-şara qarastyrylǧanyn jetkızdı. Ötken jyldyŋ qorytyndysy boiynşa paidalanuǧa berılgen üilerdıŋ jalpy audany 3,8 mln şarşy metrdı qūraǧanyn, mūqtaj azamattarǧa 374 tūrǧyn üi sertifikaty berılgenın atap öttı. Sonyŋ ışınde «Elorda qūrylys kompaniiasy» JŞS üleskerlık qūrylystaǧy 7 problemalyq üidı paidalanuǧa berdı.
Basqarma basşysynyŋ sözınşe, kölık infraqūrylymyn jaqsartu üşın 53 şaqyrym jolǧa ortaşa jöndeu jürgızıldı. Jaqsy jäne qanaǧattanarlyq jaǧdaidaǧy qalalyq maŋyzy bar avtokölık joldarynyŋ ülesı 93 paiyzǧa jettı. Sumen jabdyqtau jäne su būru boiynşa 12 joba ıske qosyldy.
– «Zamanaui, bäsekege qabılettı qala» atty üşınşı baǧytqa 28,9 mlrd teŋge bölındı. 2023 jyly Astana qalasynyŋ jalpy öŋırlık önımınıŋ kölemı 12,9 trillion teŋgenı qūrap, 5,4 paiyzǧa deiın östı. Jan basyna şaqqandaǧy jalpy öŋırlık önımnıŋ kölemı 9,2 million teŋgeden asty, – dedı Qaisar Maŋqaraev.
Sondai-aq baiandamaşy ötken jyly elordanyŋ negızgı kapitalyna salynǧan investisiia kölemı 6,6 paiyzǧa ösıp, 1,6 trln teŋgege jetkenın, qala ekonomikasynda negızgı ülestı şaǧyn jäne orta biznes alatynyn, būl 68,9 paiyzdy qūraitynyn jetkızdı. Būl ortaşa respublikalyq körsetkışten 2 ese artyq ekenın aitty.
– Jūmys ıstep tūrǧan şaǧyn jäne orta biznes subektılerınıŋ sany 11,2 paiyzǧa ösımmen 227 myŋǧa artty. Mūnda 522 myŋ adam jūmys ısteidı. Būl – qalanyŋ ekonomikalyq belsendı halqynyŋ 75 paiyzy. Qabyldanǧan jaŋa memlekettık josparlau jüiesın eskere otyryp, elordany damytudyŋ jaŋa jospary äzırlenedı, – dep tüiındedı sözın Qaisar Maŋqaraev.
Jiynda Astana qalasy boiynşa Tekseru komissiiasy töraǧasynyŋ mındetın atqaruşy Säbit Mūqanovtyŋ, qalalyq mäslihattyŋ ekonomika, önerkäsıp jäne käsıpkerlık mäselelerı jönındegı tūraqty komissiia töraǧasy Kendebai Adambekovtıŋ esepterı tyŋdaldy. Qalalyq mäslihat deputattary biudjettıŋ atqaryluy boiynşa pıkırlerı men ūsynystaryn jetkızdı.
Jaŋa audanǧa atau beru boiynşa qalalyq Tılderdı damytu jäne arhiv ısı basqarmasynyŋ basşysy Säken Esırkep baiandama jasady. Kölık jäne jol-kölık infraqūrylymyn damytu basqarmasy basşysynyŋ orynbasary Erjan Diqanbaev qaladaǧy äleumettık maŋyzy bar baǧdarlardyŋ tızımımen tanystyrdy. Onyŋ aituynşa, byltyr jaŋa 400 avtobus satyp alynǧannan keiın jaŋa 11 baǧdar aşuǧa mümkındık tudy. Būl – 27, 42, 49, 57, 66, 84, 85, 121, 327, 328, 329 baǧdarlar. Sessiiadaǧy soŋǧy mäsele memleket mūqtajdyǧy üşın alynatyn jer telımderımen Tūrǧyn üi jäne tūrǧyn üi inspeksiiasy basqarmasynyŋ basşysy Änuar Saipov tanystyrdy.
