Biyl elordada mektep oquşylaryn jazǧy demalyspen qamtuǧa erekşe köŋıl bölınıp otyr. Bügıngı taŋda Astana qalasynyŋ bılım beru ūiymdarynda 97 mektep janyndaǧy lager, 75 beiındık jäne 21 etno-lager jūmys ısteidı. Lagerler sauyqtyru jäne eŋbek etu baǧyttary boiynşa ekıge bölıngen. Ol ışınara taǧy bırneşe baǧytqa bölınedı. Atap aitqanda, beiındık lager, mektep janyndaǧy lager, etno-lager jäne sporttyq lager.
Elordanyŋ №91 mektep-gimnaziiasynyŋ jazǧy lagerı erekşe ötude. Jaqynda bız lager jūmysymen tanysyp, baqytty balalyq şaqtyŋ mekenın tamaşalap qaittyq.
Mektep-gimnaziia direktory Almagül Segızbaidyŋ aituynşa, ūjym nauryz aiynan bastap balalardyŋ jazǧy demalysyna daiyndala bastaǧan. Onyŋ barysynda mūǧalımder köptegen şyǧarmaşylyq ūsynysyn aityp, öz jobalaryn ärıptesterınıŋ aldynda qorǧady. Nätijesınde lager baǧdarlamasyna ūlttyq, şyǧarmaşylyq, akademiialyq, sporttyq jäne eŋbek baǧyttary engızıldı. Osylaişa, demalys baǧdarlamasy aluan türlı ärı qyzyqty etıp ūiymdastyryldy. Är lager künınıŋ taqyryby erekşe merekelık köŋıl küidı syilap, oquşylardy paidaly ıs-şaralarǧa qosyluǧa şaqyrady. Oqu ornynyŋ aulasynda ornatylǧan ülken aq kiız üi jäne mektep zalyndaǧy kışıgırım kiız üi airyqşa öŋ berıp tūr. Ǧimarattyŋ ışınde köptegen jarqyn suretter bar, olar mekteptıŋ ūstanatyn baǧytyn da, lingvistikalyq beiımdılıgın de körsetedı. Onda oquşylar aǧylşyn jäne nemıs tılderın, sondai-aq fakultativtı fransuz jäne arab tılderın tereŋ meŋgeredı.
Mektepte 2200 bala oqidy, olardyŋ 500-ı qazır jazǧy lagerge qatysady. Sonymen qatar balalar sany ösıp keledı. Lagerdıŋ jazǧy auysymy mausym men şılde ailaryna sozylady, al ötınımder sany köp bolǧan jaǧdaida, tamyzda da jalǧaspaq. Osylaişa, mektep balalardy kez kelgen talǧamǧa sai köptegen ıs-şaraǧa qyzyqtyra alady.
– Jaz – būl bırınşı kezekte oqu pänderın üiretuden būryn köŋıldı oiyndarǧa, qyzyqty ıs-şaralarǧa jäne jaŋa orta tabuǧa jol aşatyn uaqyt. Qazırgı jaǧdaida balalarǧa bılım berıp qana qoimai, olardyŋ jan-jaqty damuyn qamtamasyz etu maŋyzdy. Oquşylarǧa arnalǧan jazǧy lager mındettı türde ūlttyq qūndylyqtardy üiretu, beiındık oqytu jäne tärbieleu tūjyrymdamasyn bırıktıredı. Bızde «Jazǧy-camp» mektep janyndaǧy lagerı, «Etno-camp» ūlttyq lagerı, «Baqyt-camp» beiındık lagerı jūmys ısteidı, olardyŋ ärqaisysynda ärtürlı baǧdarlama ūsynylady, – dedı Almagül Segızbai.
Kielı kiız üide
Mektep aulasyndaǧy kiız üidıŋ bezendırıluı, mūndaǧy kılem, körpe, döŋgelek üstel, ūlttyq aspap türlerı, aq jaulyqty äjeler qūddy bır auylda jürgendei äser beredı. Mūǧalımder oquşylarmen bırge ūrşyq iırıp, toǧyzqūmalaq oinaidy, ūlttyq oiu-örnekterdı oiyp, qamşy örudı, bauyrsaq pısırudı üirenedı. Balalar tek ana tılınde söilep, memlekettık tıl keŋınen nasihattalady. Ūlttyq kiımdegı äjeler – «Aq kimeşek äjeler – babalar amanaty» qoǧamdyq ūiymynyŋ ökılderı. Olar balalarǧa ūlttyq qolöner boiynşa şeberlık sabaǧyn ötkızedı, asyq atu, arqan tartu oinaidy. Tabandylyqty qajet etetın ıs-şaralar belsendı oiyndarmen jalǧasyp, osylaişa balalardyŋ jan-jaqty damuyna septesedı. Lagerdıŋ bır künınde-aq jasöspırımder jaŋa daǧdyny meŋgeredı. Söitıp, kiız üi jazǧy lagerdıŋ tartymdy ortalyǧyna ainaldy.
Qyzyqty baǧdarlama
Jazǧy mausym kezeŋınde mekteptıŋ oqu auditoriialarynda lager jasaǧyndaǧy tırşılık te qainap jatyr. Toptardyŋ atauy ärtürlı ärı tereŋ maǧynaǧa ie. «Jalyn», «Jūldyz», «Bolaşaq» «Barys» jäne basqalary bar. Oquşylarǧa būl ataulardyŋ nelıkten taŋdalǧany, olardyŋ öskeleŋ ūrpaqqa jäne el tarihyna qandai qatysy bar ekenı tüsındırıledı. Jasaqtardyŋ ūrandary, söilegen sözderı ataulardyŋ mänın aşady. Mektep baǧdarlamasy jalpyadamzattyq jäne ūlttyq qūndylyqtardy boiyna sıŋırgen eŋbekqor, adal, sanaly, jasampaz azamatty tärbieleuge baǧyttalǧan «Bırtūtas tärbie» baǧdarlamasyna negızdeledı.
Bız lagerdıŋ bır künınde oquşylarmen bırge bolyp, balalardyŋ şyǧarmaşylyǧymen tanystyq. Olar qolöner būiymdaryn jasap, boiaularmen suret salyp, türlı applikasiiada ertegı keiıpkerlerınıŋ beinesın mūǧalımdermen bırge qiyp, özderı jelımdedı. Tanymdyq jūmys kezınde oquşylar şapşaŋ söileudı üirenedı, oqu jyldamdyǧyn damytady, toptyq jūmysqa beiımdeledı.
Endıgı bır kabinette balalar zertteu jūmysymen ainalysty. Mūnda balalar aǧylşyn tılınde ekologiialyq jobalardy qorǧap, tūqymnyŋ önuınen bastap kompost daiyndauǧa deiıngı ösımdıkterdıŋ vegetasiialyq kezeŋderın meŋgeredı. Soŋǧy kezeŋde olar mektep aulasyna köşet otyrǧyzady jäne öz eŋbegınıŋ nätijesın köre alady.
Taǧy bır auditoriiada bızdı su tazartu qondyrǧysynyŋ ülgısın ūsynǧan jas ǧalymdar qarsy aldy. Olar qauıpsızdık tehnikasyn saqtai otyryp, mūǧalımdermen bırge «türlı tüstı lava» atty oiyn-sauyq jobasyn körsettı. Balalardyŋ ǧylymǧa degen qyzyǧuşylyǧy bırden baiqalady. Jazǧy lager uaqytynda olar sabaqta alǧan bılımın bekıtıp, özderın jas zerthanaşylar retınde körsetedı. Ädette oqu jylynda tyŋ täjıribelerge uaqyt jetıspei jatady. Al lagerde balalar özderınıŋ qyzyǧuşylyǧyna ūstazdarymen bırge köp köŋıl böledı. Oquşylar şyny sauyttaǧy bolǧan siqyrǧa erekşe quansa, eresek qonaqtarǧa da būl täjıribe airyqşa äser qaldyrady.
Şyǧarmaşylyqqa jaqyn balalar «Körkem-art» jasaǧynyŋ körkemsuret studiiasynda türlı daǧdyny üirense, bolaşaq injenerler barlyq qajettı jabdyqty STEM-zerthanalarda taba alady. Matematikaǧa beiımı bar oquşylar üşın Math camp jäne «İntellektium», jas sportşylarǧa Sport drive, aspazdarǧa «JAS konditer» baǧyttary ūiymdastyrylǧan.
Erekşe künder
Mekteptıŋ jazǧy lagerınde türlı festival qalys qalmaidy. Balalarǧa taqyryptyq künder de ūiymdastyrylǧan. Patriot künı barlyq balalar Memlekettık tudy äspetteitın kök jäne sary tüstı kiım kiıp, änūran şyrqap, Memlekettık rämızderdı nasihattaidy. Bas kiımder künı balalar men mūǧalımder türlı-türlı bas kiım jasap, bır-bırınıkın qyzyqtaidy. Balalar üşın mektep aumaǧynda sport estafetalary, «Qoltyrauyn» oiyny jäne bi fleşmoby ötedı. Joǧary synyp oquşylaryna «Jasyl el» eŋbek jasaǧy da bar. Baǧdarlamaǧa qatysuşylar mektep aumaǧynda jasyl jelekterdı otyrǧyzady, aǧaştarǧa kütım jasaidy. Aitpaqşy, joǧary synyp oquşylary öz bastamasymen jazǧy lagerde erıktı bolyp jūmys ısteidı, mūǧalımderge sabaqtar men konkurstar ötkızuge kömektesedı.
Mektep tek bılım oşaǧy ǧana emes, sonymen qatar bos uaqyt, qosymşa sabaq jäne öskeleŋ ūrpaqty jan-jaqty damytu ortalyǧy ekenın körsetedı.
Mansiia SÄKENOVA
